இன்றைய போட்டியில் 'இந்த விஷயம்' நடந்தால்.. மும்பை இந்தியன்ஸ் பிளே ஆப் போக முடியும்.. செம ட்விஸ்ட்

துபாய்: நடப்பு ஐபிஎல் சாம்பியன் மும்பை இந்தியன்ஸ் பிளே ஆப் சுற்றுக்குள் போக இப்போது கூட ஒரு சான்ஸ் இருக்கிறது. ஆனால் அது மணலை கயிறாக திரிப்பதை போல கடுமையான டாஸ்க்.

இப்போதைக்கு பிளே ஆப் செல்ல உறுதி செய்யப்பட்ட அணிகள் என்றால், டெல்லி கேபிடல்ஸ், சிஎஸ்கே, ஆர்சிபி ஆகியவைதான்.

நேற்று ராஜஸ்தானை கொல்கத்தா நைட் ரைடர்ஸ் 86 ரன்கள் வித்தியாசத்தில் அபாரமாக வென்றதன் மூலம், கிட்டத்தட்ட பிளே ஆப் சுற்றுக்குள் செல்வதை கேகேஆர் உறுதி செய்து விட்டது.

கொல்கத்தா செல்வது இன்று உறுதியாகும்

இருப்பினும் இன்று நடைபெற உள்ள மும்பை இந்தியன்ஸ் மற்றும் ஹைதராபாத் அணிகள் இடையேயான போட்டியின் ரிசல்ட்டை வைத்துதான் அது உறுதியாகும். மும்பை இந்தியன்ஸ் இப்போது 13 போட்டிகளில் ஆடி 12 புள்ளிகளுடன் உள்ளது. அதாவது 6 போட்டிகளில் வென்றுள்ளது.

மும்பை நிலவரம்

இன்றைய போட்டியில் வென்றால் 14 புள்ளிகள் கிடைக்கும். கொல்கத்தாவும் 14 போட்டிகள் முடிவில் 14 புள்ளிகளோடுதான் உள்ளது. ஆனால் கொல்கத்தா ரன் ரேட், பிளஸ் பூஜ்யம் புள்ளி 587 என்ற அளவுக்கு அதிகமாக உள்ளது. டெல்லி, சென்னையை விடவும் ரன் ரேட் அதிகம்.

என்ன கண்டிஷன்

மும்பை இந்தியன்ஸ் ரன் ரேட், மைனஸ் பூஜ்யம் புள்ளி 048 என்ற அளவில் உள்ளது. வென்றாலும் கூட ரன் ரேட்டில் கேகேஆரை விட அதிகமாக போக வேண்டிய நிலையில் மும்பை உள்ளது. அதற்கு ஒரு வழிதான் உள்ளது. மும்பை முதலில் பேட் செய்து, முடிந்த அளவுக்கு அதிக ரன்களை குவிக்க வேண்டும். அது 250 ரன்களாக இருந்தால் ரொம்ப மகிழ்ச்சி. பிறகு பேட் செய்யும் ஹைதராபாத்தை மிக குறைந்த ரன்களில் மடக்க வேண்டும். அதாவது 170 ரன்களுக்கும் மேல் வித்தியாசத்தில் வெற்றி காண வேண்டும். இது இமாலய இலக்கு.

டாஸ் முக்கியம்

அதேநேரம், 2வது பேட் செய்தாலோ, ஹைதராபாத்தை 3 ஓவர்களுக்குள் மும்பை சேஸ் செய்தாக வேண்டும். அதுவும் நடக்காத விஷயம். எனவே ஒருவேளை டாஸ் போடும்போது மும்பைக்கு முதலில் பேட்டிங் செய்ய வாய்ப்பு கிடைக்காவிட்டால், அப்போதே, பிளே ஆப் போகப்போவதில்லை என்று அவர்கள் முடிவு செய்து விடலாம்.

English summary

Current IPL champions Mumbai Indians now have a chance to enter in to the play-off round. But it’s as tough a task as twisting the sand into a rope.