“படத்தில் விஜயகாந்துக்கு வாக்கு கேட்டேன்.. இன்று அவரது மகனுக்கு ஓட்டு கேட்கிறேன்" - ஸ்டாலின் பேச்சு

Updated: Sunday, April 5, 2026, 13:08 [IST]

Subscribe to Oneindia Tamil

விருதுநகர்: "படத்தில் விஜயகாந்துக்கு வாக்கு கேட்டேன்.. இன்று அவரது மகனுக்கு ஓட்டு கேட்டு நேரில் வந்துள்ளேன்" என முதல்வர் மு.க.ஸ்டாலின் விருதுநகரில் இன்று நடந்த பிரச்சாரத்தில் பேசியுள்ளார்.

தமிழக சட்டசபை தேர்தல் நாள் நெருங்கி வருகிறது. இந்நிலையில் திமுக தலைவரும், தமிழக முதல்வருமான ஸ்டாலின் சூறாவளி சுற்றுப்பயணம் மேற்கொண்டு பிரச்சாரம் மேற்கொண்டு வருகிறார். அந்தவகையில், விருதுநகரில் இன்று (ஏப்ரல் 5) நடந்த தேர்தல் பிரச்சார கூட்டத்தில் தமிழக முதல்வர் மு.க.ஸ்டாலின் கலந்து கொண்டார்.

இந்தக் கூட்டத்தில் பேசிய முதல்வர் திமுக தலைமையிலான மதச்சார்பற்ற முற்போக்கு கூட்டணி வேட்பாளர்களான கே.கே.எஸ்.எஸ்.ஆர். ராமச்சந்திரன், தங்கம் தென்னரசு, கடற்கரை ராஜ், தங்கபாண்டியன், விஜயபிரபாகரன், அசோகன், மகாலிங்கம், ஆகியோருக்கு வாக்கு சேகரித்து பேசினார்.

அப்போது பேசிய முதல்வர் ஸ்டாலின், "விருதுநகர் சட்டசபை தொகுதி தேமுதிகவை சேர்ந்த விஜய பிரபாகரன், எனது ஆருயிர் நண்பர் கேப்டன் விஜயகாந்த், எனது அன்புச் சகோதரி பிரேமலதா ஆகியோரின் மகன் தான் இங்கே வேட்பாளராக நிற்கிறேன். அவருக்கு முரசு சின்னத்தில் வாக்களிக்க வேண்டுகிறேன்.

விஜய பிரபாகரனுக்கு வாக்கு கேட்கும்போது எனது நினைவுகள் பின்னோக்கிச் செல்கின்றன. எனது ஆருயிர் நண்பர் விஜயகாந்த், 'மக்கள் ஆணையிட்டால்' என்ற படத்தில் வேட்பாளராக நடித்தார். அதில் கௌரவ வேடத்தில் நான் ஓட்டு கேட்க வருவேன். விஜயகாந்த்தை ஆதரித்து "ஆற அமர கொஞ்சம் யோசித்து பாரு.." என்ற பாடலை பாடுவேன்.

விஜயகாந்த்துக்கு ஓட்டு கேட்டு திரைப்படத்தில் நடித்தேன். இன்று அவரது அருமை மகனுக்கு வாக்கு கேட்டு நேரில் வந்துள்ளேன். விஜய பிரபாகரனை பெருவாரியான வாக்குகள் வித்தியாசத்தில் வெற்றி பெற வைக்க வேண்டுமென்று அன்போடு கேட்டுக்கொள்கிறேன்" எனப் பேசியுள்ளார்.

1988-ல் ராம நாராயணன் இயக்கத்தில் வெளியான 'மக்கள் ஆணையிட்டால்' திரைப்படத்தில் விஜயகாந்த் நடித்திருந்தார். அரசியல் கதைக்களமான இந்த திரைப்படத்தில் கௌரவ தோற்றத்தில் ஸ்டாலின் நடித்திருந்தார். இந்தப் படத்தில் கருணாநிதி எழுதிய பாடலில் இன்றைய முதல்வர் ஸ்டாலின் நடித்திருந்தார்.

'மக்கள் ஆணையிட்டால்' படத்தில் தேர்தலில் போட்டியிடும் விஜயகாந்திற்காக ஸ்டாலின் பிரச்சாரம் செய்வார். அன்று படத்தில் வேட்பாளராக நின்று விஜயகாந்தை ஆதரித்து ஒரு பாடல் பாடி பிரச்சாரம் செய்த ஸ்டாலின் இன்று நிஜத்தில் விஜயகாந்தின் மகன் விஜய பிரபாகரனுக்காக தேர்தல் பிரச்சாரம் செய்துள்ளார்.