1984, 1991 தேர்தல்களில் தோற்றாலும்! ஸ்டாலினுக்கு மிகப் பெரிய வலியை கொடுத்த 2026 தோல்வி! ஏன்?

Updated: Monday, May 4, 2026, 21:27 [IST]

Subscribe to Oneindia Tamil

சென்னை: தமிழக அரசியலின் 'அசைக்க முடியாத கோட்டை' என்று வர்ணிக்கப்பட்ட கொளத்தூர் தொகுதியில், முதலமைச்சர் மு.க. ஸ்டாலின் எதிர்பாராத தோல்வியைத் தழுவியுள்ளார். மூன்றாவது முறையாக அவர் தோல்வியை கண்டிருக்கிறார். முதல் இரு தோல்விகளை விட இந்த தோல்வி ஸ்டாலினுக்கு மிகப் பெரிய வலியை கொடுத்துள்ளது ஏன் என்பதை பார்க்கலாம்.

தமிழக வெற்றி கழகத்தின் (டி.வி.கே.) வேட்பாளரும், ஸ்டாலினின் முன்னாள் நெருங்கிய உதவியாளருமான வி.எஸ். பாபுவிடம் இந்த வெற்றியை அவர் பறிகொடுத்துள்ளார்.

வரலாறு காணாத மூன்றாவது தோல்வி

மு.க. ஸ்டாலினின் 40 ஆண்டுகால நீண்ட அரசியல் வரலாற்றில் இது மூன்றாவது தேர்தல் தோல்வியாகும். இதற்கு முன்னதாக அவர் சந்தித்த தோல்விகள் பின்வருமாறு:

1984 (ஆயிரம் விளக்கு): தனது 31-வது வயதில் அ.தி.மு.க. - காங்கிரஸ் கூட்டணியின் பிரம்மாண்ட அலையில் சிக்கி முதல் தோல்வியைச் சந்தித்தார். இந்திரா காந்தி படுகொலை மற்றும் எம்.ஜி.ஆரின் உடல்நலப் பாதிப்பால் ஏற்பட்ட அனுதாப அலைகளே அப்போது ஸ்டாலினின் தோல்விக்குக் காரணமாக அமைந்தது.

1991 (ஆயிரம் விளக்கு): ராஜீவ் காந்தி படுகொலைக்குப் பிறகு நிலவிய அரசியல் சூழலில், அ.தி.மு.க.வின் கே.ஏ. கிருஷ்ணசாமியிடம் 16,981 வாக்குகள் வித்தியாசத்தில் இரண்டாவது தோல்வியைத் தழுவினார்.

கோட்டையாகத் திகழ்ந்த கொளத்தூர்

2011-ஆம் ஆண்டு ஆயிரம் விளக்குத் தொகுதியிலிருந்து கொளத்தூருக்கு மாறிய ஸ்டாலின், அந்தத் தொகுதியைத் தனது இதயத் துடிப்பாக மாற்றியிருந்தார்.

2011: 2ஜி ஊழல் காரணமாக திமுக பெரும் சரிவைச் சந்தித்தபோதும், கொளத்தூரில் ஸ்டாலின் வெற்றி பெற்று தனி முத்திரை பதித்தார்.

2016 , 2021: 2016-ல் 22% வாக்கு வித்தியாசத்திலும், 2021-ல் 70,000-க்கும் அதிகமான வாக்குகள் வித்தியாசத்திலும் (60.9% வாக்குகள்) மகத்தான வெற்றி பெற்று அசைக்க முடியாத தலைவராகத் திகழ்ந்தார்.

2026: அதிர வைக்கும் தேர்தல் முடிவுகள்

தற்போதைய தேர்தலில் ஸ்டாலினின் வாக்கு சதவீதம் 2021-ஐ விட அதிகரித்திருந்த போதிலும், தவெக வேட்பாளர் வி.எஸ். பாபுவின் அதிரடி முன்னேற்றம் ஸ்டாலினுக்கு அதிர்ச்சியை ஏற்படுத்தியுள்ளது.

திமுக முன்னணித் தலைவர்களின் நிலை

ஸ்டாலின் மட்டுமல்லாது, திமுகவின் தூண்களாகக் கருதப்படும் பல மூத்த அமைச்சர்களும் பின்னடைவைச் சந்தித்துள்ளனர்.

தங்கம் தென்னரசு

டி.ஆர்.பி. ராஜா

எ.வ.வேலு

கே.என்.நேரு

மா. சுப்பிரமணியன்

திமுகவின் கோட்டைகள் தகர்க்கப்பட்டு வரும் இந்தச் சூழல், தமிழக அரசியலில் ஒரு புதிய சகாப்தம் தொடங்கியுள்ளதையே காட்டுகிறது. ஸ்டாலினின் அரசியல் வாழ்க்கையில் இத்தோல்வி ஒரு மிகப்பெரிய திருப்புமுனையாகப் பார்க்கப்படுகிறது.