தமிழ்நாட்டில் 9 ஐஏஎஸ் அதிகாரிகள் இடமாற்றம்.. தலைமைச் செயலாளர் போட்ட உத்தரவு!

சென்னை: தமிழ்நாட்டில் 9 ஐஏஎஸ் அதிகாரிகள் இடமாற்றம் செய்து தமிழக தலைமைச் செயலாளர் உத்தரவிட்டுள்ளார். சிறுபான்மையினர் நலத்துறையின் சிறப்பு செயலாளராக செயல்பட்ட கலை அரசி இடமாற்றம் செய்யப்பட்டு, சீர்மரபினர் நலத்துறையின் ஆணையராக நியமனம் செய்யப்பட்டுள்ளார். அதேபோல், சிப்காட் செயல் இயக்குநராக கேத்தரின் சரண்யா நியமிக்கப்பட்டுள்ளார்.

தமிழக அரசுப் பணியில் 3 ஆண்டுகள் ஒரே பணியிடத்தில் பணியாற்றுவோர், இடமாற்றம் செய்யப்படுவது வழக்கமாகும். அதேபோல் சட்டப்பேரவை, நாடாளுமன்றத் தேர்தல் நேரங்களில் அனைத்து நிலைகளிலும் இடமாற்றங்கள் செய்யப்படும். அந்த வகையில் ஜூன் மாதம் கடைசி வாரத்தில் மட்டும் 55 ஐஏஎஸ் அதிகாரிகள் இடமாற்றம் செய்யப்பட்டனர்.

அதில் 9 மாவட்ட ஆட்சியர்களும் இடம்பெற்றிருந்தனர். இந்த நிலையில் மீண்டும் 9 ஐஏஎஸ் அதிகாரிகள் இடம்மாற்றம் செய்து தமிழக அரசு உத்தரவிட்டுள்ளது. அதன்படி மிகப் பிற்படுத்தப்பட்டோர் மற்றும் சீர்மரபினர் நலத்துறை ஆணையராக கலை அரசி நியமிக்கப்பட்டுள்ளார். தமிழக கதர் கிராமத் தொழில் வாரிய தலைமை செயல் அலுவலராக சம்பத் நியமனம் செய்யப்பட்டுள்ளார்.

அதேபோல் நில நிர்வாகம் மற்றும் நகர்ப்புற நில உச்சவரம்பு மற்றும் நகர்ப்புற நிலவரி இயக்குநராக மகேஸ்வரி, தமிழக நுகர்பொருள் வாணிபக் கழக மேலாண்மை இயக்குநராக ஜான் லூயிஸ் நியமிக்கப்பட்டுள்ளனர். அதேபோல், பிற்படுத்தப்பட்டோர் , மிகவும் பிற்படுத்தப்பட்டோர் மற்றும் சிறுபான்மையினர் நலத்துறை அரசு சிறப்புச் செயலாளராக சரவண வேல்ராஜ் நியமனம் செய்யப்பட்டிருக்கிறார்.

தொடர்ந்து புவியியல் மற்றும் சுரங்கத்துறை இயக்குநராக மோகன், உணவுப்பொருள் வழங்கல் மற்றும் நுகர்வோர் பாதுகாப்பு இயக்குநராக சிவராசு, தமிழக நகர்ப்புற வளர்ச்சி நிதியத்தின் தலைவர் மற்றும் மேலாண்மை இயக்குநராக ராஜேந்திர ரத்னு நியமனம் செய்யப்பட்டுள்ளனர். தமிழக தொழில்முன்னேற்ற நிறுவனம் (சிப்காட்) செயல் இயக்குநராக கேத்தரின் சரண்யா ஆகியோர் நியமிக்கப்பட்டுள்ளனர்.

English summary

Tamil Nadu Chief Secretary has issued an order transferring 9 IAS officers across various departments. The reshuffle is part of the state’s ongoing administrative restructuring to enhance governance efficiency.