ஒளிப்பதிவு சட்டத்திருத்த வரைவு மசோதாவை திரும்ப பெறணும்.. மத்திய அரசுக்கு, ஸ்டாலின் ஸ்டிராங் லெட்டர்!

Updated: Tuesday, July 6, 2021, 21:07 [IST]

Subscribe to Oneindia Tamil

சென்னை: மத்திய அரசு ஒளிப்பதிவு சட்டத்திருத்த வரைவு மசோதாவை திரும்ப பெற வலியுறுத்தி மத்திய மந்திரி ரவிசங்கர் பிரசாத்துக்கு, தமிழக முதல்வர் மு.க.ஸ்டாலின் கடிதம் எழுதி உள்ளார். கூட்டாட்சி தத்துவத்திற்கு எதிராக இந்த சட்ட மசோதா இருக்கிறது என்று அவர் கூறி உள்ளார்.

சூர்யா எதிர்ப்பு

தமிழ் திரையுலகை பொறுத்தவரை நடிகர் சூர்யா முதன் முதலில் இந்த மசோதாவுக்கு எதிராக கருத்து தெரிவித்தார். ''அரசின் சட்டம் என்பது மக்களுக்கு ஆதரவாக இருக்க வேண்டும்; மக்களின் குரல்வளையை நெறிக்க கூடாது'' என்று நேரடியாக குற்றம் சாட்டி இருந்தார் சூர்யா. அதன்பின்னர் பல திரை கலைஞர்கள் தங்களது எதிர்ப்பை தெரிவிக்க ஆரம்பித்தனர்.

திரை கலைஞர்கள் எதிர்ப்பு

நடிகர்கள் கமல், விஷால், கார்த்தி, இயக்குனர்கள் கவுதம் மேனன், கார்த்திக் சுப்புராஜ், உள்ளிட்ட பலரும் தங்களுடைய எதிர்ப்பை பதிவு செய்து உள்ளனர். தயாரிப்பாளர்கள் சங்கத்தின் தலைவர் ராமசாமி, நடிகர் கார்த்தி, நடிகை ரோகிணி ஆகியோர் தமிழ்நாடு முதல்வர் மு.க.ஸ்டாலினை நேரில் சந்தித்து, ஒளிப்பதிவு சட்டத்திருத்த வரைவு மசோதாவை திரும்ப பெற மத்திய அரசிடம் வலியுறுத்தும்படி கோரிக்கை விடுத்தனர்.

முதல்வரிடம் நேரில் கோரிக்கை

இந்த நிலையில் ஒளிப்பதிவு சட்டத்திருத்த வரைவு மசோதாவை திரும்ப பெற வலியுறுத்தி மத்திய மந்திரி ரவிசங்கர் பிரசாத்துக்கு, தமிழக முதல்வர் மு.க.ஸ்டாலின் கடிதம் ஒன்றை எழுதி உள்ளார். அந்த கடிதத்தில் அவர் கூறி இருப்பதாவது:- கருத்து சுதந்திரத்தை பறிக்கும் ஒளிப்பதிவு வரைவு திருத்த மசோதா, மாநில அரசுகளின் அதிகாரங்களையும் குறைக்கிறது.

கூட்டாட்சிக்கு எதிராக

கூட்டாட்சி தத்துவத்திற்கு எதிராக இந்த சட்ட மசோதா இருக்கிறது. உத்தேசிக்கப்பட்டுள்ள திருத்தங்கள், மத்திய திரைப்பட சான்றிதழ் வாரிய அதிகாரத்தையும் குறைக்கிறது. வயது வாரியாக சென்சார் சான்று வழங்குவதில் நடைமுறை சிக்கல்கள் உள்ளன. எனவே இந்த சட்டத்தை திரும்பப் பெற வேண்டும்" என வலியுறுத்தியுள்ளார்.