இஸ்லாமிற்கு மாறினால் இடஒதுக்கீடு கிடைக்காது! தமிழக அரசின் மனுவில் உச்ச நீதிமன்றம் பரபரப்பு தீர்ப்பு
சென்னை: இந்து மதத்தில் பிற்படுத்தப்பட்ட வகுப்பைச் சேர்ந்த ஒருவர் இஸ்லாம் மதத்திற்கு மாறுவதால் மட்டுமே, அவர் உடனடியாக முஸ்லிம் பிற்படுத்தப்பட்டோர் பிரிவில் இடஒதுக்கீடு பெற முடியாது என்று உச்ச நீதிமன்றம் இன்று மிக முக்கியமான வரலாற்றுத் தீர்ப்பை வழங்கியுள்ளது.
மதமாற்றம் அடைந்தவர்களுக்கும் இடஒதுக்கீடு சலுகை தொடர்ந்து கிடைக்க வேண்டும் என்று தமிழக அரசு கொண்டு வந்த அரசாணைக்கு ஆதரவாகத் தொடரப்பட்ட மேல்முறையீட்டு மனுவை நீதிபதிகள் திட்டவட்டமாகத் தள்ளுபடி செய்து உத்தரவிட்டனர்.
வழக்கின் பின்னணி என்ன?
தமிழகத்தில் கல்வி மற்றும் அரசு வேலைவாய்ப்புகளில் பிற்படுத்தப்பட்ட முஸ்லிம்களுக்கு தனியாக இடஒதுக்கீடு நடைமுறையில் உள்ளது. இதற்காக ஏழு குறிப்பிட்ட முஸ்லிம் சமூகங்கள் அரசுப் பட்டியலில் அங்கீகரிக்கப்பட்டு அறிவிக்கப்பட்டுள்ளன.
இந்த நிலையில், இந்து மதத்தில் பிற்படுத்தப்பட்டோர் , மிகவும் பிற்படுத்தப்பட்டோர, சீர்மரபினர் மற்றும் ஆதிதிராவிடர் (SC) வகுப்புகளில் இருந்து இஸ்லாம் மதத்தைத் தழுவுபவர்களுக்கும் பிற்படுத்தப்பட்ட முஸ்லிம் சமூக சான்றிதழ் வழங்கி, அவர்களுக்கு இடஒதுக்கீடு சலுகைகளைத் தொடர்ந்து வழங்கலாம் என்று தமிழக அரசு அரசாணை பிறப்பித்திருந்தது.
இந்த அரசாணையை எதிர்த்துத் தொடரப்பட்ட வழக்கை விசாரித்த சென்னை உயர் நீதிமன்றம், "ஒருவர் மதம் மாறுவதால் அவர் முஸ்லிமாக மட்டுமே மாறுகிறார்; மாறாக அவர் நேரடியாகப் பட்டியலிடப்பட்ட பிற்படுத்தப்பட்ட முஸ்லிம் சமூகத்தில் தானாக இணைந்துவிட முடியாது" என்று கூறி தமிழக அரசின் அரசாணையை ரத்து செய்தது. சென்னை உயர் நீதிமன்றத்தின் இந்த உத்தரவை எதிர்த்து தமிழக அரசு உச்ச நீதிமன்றத்தில் மேல்முறையீடு செய்தது.
உச்ச நீதிமன்றம் சொன்னது என்ன?
நீதிபதி பிரசாந்த் குமார் மிஸ்ரா மற்றும் நீதிபதி ஸ்ரீ சந்திரசேகர் ஆகியோர் அடங்கிய அமர்வு இந்த மனுவை விசாரித்து இன்று தீர்ப்பளித்தது. சென்னை உயர் நீதிமன்றம் பிறப்பித்த உத்தரவை உறுதி செய்த நீதிபதிகள், தமிழக அரசின் மனுவை முழுமையாக நிராகரித்தனர்.
தீர்ப்பின் முக்கிய பகுதிகளை வாசித்த நீதிபதி பிரசாந்த் குமார் மிஸ்ரா தெரிவித்த முக்கிய கருத்துக்கள்:
மதம் மாறுவது ஒரு தனிநபரின் சொந்த விருப்பம். ஆனால், ஒருவர் தனது மதத்தை மாற்றிவிட்டார் என்பதற்காக மட்டுமே, அரசு அறிவித்துள்ள பிற்படுத்தப்பட்ட முஸ்லிம் சமூகத்தின் ஒரு அங்கமாக அவர் தானாக மாறிவிட முடியாது.
இந்து மத சமூக அமைப்பில் ஒருவருக்கு இருந்த சமூகப் பின்தங்கிய நிலையை, அவர் வேறு மதத்திற்கு மாறிய பிறகும் அப்படியே எடுத்துக் கொண்டு போய் அங்கு இடஒதுக்கீடு கோர முடியாது என்று அரசியல் சாசனப் பிரிவு 16(4)-ஐ மேற்கோள் காட்டி நீதிமன்றம் தெளிவுபடுத்தியுள்ளது.
செயற்கையான புதிய பிரிவு உருவாகும் அபாயம்
தமிழக அரசின் இந்த நடைமுறை சமூகத்தில் ஒரு 'செயற்கையான புதிய குழுவை' (Artificial Group) உருவாக்கிவிடும் என்று நீதிபதிகள் எச்சரித்தனர்.
ஒரு குறிப்பிட்ட சமூகத்திற்கு இடஒதுக்கீடு வழங்க வேண்டுமானால், அதற்கு முன்னதாகச் சட்டரீதியான சமூக ஆய்வுகள் நடத்தப்பட வேண்டும். அந்த சமூகத்தினர் எந்த அளவிற்குப் பின்தங்கியுள்ளனர் என்பதை அறிவியல் பூர்வமாகவும் சட்டப்படியும் ஆராயாமல், வெறும் மதமாற்றத்தின் அடிப்படையில் சான்றிதழ் வழங்குவது சரியான நடவடிக்கை அல்ல என்று நீதிமன்றம் சுட்டிக்காட்டியுள்ளது.
இந்தத் தீர்ப்பினால் என்ன நடக்கும்?
சாதாரண மக்களுக்குப் புரியும் வகையில் சொல்ல வேண்டும் என்றால்:
ஒருவர் இந்து மதத்தில் இருந்து இஸ்லாம் மதத்தைத் தழுவினால், அவர் உடனடியாகப் பிற்படுத்தப்பட்ட முஸ்லிம் இடஒதுக்கீட்டுப் பிரிவின் கீழ் சலுகை கோர முடியாது. பிறப்பால் ஏற்கனவே அந்தந்த முஸ்லிம் சமூகப் பிரிவுகளில் இருந்துவரும் மக்களுக்கே அரசு அறிவித்துள்ள இடஒதுக்கீடு உரிமைகள் நேரடியாகச் சேரும். தமிழக அரசு கொண்டு வந்த பழைய அரசாணை செல்லாது என்ற சென்னை உயர் நீதிமன்றத்தின் உத்தரவு தற்போது உச்ச நீதிமன்றத்தாலும் முழுமையாக உறுதி செய்யப்பட்டுள்ளது.
மதமாற்றம் மற்றும் சமூக இடஒதுக்கீடு தொடர்பாக நாடு முழுவதும் நீண்ட காலமாக நடைபெற்று வரும் சட்ட விவாதங்களில், உச்ச நீதிமன்றத்தின் இந்தத் தீர்ப்பு மிகவும் முக்கியமான திருப்புமுனையாகப் பார்க்கப்படுகிறது.
Click it and Unblock the Notifications
Sign in with Google
