மோடி டீ விற்றவர் அல்ல... காண்டிராக்டர்: அடுத்த 'ஐடியாவுக்கு' எடுத்துக் கொடுக்கும் காங்.

அகமதாபாத்: பாஜகவின் பிரதமர் வேட்பாளர் நரேந்திர மோடி டீ விற்பனையாளர் அல்ல; உணவக ஒப்பந்ததாரர் தான் என காங்கிரஸ் புதிய விளக்கமொன்றை அளித்துள்ளது.

பாரதீய ஜனதா பிரதமர் வேட்பாளரும் குஜராத் முதல்வருமான நரேந்திர மோடியை, காங்கிரஸ் தலைவர்கள் சிலர் டீ வியாபாரி என விமர்சனம் செய்ததால் பல்வேறு சர்ச்சைகள் எழுந்தன. அதன் தொடர்ச்சியாக காங்கிரஸின் தாக்குதலையே தங்களது அஸ்திரமாகப் பயன்படுத்தி நாடாளுமன்றத் தேர்தல் பிரச்சாரத்தில் ஈடுபடத் தொடங்கியது பாஜக.

இதையடுத்து எதிர்கட்சி தலைவர்களை தனிப்பட்ட முறையில் தாக்கி பேச கூடாது என உத்தரவிட்டார் காங்கிரஸ் துணைத்தலைவர் ராகுல் காந்தி.

இந்நிலையில், மோடி ஒரு டீ விற்பனையாளர் அல்ல என்றும் அவர் உணவக ஒப்பந்ததாரர் என விளக்கமளித்துள்ளது காங்கிரஸ். காங்கிரஸ் தலைவர் சோனியா காந்தியின் அரசியல் ஆலோசகர் அகமது படேல், குஜராத் மாநிலம் அகமதாபாத்தில் நடைபெற்ற ஒரு பேரணியில் கலந்து கொண்ட போது இவ்வாறு தெரிவித்துள்ளார்.

அகமது படேல் தனது உரையில் மோடியின் பெயரை நேரடியாகத் தெரிவிக்காமல் மறைமுகமாகத் தாக்கி இவ்வாறு குறிப்பிட்டுள்ளார். மேலும், தேர்தல் வந்தால் மட்டுமே சிலருக்கு தலைவர்கள் ஞாபகமும், பக்தியும் நினைவுக்கு வரும் எனவும் அவர் கூறியுள்ளார்.

English summary

Escalating the war of words over Narendra Modi's humble background as a 'chaiwala', Congress today said BJP's PM candidate, who often flaunts his past to connect with voters, was never a tea vendor but a "canteen contractor".