குட் நியூஸ்.. டெல்டா வைரசுக்கு எதிராக ஜான்சன் & ஜான்சன் தடுப்பூசி செயல்திறன் மிக்கது.. ஆய்வில் உறுதி

Updated: Friday, July 2, 2021, 14:44 [IST]

Subscribe to Oneindia Tamil

டெல்லி: அமெரிக்காவின் ஜான்சன் அண்ட் ஜான்சன் நிறுவனம் தயாரித்துள்ள தடுப்பூசி டெல்டா வகை கொரோனா வைரசுக்கு எதிராக வீரியத்துடன் செயல்படும் என ஆய்வில் தெரியவந்துள்ளது.

கடந்த 2019-ம் ஆண்டின் இறுதியில் சீனாவில் தோன்றிய கொரோனா வைரஸ் இன்னும் இந்த பூமியை விட்டு செல்ல மறுத்து வருகிறது. கொரோனா வைரசின் உருவம் தொடர்ந்து உருமாறி வருவதே இதற்கு காரணமாகும்.

இந்தியாவில் கொரோனா வைரஸின் இரண்டாவது அலைக்கு டெல்டா வைரஸ் மாறுபாடே காரணம் என்று புள்ளி விவரங்கள் தெளிவாக காட்டுகின்றன.

டெல்டா வைரஸின் ஆபத்து

டெல்டா வைரஸ் வரும் வாரங்களில் அமெரிக்காவில் ஆபத்தை உண்டாக்க கூடும் என்றும் 2019 ஆம் ஆண்டின் பிற்பகுதியில் சீனாவின் வுஹானில் முதன்முதலில் தோன்றிய அசல் வைரஸை விட டெல்டா வைரஸ் கணிசமாக அதிக அளவில் பரவக்கூடியவை என்பதை ஆய்வுகள் நிரூபித்துள்ளன என்று மருத்துவ ஆராய்ச்சியாளர்கள் எச்சரித்துள்ளனர்.

ஜான்சன் அண்ட் ஜான்சன் தடுப்பூசி

எனவே கொரோனா தடுப்பூசி நிறுவனங்கள் தங்களது தடுப்பு மருந்துகள் டெல்டா வைரசுக்கு எதிரான நோய் எதிர்ப்பு சக்தியை உருவாக்குகிறதா? என தீவிர சோதனையில் ஈடுபட்டு வருகின்றன. இந்த நிலையில் அமெரிக்காவின் ஜான்சன் அண்ட் ஜான்சன் நிறுவனம் தயாரித்துள்ள தடுப்பூசி டெல்டா வகை கொரோனா வைரசுக்கு எதிராக அதிக வீரியத்துடன் செயல்பட்டு வருவதாக அந்த நிறுவனம் கூறியுள்ளது.

நீடித்த பாதுகாப்பு

டெல்டா வைரஸ் மாதிரிகளை கொண்டு சோதனை செய்ததில் டெல்டா வைரசுக்கு எதிரான ஜான்சன் அண்ட் ஜான்சன் தடுப்பூசியின் நோய் எதிர்ப்பு திறன் 8 மாதங்கள் வரை நீடிப்பதாக தெரியவந்துள்ளது. ஜான்சன் அன்ட் ஜான்சனின் ஒற்றை டோஸ் தடுப்பூசி வேகமாக பரவும் டெல்டா மாறுபாட்டை நடுநிலையாக்குகிறது மற்றும் தொற்றுநோய்க்கு எதிராக நீடித்த பாதுகாப்பை மிக அதிக அளவில் வழங்குகிறது என்றும் அந்த நிறுவனம் தெரிவித்துள்ளது.

இந்தியாவுக்கு வருமா?

அமெரிக்காவின் ஜான்சன் அண்ட் ஜான்சன் நிறுவனம் தயாரித்துள்ள தடுப்பூசியின் அவசரகால பயன்பாட்டுக்கு அமெரிக்கா உள்ளிட்ட நாடுகள் அனுமதி அளித்துள்ளன. இது டோஸ் மட்டுமே போடக்கூடிய வகையிலான தடுப்பூசியாகும். இந்தியாவில் டெல்டா வைரஸ் அச்சுறுத்தல் அதிகம் உள்ள நிலையில் இங்கு ஜான்சன் அண்ட் ஜான்சன் தடுப்பூசியை கொண்டு வருவதற்கான முயற்சியில் அந்த நிறுவனம் தீவிரமாக ஈடுபட்டுள்ளது.