கோவை மக்களுக்கு குட்நியூஸ்.. அவினாசி மேம்பாலத்தில் வரப்போகும் செம வசதி.. என்ன சிறப்பு தெரியுமா?

Published: Friday, February 25, 2022, 18:14 [IST]

Subscribe to Oneindia Tamil

கோவை: கோவை அவினாசி மேம்பால திட்டத்தில் ஏறு, இறங்கு தளம் அமைக்கும் பணி விரைவில் துவங்க உள்ளதாக தகவல்கள் வெளியாகி உள்ளது.

கோவை மாநகர் வேகமாக வளர்ந்து வருகிறது. இந்த கோவை-அவினாசி சாலை மிக முக்கியமானது. இந்த சாலையில் தான் விமான நிலையம், கல்லூரிகள், பள்ளிகள், தொழில் நிறுவனங்கள், வணிக நிறுவனங்கள், டைட்டல் பார்க் உள்ளிட்டவை அமைந்துள்ளன.

சேலம், ஈரோடு, திருப்பூர் உள்ளிட்ட நகரங்களுக்கு செல்லும் முக்கிய வழித்தடமாகவும் இது உள்ளதால் எப்போதும் சாலையில் வாகன நெரிசல் இருக்கும். இதை சரிசெய்ய வேண்டும் என பொதுமக்கள், சமூக ஆர்வலர்கள் கோரிக்கை விடுத்து வந்தனர்.

ரூ.1157 கோடி பணி

இதன் தொடர்ச்சியாக கோவை அவினாசி ரோட்டில் ரூ.1157 கோடி மதிப்பீட்டில் 10 கிலோமீட்டர் தொலைவுக்கு புதிய மேம்பாலம் கட்டும் பணி துவங்கியது. உப்பிலிபாளையம் முதல் 4 இடங்களில் மேம்பால இறங்குதளம், ஏறுதளம் அமைக்கப்பட உள்ளது. குறிப்பாக ஏர்போர்ட் ரோடு, அவினாசி ரோடு, கல்லபட்டி ரோடு சந்திப்புகளில் ஏறு, இறங்கு தளங்கள் அமைக்கப்பட உள்ளது.

சிறப்பு குழு

இதற்கு நிலம் கையகப்படுத்த வேண்டியுள்ளது என கூறப்படுகிறது. இதனால் இந்த பணி இன்னும் தொடங்கப்படவில்லை. இந்நிலையில் நிலம் கையகப்படுத்துவதற்காக நெடுஞ்சாலைத்துறை சார்பில் சிறப்பு குழு அமைக்க உள்ளதாக மாநில அரசு அறிவித்துள்ளது.

20 திட்டங்கள் தாமதம்

இதுபற்றி மாநில நெடுஞ்சாலைத்துறை அதிகாரிகளிடம் கேட்டபோது, ‛‛நகர்புற உள்ளாட்சி தேர்தல் முடிவடைந்துவிட்டது. நிலம் கையகப்படுத்தும் பணிக்கு விரைவில் அதிகாரிகள் நியமிக்கப்பட உள்ளனர். நிலம் கையகப்படுத்துவதில் உள்ள தாமதத்தால் கோவை மாவட்டத்தில் மட்டும் 20 திட்டங்கள் கிடப்பில் உள்ளன. அதிகாரிகள் நியமிக்கப்பட்டவுடன் பணிகள் விரைவாகும்'' என்றார்.

விரைவு நடவடிக்கை தேவை

இதுதொடர்பாக சமூக ஆர்வலர்கள் கூறுகையில், ‛‛அரசு விரைவில் அதிகாரிகளை நியமிக்க வேண்டும். அப்போது தான் மேம்பாலம், சாலை பணிகள் விரைவாக முடியும். நிலம் கையகப்படுத்துவதில் உள்ள பிரச்சனையால் சில பணிகள் தடைப்பட்டுள்ளது. இதன்மூலம் திட்டம் முழுவதும் தாமதமாகலாம். அவினாசி ரோடு மேம்பாலம், மேற்கு பைபாஸ் ரோடு ஆகியவை கோவை நகருக்கான முக்கிய திட்டங்களாக உள்ளன. இதனை விரைவாக நிறைவேற்ற நடவடிக்கை எடுக்க வேண்டும்'' என்றனர்.

Published On February 25, 2022