கோவா சுற்றுலாத் துறையை பிரபலப்படுத்த சச்சின், கரீனா, தீபிகா தேவையில்லை: அமைச்சர் திலிப்

பனாஜி: கோவா மாநில சுற்றுலாத் துறையை பிரபலப்படுத்த சச்சின் டெண்டுல்கர், தீபிகா படுகோனே, கரீனா கபூர் கான் மற்றும் சைப் அலி கான் ஆகியோரை பிராண்ட் அம்பாசிடர்களாக நியமிக்க வேண்டிய தேவை இல்லை என்று அம்மாநில சுற்றுலாத்துறை அமைச்சர் திலிப் பாருலேகர் தெரிவித்துள்ளார்.

பல்வேறு மாநிலங்கள் தங்கள் மாநிலத்தின் சுற்றுலாத் துறை பிராண்ட் அம்பாசிடர்களாக பிரபல நடிகர், நடிகைகளை நியமித்து வருகின்றன. எடுத்துக்காட்டாக குஜராத் மாநில சுற்றுலாத் துறை பிராண்ட் அம்பாசிடராக பாலிவுட் நடிகர் அமிதாப் பச்சன் உள்ளார்.

இந்நிலையில் கோவா மாநில சுற்றுலாத் துறை பிராண்ட் அம்பாசிடர் பதவிக்கு சச்சின் டெண்டுல்கர், இந்தி நடிகைகள் கரீனா கபூர் கான், தீபிகா படுகோனே மற்றும் நடிகர் சைப் அலி கான் ஆகியோரின் பெயர்களை மார்க்கெட்டிங் நிறுவனங்கள் பரிந்துரைத்தன. ஆனால் சுற்றுலாத் துறையோ அந்த பரிந்துரைகளை நிராகரித்துள்ளது.

இது குறித்து கோவா மாநில சுற்றுலாத் துறை அமைச்சர் திலிப் பாருலேகர் கூறுகையில்,

கோவாவை பிரபலப்படுத்த எந்த பிரபலமும் பிராண்ட் அம்பாசிடராக்கப்பட வேண்டிய தேவை இல்லை. சுற்றுலாப்பயணிகள் தானாகவே கோவாவை தேர்வு செய்வார்கள். ஏனென்றால் எங்கள் இமேஜ் அப்படி. கோவாவே ஒரு பிரபலம் தான் என்றார்.

English summary

Sachin Tendulkar, Deepika Padukone, Kareena Kapoor and Saif Ali Khan, all queued up to become brand ambassadors for Goa but the state does not need any star power to promote itself, Tourism Minister Dilip Parulekar told reporters.