தமிழ்நாட்டின் கஜானா காலியா? நிதி நிலை என்ன? இன்று மாலை வெளியாகிறது வெள்ளை அறிக்கை

சென்னை: தமிழக அரசின் தற்போதைய நிதி நிலை, வருவாய், கடன் சுமை மற்றும் நிதி மேலாண்மை தொடர்பான விவரங்களை உள்ளடக்கிய வெள்ளை அறிக்கை இன்று மாலை வெளியிடப்பட உள்ளது. இன்று மாலை 5.30 மணிக்கு நிதித்துறை அமைச்சர் மரிய வில்சன் வெளியிடுகிறார். தமிழகத்தின் நிதி நிலை குறித்த வெள்ளை அறிக்கை வெளியிடப்படும் என்று முதல்வர் விஜய் ஏற்கனவே அறிவித்திருந்தார் என்பது குறிப்பிடத்தக்கது.

தமிழக முதல்வராக விஜய் கடந்த மாதம் 10 ஆம் தேதி பதவியேற்றார். பதவியேற்ற அன்றே தமிழக அரசின் கஜானா காலியாக இருப்பதாக விமர்சித்த விஜய், விரைவில் வெள்ளை அறிக்கை வெளியிடுவேன் என்று கூறியிருந்தார். இதன்படி, இன்று மாலை 5.30 மணிக்கு தமிழகத்தின் நிதி நிலை குறித்த வெள்ளை அறிக்கை வெளியாக உள்ளது.

அமைச்சர் மரிய வில்சன் இந்த வெள்ளை அறிக்கையை வெளியிட உள்ளார். சட்டமன்ற கூட்டத்தொடர் நாளை மறுநாள் தொடங்க உள்ள நிலையில் வெள்ளை அறிக்கை இன்று வெளியிடப்பட உள்ளது. தமிழக அரசின் வரவு - செலவு கணக்குகள், கடன்கள், முந்தைய நிர்வாகத்தின் செயல்பாடுகள் ஆகியவை இந்த வெள்ளை அறிக்கையில் இடம் பெற்று இருக்கும்.

மகளிருக்கு ரூ.2500 உரிமைத்தொகை, அரசு பேருந்துகளில் இலவச பயணம், விவசாய கடன்கள் தள்ளுபடி என பல்வேறு வாக்குறுதிகளை விஜய் அறிவித்து இருந்தார். பொருளாதார சார்ந்த இந்த திட்டங்களை அரசின் நிதி நிலையை வைத்தே விரைவாக நிறைவேற்ற முடியும் என்பதால் தமிழக அரசு வெளியிட உள்ள வெள்ளை அறிக்கை முக்கியத்துவம் பெற்றுள்ளது.

English summary

White Paper on Tamil Nadu Financial Status: The Tamil Nadu government will release its much-awaited White Paper on the state's financial condition today at 5.30 PM. Finance Minister Maria Wilson will unveil the report, detailing revenue, expenditure, debt burden and key economic challenges facing the state.