“திருடப்பட்ட ஹார்ட் டிஸ்க்குகள்.. யாரும் தப்பிக்க முடியாது”.. அமைச்சர் CTR நிர்மல்குமார் உறுதி!

சென்னை: "ஹார்டு டிஸ்க்குகள் மாயமானது குறித்து விசாரணை நடந்து கொண்டிருக்கிறது. விசாரணைக்கு பின்னர் முழுமையான விவரங்கள் வெளியிடப்படும். கடந்த மாதம் சிலரை பணியிடை நீக்கம் செய்தோம். அதன் பிறகு இது நடந்ததா என்பது குறித்து விசாரணை நடத்தப்பட்டு வருகிறது" என மின்சாரத்துறை அமைச்சர் சிடிஆர் நிர்மல்குமார் விளக்கம் அளித்துள்ளார்.

தமிழக மின்சாரத்துறை அமைச்சர் சிடிஆர் நிர்மல்குமார் கடந்த சில நாட்களுக்கு முன்பு மின்துறை சார்ந்த ஆய்வில் ஈடுபட்டார். இந்நிலையில் கடந்த மாதம் மே 16, 17 ஆகிய தேதிகளில், மின்வாரிய தலைமை அலுவலகத்தில் குறைவான ஊழியர்கள் இருந்த சமயத்தில் சுமார் 10 ஹார்டு டிஸ்க்குகள் காணாமல் போனதாக புகார் எழுந்தது.

அந்த ஹார்டு டிஸ்க்குகளில் நிலக்கரி கொள்முதல் டெண்டர் தொடர்பான தகவல்கள் இருந்ததாக கூறப்படுகிறது. இது தொடர்பாக அதிகாரிகள் சிந்தாதிரிப்பேட்டை காவல் நிலையத்தில் புகார் கொடுத்துள்ளனர்.
இந்த நிலையில், மின்வாரிய தலைமை அலுவலகத்தில் ஹார்டு டிஸ்க்குகள் மாயமான விவகாரம் குறித்து அமைச்சர் சிடிஆர் நிர்மல்குமார் இன்று செய்தியாளர்களைச் சந்தித்து விளக்கம் அளித்தார்.

அமைச்சர் நிர்மல்குமார் பேசுகையில், "பல ஹார்ட் டிஸ்க்குகள் மாயமானதாக கடந்த மாதம் புகார்கள் கிடைத்திருக்கின்றன. இந்தச் சம்பவத்தில் சிலர் கைது செய்யப்பட்டுள்ளனர். இதுதொடர்பாக காவல்துறையினர் விசாரணை நடத்தி வருகின்றனர். விசாரணையில் இருக்கும்போது எதுவும் பேசமுடியாது.

காணாமல் போன ஹார்ட் டிஸ்க்குகள் குறித்து ஆய்வு செய்ய கூறியிருக்கிறோம். கணினிகளில் இருக்கும் தரவுகளை பேக்-அப் எடுத்து வைக்க உத்தரவிட்டிருக்கிறோம். ஒப்பந்த தொழிலாளர்கள் நியமனம் தொடர்பான ஆவணங்களும் காணவில்லை. எந்த இடத்திலும் யாரும் தப்பிக்க முடியாது.

யாராக இருந்தாலும் நடவடிக்கை எடுக்கப்படும். மாயமான கோப்புகள், ஆவணங்கள், ஹார்ட் டிஸ்க்குகள் தொடர்பாக விசாரணைகள் நடைபெற்று வருகின்றன. சம்பந்தப்பட்ட அதிகாரிகள் பணியிடை நீக்கம் செய்யப்பட்டுள்ளனர். திருடப்பட்ட ஆவணங்களை மீட்க நடவடிக்கைகள் மேற்கொள்ளப்பட்டு வருகின்றன" எனத் தெரிவித்துள்ளார்.

அதைத்தொடர்ந்து அதிகளவிலான மின் வெட்டை திசைதிருப்புவதற்காக ஹார்ட் டிஸ்க் திருட்டு மேற்கொள்ளப்பட்டதா என்ற கேள்விக்கு, "மின்தடைக்கும் இந்த ஹார்ட் டிஸ்க்குகள் காணாமல் போன சம்பவத்துக்கும் எந்தச் சம்பந்தமும் இல்லை. காற்றாலைகளில் ஏற்பட்ட பிரச்சனைகள் காரணமாக மின்தடைகள் ஏற்பட்டு வருகின்றன.

எந்தவித நோக்கமும் இல்லாமல் யாரும் ஹார்ட் டிஸ்க்குகளைத் திருடியிருக்க மாட்டார்கள். விசாரணைகள் நடைபெற்று வருகின்றன. கடந்த ஆட்சியில் இருந்த டெண்டர் தொடர்பான விவரங்கள் மாயமாகியுள்ளன. இந்தத் திருட்டுச் சம்பவத்தின் பின்னணியில் உள்ளவர்கள் யார் என்பது குறித்து தீவிர விசாரணை நடைபெற்று வருகிறது" எனத் தெரிவித்துள்ளார்.

English summary

“An inquiry is currently underway regarding the disappearance of hard disks. Full details will be released following the investigation. We suspended certain individuals last month; an inquiry is being conducted to determine whether this incident occurred subsequent to those suspensions,” clarified Electricity Minister CTR Nirmal Kumar.