30 மாதங்களுக்கு பிறகு.. மகளிர் இட ஒதுக்கீடு சட்டம் அமலுக்கு வந்ததாக மத்திய அரசு அறிவிப்பு!

டெல்லி: மகளிர் இட ஒதுக்கீடு சட்டம் அமலுக்கு வருவதாக, மத்திய அரசு நேற்று அரசிதழில் வெளியிட்டிருக்கிறது. இந்த சட்டம் கடந்த 2023ம் ஆண்டு செப்டம்பர் மாதம் நிறைவேற்றப்பட்டிருந்தது. சட்டம் நிறைவேற்றப்பட்டு ஏறத்தாழ, 30 மாதங்களுக்கு பிறகு சட்டம் அமலாவதாக மத்திய அரசு அறிவித்திருக்கிறது.

'நாரி சக்தி வந்தன் அதினியம்' என்று அழைக்கப்படும் இந்த சட்டம், மக்களவை மற்றும் சட்டப்பேரவைகளில் பெண்களுக்கு 33% இடஒதுக்கீட்டை உறுதி செய்கிறது.

ஏப்ரல் 16, 2026 முதல் இந்தச் சட்டம் நடைமுறைக்கு வருவதாக மத்திய சட்ட அமைச்சகம் அறிவித்துள்ளது. 2023 செப்டம்பரில் நாடாளுமன்றத்தில் நிறைவேற்றப்பட்டு குடியரசுத் தலைவரின் ஒப்புதலைப் பெற்றாலும், ஏறத்தாழ 30 மாதங்களுக்குப் பிறகே தற்போது இது நடைமுறைக்குக் கொண்டுவரப்பட்டுள்ளது.

இதில் கவனிக்க வேண்டிய விஷயம் என்னவெனில், நாடாளுமன்றத்தில் தற்போது தொகுதி மறுவரையறை (Delimitation) மற்றும் இடஒதுக்கீட்டை 2029-லேயே அமல்படுத்துவதற்கான புதிய சட்டத் திருத்த மசோதாக்கள் விவாதிக்கப்பட்டு வரும் சூழலில், இந்த அறிவிப்பு வெளியாகியுள்ளது. பழைய சட்டத்தின்படி மக்கள் தொகை கணக்கெடுப்புக்குப் பிறகே (2034-ல்) இடஒதுக்கீடு சாத்தியம் என்றிருந்த நிலையை மாற்றி, 2029 பொதுத்தேர்தலிலேயே 33% இடஒதுக்கீட்டை உறுதி செய்ய அரசு திட்டமிட்டுள்ளது.

இதற்காக தற்போது மக்களவையில் மூன்று மசோதாக்களை அரசு கொண்டு வந்துள்ளது. தற்போதைய அரசிதழ் அறிவிப்பின் மூலம், இந்தச் சட்டத்தை அரசு முறையாகச் செயல்பாட்டிற்குக் கொண்டு வந்துள்ளது. இருப்பினும், ஒதுக்கப்பட்ட இடங்களை நிர்ணயிக்கும் தொகுதி மறுவரையறைப் பணிகள் நிறைவடைந்த பின்னரே, இச்சட்டத்தை நடைமுறையில் முழுமையாகச் செயல்படுத்த முடியும் என்ற நிலை தொடர்கிறது.

ஒரு சட்டத்தைத் திருத்துவது குறித்த ஆலோசனைகள் நடைபெற்றுக்கொண்டிருக்கும்போதே, அச்சட்டத்தை அமலுக்குக் கொண்டு வருவது நடைமுறை சார்ந்த மற்றும் அரசியல் ரீதியான கேள்விகளை எழுப்புவதாகக் கூறி, எதிர்க்கட்சித் தலைவர்கள் இந்த அறிவிப்பு வெளியான நேரத்தை விமர்சித்துள்ளனர்.

மறுபுறம், ஒரு சட்டம் நாடாளுமன்றத்தில் நிறைவேற்றப்பட்ட பிறகு, அதனைத் தொடர்ந்து மேற்கொள்ளப்படும் ஒரு வழக்கமான சட்ட நடைமுறைதான் இந்த அறிவிப்பு என்று மத்திய அரசு விளக்கம் அளித்துள்ளது.

English summary

The Central Government issued a gazette notification yesterday stating that the Women's Reservation Act has come into force. This Act was passed in September 2023. The Central Government has announced that the Act is being implemented approximately 30 months after its enactment.