புதுச்சேரிக்கு அனுப்பப்படும் அதிமுக எம்எல்ஏ-க்கள்.. வேலையை தொடங்கிய எடப்பாடி.. என்ன நடக்குது?

Updated: Wednesday, May 6, 2026, 22:43 [IST]

Subscribe to Oneindia Tamil

சென்னை: திமுக மற்றும் அதிமுக இடையில் பேச்சுவார்த்தை நடைபெற்று வருவதாக அதிர்ச்சிகர தகவல்கள் வெளியாகி இருக்கும் சூழலில், அதிமுக எம்எல்ஏ-க்களை புதுச்சேரியில் தங்க வைக்க ஏற்பாடுகள் செய்யப்பட்டுள்ளது.

தமிழக சட்டசபைத் தேர்தலில் தவெக 108 தொகுதிகளில் வெற்றி பெற்று தனிப்பெரும் கட்சியாக உருவெடுத்துள்ளது. திமுக 59 தொகுதிகளிலும், அதிமுக கூட்டணி 47 தொகுதிகளிலும் வெற்றி பெற்றுள்ளன. எந்தக் கட்சிக்கு பெரும்பான்மை கிடைக்காத சூழலில், காங்கிரஸ் கட்சி தவெகவுடன் கூட்டணி அமைத்துவிட்டது. ஆனால் தவெக ஆட்சியமைக்க 6 எம்எல்ஏ-க்களின் தேவை இருக்கிறது.

இதனால் விசிக, சிபிஎம், சிபிஐ உள்ளிட்ட கட்சிகளின் ஆதரவை விஜய் நாடியுள்ளார். அதுதொடர்பாக நாளை விசிக பரிசீலனை செய்யவிருந்த சூழலில், திடீரென எம்எல்ஏ-க்கள் உடனான ஆலோசனை கூட்டம் ரத்து செய்யப்பட்டிருக்கிறது. சிபிஎம் கட்சியும் ஆதரவு கொடுக்கும் மனநிலையில் இல்லை. இப்படியான சூழலில், திடீரென திமுக - அதிமுக இடையில் பேச்சுவார்த்தை நடப்பதாக தகவல் வெளி வந்துள்ளது.

இதனிடையே விஜய் ஆட்சி அமைக்க ஆளுநரை சந்தித்து கடிதம் அளித்துள்ளார். ஆனால் ஆளுநர் தரப்பில் பெரும்பான்மையை நிரூபிக்க 2 நாட்கள் மட்டுமே அவகாசம் அளிக்கப்பட்டுள்ளது. ஒருவேளை விஜய்யால் பெரும்பான்மையை நிரூபிக்க முடியாவிட்டால், ஆட்சி அமைப்பது தொடர்பாக திமுக மற்றும் அதிமுக இடையில் 2ஆம் கட்டத் தலைவர்கள் மத்தியில் பேச்சுவார்த்தை நடந்து வருவதாக தகவல் வெளியாகி இருக்கிறது.

திமுக வெளியில் இருந்து ஆதரவு கொடுக்க உள்ளதாகவும், அதிமுக தலைமையில் ஆட்சி அமைக்க இருப்பதாகவும் சொல்லப்படுகிறது. அமைச்சரவையில் திமுக கூட்டணி கட்சிகளான விசிக, தேமுதிக, சிபிஎம், சிபிஐ உள்ளிட்ட கட்சிகளை சேர்க்கவும் பேசி வருவதாக விவரம் அறிந்த சிலர் பேசத் தொடங்கியுள்ளனர். இது நடைமுறையில் சாத்தியப்படுமா என்ற கேள்வியும் எழுந்திருக்கிறது.

ஆனால் எடப்பாடி பழனிசாமியுடன் அதிமுக எம்எல்ஏ-க்கள் சந்தித்திருக்கும் சூழலில், திடீரென அவர்கள் புதுச்சேரியில் உள்ள தனியார் விடுதிக்கு அனுப்பப்பட உள்ளதாக தெரிய வந்துள்ளது. ஏற்கனவே கூவத்தூரில் நடந்த சம்பவங்களின் அடிப்படையில் தான் எடப்பாடி பழனிசாமி முதல்வரானார். இதனிடையே ஆளுநரும் பதவியேற்பை தாமதம் செய்வது பல்வேறு சந்தேகங்களை ஏற்படுத்தி இருக்கிறது.