தமிழ்நாடுக்கு எச்சரிக்கை மணி! கடனை விட மோசமானது இது.. ஒவ்வொரு வருடமும் ரூ.78,324 கோடி!

முதல்வர் விஜய் அளித்த வாக்குறுதியை படியே தமிழ்நாட்டின் நிதிநிலைமை தொடர்பான அதிகாரப்பூர்வ வெள்ளை அறிக்கையை தமிழ்நாடு நிதியமைச்சர் மரிய வில்சன் இன்று சென்னை தலைமைச் செயலகத்தில் வெளியிட்டார். வரவைக் காட்டிலும் செலவு அதிகமாக உள்ளதால் மாநிலத்தின் வருவாய் பற்றாக்குறை மற்றும் கடன் சுமை வரலாறு காணாத வகையில் உயர்ந்துள்ளதாக புள்ளிவிவரங்களுடன் ஒவ்வொரு தரவுக்கும் சாமானிய மக்களுக்கு எளிய முறையில் விளக்கமளித்துள்ளார்.

"வரவை விட செலவு அதிகமாக இருந்தால் எந்த குடும்பமும் நீண்ட காலம் நிலைத்து நிற்காது" என்பது பொருளாதாரத்தின் அடிப்படை விதி. தற்போது அதே கேள்வி தமிழ்நாட்டின் நிதிநிலையைச் சுற்றியும் எழுந்துள்ளது என மரிய வில்சன் பேசியுள்ளார். மாநிலத்தின் வருவாய் பற்றாக்குறை, கடன் சுமை மற்றும் வட்டி செலவுகள் குறித்து தமிழக அரசு வெளியிட்டுள்ள வெள்ளை அறிக்கை பல முக்கிய தகவல்களை வெளிச்சத்துக்கு கொண்டு வந்துள்ளது.

தமிழ்நாட்டின் உண்மையான நிதிநிலை என்ன?

தமிழ்நாட்டின் நிதிநிலை தொடர்பாக நிதியமைச்சர் மரிய வில்சன் வெளியிட்டுள்ள வெள்ளை அறிக்கையின் படி மாநிலத்தின் வருவாய் பற்றாக்குறை ரூ.78,324 கோடியாக உயர்ந்துள்ளது என தெரிவித்தார்.

பொருளாதார ரீதியில் வருவாய் பற்றாக்குறை என்பது அரசின் வழக்கமான வருவாயை விட அன்றாட செலவுகள் அதிகமாக இருப்பதைக் குறிக்கிறது. இதனால் அரசு தனது செலவுகளை சமாளிக்க கூடுதல் கடன் வாங்க வேண்டிய நிலை உருவாகும்.

ரூ.13.18 லட்சம் கோடி கடன் சுமை

வெள்ளை அறிக்கையில் வெளியிடப்பட்ட தகவலின்படி, தமிழ்நாட்டின் மொத்த கடன் அளவு ரூ.13.18 லட்சம் கோடியாக உள்ளது. இதன் தாக்கம் சாதாரண மக்களை நேரடியாக பாதிக்கிறது. இந்த மாபெரும் கடன் மூலம் மாநிலத்தின் ஒவ்வொரு நபரின் மீது சராசரியாக ரூ.1,28,934 கடன் சுமை இருப்பதாக வெள்ளை அறிக்கையில் குறிப்பிடுகிறது.

ஒரு மாநிலத்தின் கடன் அளவு அதிகரிப்பது மட்டுமல்லாமல், அந்தக் கடனுக்காக செலுத்த வேண்டிய வட்டியும் அரசின் நிதிநிலையை பாதிக்கும் முக்கிய காரணியாக பார்க்கப்படுகிறது. இதுதான் வருவாய் பற்றாக்குறைக்கு பெரும் சுமையாக உள்ளது.

தமிழ்நாடு அரசின் நேரடி கடன் ரூ.10 லட்சம் கோடியாக இருந்தாலும், அரசுப் பொதுத்துறை நிறுவனங்களின் கடனையும் சேர்த்தால் மொத்த கடன் சுமை ரூ.13.8 லட்சம் கோடியாக அதிகரிக்கிறது.

