முதல்வர் வேட்பாளர் விவகாரம்: ஓபிஎஸ்-உடன் அதிமுக மூத்த தலைவர் தம்பிதுரை எம்.பி. ஆலோசனை
சென்னை: அதிமுகவில் முதல்வர் வேட்பாளராக தம்மை அறிவிக்கக் கோரி கலகக் குரல் எழுப்பியிருக்கும் துணை முதல்வர் ஓ. பன்னீர்செல்வத்தை அதிமுக மூத்த நிர்வாகியும் ராஜ்யசபா எம்.பி.யுமான தம்பிதுரை இன்று சந்தித்து பேசினார்.
சட்டசபை தேர்தலில் அதிமுகவின் முதல்வர் வேட்பாளராக தன்னையே அறிவிக்க வேண்டும் என அதிமுக செயற்குழுவில் வலியுறுத்தினார் ஓபிஎஸ். ஆனால் முதல்வர் எடப்பாடி பழனிசாமி தரப்பு இதை திட்டவட்டமாக நிராகரித்துவிட்டது.
இதனால் ஓபிஎஸ் அதிருப்தியில் இருப்பதாக கூறப்படுகிறது. அதிமுக முதல்வர் வேட்பாளராக அறிவிக்காவிட்டால் கட்சிப் பொதுச்செயலாளர் பதவியையாவது கொடுங்க என்பது ஓபிஎஸ்-ன் அடுத்த அஸ்திரம்.
ஆனால் முதல்வர் எடப்பாடி தரப்போ, எதுவாக இருந்தாலும் பொதுக்குழுவில் பார்க்கலாம் என பதிலடி தருகிறது. இதனால் பொதுக்குழுவில் தமக்கான ஆதரவாளர்களை திரட்டும் பணிகளில் ஓபிஎஸ் மும்முரம் காட்டுகிறார்.
ஓபிஎஸ் மீது கடும் கோபத்தில் அதிமுக தொண்டர்கள்- ஜெயிக்குற நிலைமையில் எதுக்குதான் இந்த பஞ்சாயத்து?
இதனிடையே ஓபிஎஸ்ஸை சமாதானப்படுத்தும் வகையில் அதிமுகவின் மூத்த தலைவர்கள் அவருடன் பேச்சுவார்த்தை நடத்தி வருகின்றனர். லோக்சபா முன்னாள் துணை சபாநாயகரும் ராஜ்யசபா எம்.பி.யுமான தம்பிதுரை இன்று காலையில் ஓபிஎஸ்ஸை அவரது இல்லத்தில் சந்தித்து இந்த விவகாரம் குறித்து ஆலோசனை நடத்தி இருக்கிறார்.