பல பெண்களுடன் தொடர்புள்ளது.. சட்டசபைக்குள்ளேயா ஆடினேன்.. அம்பரீஷின் "அடடே" பேச்சு!
பெங்களூரு: கர்நாடகாவில் நடன கிளப்பில் இளம் பெண்ணுடன் ஆட்டம் போட்ட நடிகர் அம்பரீஷுக்கு எதிர்ப்புகள் தொடரும் நிலையில் அவரும் காட்டமாக பதிலடி கொடுத்துள்ளார்.
கன்னட திரையுலகின் சூப்பர்ஸ்டாரான அம்பரீஷ் தற்போது கர்நாடகத்தில் வீட்டு வசதி துறை அமைச்சராக பொறுப்பு வகிக்கிறார். இந்த நிலையில் அம்பரீஷ் பெங்களூரில் நடன கிளப்புக்கு சென்று சர்ச்சையில் சிக்கியுள்ளார். நடன கிளப்பில் இளைஞர்கள், இளம்பெண்கள் பலர் இருந்தனர். பலர் போதையில் ஆட்டம் போட்டுக் கொண்டு இருந்தார்கள். அந்த கிளப்புக்கு அம்பரீஷ் ஜீன்ஸ், டீசர்ட் அணிந்து திடீரென சென்றார்.
அங்கு ஒரு இளம்பெண்ணை கட்டிப்பிடித்தப்படி நடனம் ஆடினார். அந்த பெண்ணுக்கு எல்லோரது முன்னிலையிலும் முத்தமும் கொடுத்தார். இதனை கிளப்பில் இருந்தவர்கள் ஆச்சரியமாய் பார்த்தார்கள். இளம் பெண்ணுடன் அவர் ஆடிய படங்கள் இன்டர்நெட்டில் பரவி பரபரப்பை ஏற்படுத்தி உள்ளன. அவர் மீது நடவடிக்கை எடுக்கும்படி காங்கிரஸ் மேலிடத்துக்கும் கடிதங்கள் அனுப்பப்பட்டு உள்ளன.
ஆனால் அம்பரீஷின் மனைவி சுமலதா இதுகுறித்து விளக்குகையில், அப்பெண் அம்பரீஷின் நண்பரின் மகள்தான். அது பழைய போட்டோ என்று கூறியிருந்தார்.
இந்த நிலையில் அம்பரீஷ் இப்போது விளக்கம் கொடுத்துள்ளார். இதுகுறித்து அவர் கூறுகையில், நான் ஒரு நடிகன். சினிமாவில் நிறைய பெண்களோடு நடனம் ஆடி இருக்கிறேன். சட்டசபைக்குள் ஆடவில்லையே.
நிறைய பெண்களுடன் எனக்கு தொடர்பு உள்ளது. பெண்களுடன் நடனம் ஆடுவது புதிதில்லை. எந்த பெண்ணும் புகார் அளிக்காத நிலையில் என்மேல் குற்றம் சாட்டுவது வியப்பாக உள்ளது'' என்றார்.
அம்பரீஷுக்கு சமீபத்தில் உடல்நலக்குறைவு ஏற்பட்ட போது கர்நாடக அரசு சிங்கப்பூருக்கு அனுப்பி மருத்துவ சிகிச்சைக்கு ஏற்பாடு செய்தது. மருத்துவ சிகிச்சைக்கான ரூபாய் 1.22 கோடி செலவையும் அரசே ஏற்றது என்பது குறிப்பிடத்தக்கது.
Click it and Unblock the Notifications
Sign in with Google