வட்டிக்கே ஆண்டுக்கு ரூ.67,000 கோடி!

தமிழ்நாடு அரசு தற்போது ஆண்டுதோறும் வட்டி செலவுக்காக மட்டும் ரூ.67,000 கோடி செலுத்துவதாக வெள்ளை அறிக்கை கூறுகிறது. இது மாநில அரசின் வருவாயில் கணிசமான பகுதியை உறிஞ்சும் செலவாக கருதப்படுகிறது.

வளர்ச்சி திட்டங்கள், உள்கட்டமைப்பு முதலீடுகள் மற்றும் சமூக நலத் திட்டங்களுக்கு பயன்படுத்தப்பட வேண்டிய நிதியின் ஒரு பகுதி, கடன்களின் வட்டி செலுத்துவதற்கே செலவாகும் சூழல் உருவாகியுள்ளது என தமிழ்நாடு நிதியமைச்சர் மரிய வில்சன் தெரிவித்துள்ளார்.

திமுக வாங்கிய கடன்

வெள்ளை அறிக்கையில் இடம்பெற்றுள்ள மற்றொரு முக்கிய தகவல் என்னவென்றால், கடந்த திமுக ஆட்சியின் ஐந்து ஆண்டுகளில் மட்டும் சுமார் ரூ.5 லட்சம் கோடி கடன் பெறப்பட்டுள்ளதாக தெரிவிக்கப்பட்டுள்ளது. இதன் காரணமாக மாநிலத்தின் மொத்த கடன் சுமை குறிப்பிடத்தக்க அளவில் உயர்ந்துள்ளதாக வெள்ளை அறிக்கை விளக்குகிறது.

தமிழ்நாடு நிதியமைச்சர் மரிய வில்சன் தனது விளக்கத்தில், கடந்த ஐந்து ஆண்டுகளில் மாநிலத்தின் சொந்த வரி வருவாய் வளர்ச்சி எதிர்பார்த்த அளவுக்கு இல்லாத நிலையில், செலவுகள் தொடர்ந்து அதிகரித்ததாக குறிப்பிட்டார்.

சுதந்திரம் அடைந்து 60 ஆண்டுகளில் தமிழ்நாடு வாங்கிய மொத்த கடனை விட, கடந்த ஐந்து ஆண்டுகளில் மட்டும் இரட்டிப்பு அளவுக்கு கடன் பெறப்பட்டுள்ளது.

வரவை விட செலவை கட்டுப்படுத்த வேண்டும்

வெள்ளை அறிக்கையை வெளியிட்டு பேசிய நிதியமைச்சர், திருக்குறளில் கூறப்பட்டுள்ள "வரவை விட செலவை கட்டுப்படுத்துவது" என்ற பொருளாதாரக் கோட்பாட்டை மேற்கோள் காட்டினார். ஆனால் தற்போதைய சூழலில் மாநிலத்தின் வருமானத்தை விட செலவுகள் அதிகமாக உள்ளதாக அவர் தெரிவித்தார்.

மேலும், 2021 முதல் 2026 வரையிலான காலகட்டத்தில் மாநிலத்தின் சொந்த வரி வருவாய் வரலாறு காணாத அளவில் வீழ்ச்சியை சந்தித்துள்ளதாகவும் அவர் கூறினார்.

அடுத்த சவால்

தமிழ்நாட்டின் வளர்ச்சி, முதலீடுகள் மற்றும் சமூக நலத் திட்டங்களை தொடர்ச்சியாக முன்னெடுத்து செல்ல வேண்டிய நிலையில், அதிகரித்து வரும் கடன் சுமை மற்றும் வருவாய் பற்றாக்குறையை கட்டுப்படுத்துவது அரசின் முக்கிய சவாலாக மாறியுள்ளது.

English summary

Tamil Nadu’s revenue deficit has surged to Rs.78,324 crore, with the state’s total debt reaching Rs.13.18 lakh crore and annual interest payments touching Rs.67,000 crore, according to the white paper released by Finance Minister Mariya Wilson. The report highlights poor growth in own tax revenue and rising debt burden over the past five years.