ஆசிட் வீச்சால் பாதிக்கப்பட்ட பெண்ணுக்கு நடிகர் விவேக் ஓபராய் அளித்த பரிசு என்ன தெரியுமா?

ஆசிட் வீச்சால் பாதிக்கப்பட்ட பெண்ணின் திருமணத்துக்கு நடிகர் விவேக் ஓபராய் புதுமணத் தம்பதிக்கு அடுக்குமாடி குடியிருப்பை பரிசாக அளித்துள்ளார்.

லக்னோ: குடும்ப பகை காரணமாக ஆசிட் வீச்சுக்கு ஆளான பெண்ணுக்கு திருமண பரிசாக அடுக்கு மாடி குடியிருப்பை பரிசாக அளித்துள்ளார் நடிகர் விவேக் ஓபராய்.

உத்தரப்பிரதேச மாநிலத்தைச் சேர்ந்தவர் லலிதா பென்பாஸி (26). கடந்த 2012-ஆம் ஆண்டு குடும்ப தகராறு காரணமாக இந்த பெண்ணின் உறவினர்கள் சிலர் இவர் முகத்தில் ஆசிட் வீசினர். இதனால் லலிதாவின் முகம் முழுவதும் கருகிவிட்டது. இதையடுத்து அவருக்கு 17 அறுவை சிகிச்சைகள் செய்யப்பட்டன.

இருந்தாலும் தன்னம்பிக்கையுடன் வாழ்ந்து வந்த லலிதா கடந்த சில மாதங்களுக்கு முன்னர் ஒரு இளைஞருக்கு ராங் கால் செய்துள்ளார். இதனால் மறுமுனையில் பேசிய ராகுல் (27) என்ற இளைஞருடன் நட்பு ஏற்பட்டது. இந்த நட்பு நாளடைவில் காதலாக மாறியது.

தனக்கு நேர்ந்த விஷயங்களை ராகுலிடம் லலிதா மனதிறந்தார். லலிதாவின் வெளியழகு இல்லாவிட்டாலும் அவரது நல்ல மனதை பார்த்து அவரை திருமணம் செய்ய முடிவு செய்தார். இவர்களது திருமணம் நேற்று நடைபெற்றது. இவர்களது காதலை அறிந்த பல்வேறு பாலிவுட் நட்சத்திரங்கள் இவர்களது திருமணத்துக்கு பணஉதவி செய்தனராம்.

இதற்கும் மேலாக, லலிதா- ராகுல் திருமணத்தில் நடிகர் விவேக் ஓபராய் நேரடியாக கலந்து கொண்டார். அப்போது அவர்களுக்கு திருமண பரிசாக அடுக்குமாடி குடியிருப்பை விவேக் ஓபராய் வழங்கினார்.

English summary

Actor Vivek Oberoi gifted a house to acid attack survivor Lalita Benbansi as her wedding gift.