கிரிப்டோ பற்றி அவ்வளவு பேசிவிட்டு.. பிட்காயின்களை சத்தமின்றி விற்ற எலான் மஸ்க்.. என்ன நடந்தது?

நியூயார்க்: பிட்காயின் மீதான 75 சதவிகித பங்குகளை உலகின் மிகப்பெரும் பணக்காரரான எலான் மஸ்க்கின் டெஸ்லா நிறுவனம் விற்றுவிட்டதாக தெரிவித்துள்ளது. முன்னதாக டெஸ்லா சுமார் 1.5 பில்லியன் அமெரிக்க டாலர் அளவுக்கு பிட்காயினில் முதலீடு செய்திருந்தது. இந்நிலையில் 936 மில்லியன் அமெரிக்க டாலர் அளவிலான பங்கை விற்றுள்ளதாக தெரிவித்துள்ளது.

பிட்காயின் என்பது மின்னணு பணமான கிரிப்டோகரன்சி வகைகளில் ஒன்றும், உலகளாவிய பண செலுத்துகை முறையுமாகும்.

பிட்காயின்

தற்போது உலகம் முழுவதும் உள்ள ஒரு லட்சத்துக்கும் மேற்பட்ட பல்பொருள் அங்காடி தொடர்கள் மற்றும் வணிக வளாகங்களில் பிட்காயின்கள் ஏற்றுக்கொள்ளப்படுகின்றன. பிட்காயின்கள் மூலம் மேற்கொள்ளப்படும் அனைத்து பரிமாற்றங்களும் 'பிளாக்செயின்' என்னும் பாதுகாப்பு வழிமுறையில் மேற்கொள்ளப்படுகிறது. இந்த நிலையில் டெஸ்லா நிறுவனம் பிட்காயினை வணிகத்திற்கு ஏற்றுக்கொள்வதாக அறிவித்தது. இதனால் ஏற்கெனவே அதிகரித்திருந்த பிட்காயின் மதிப்பு மேலும் உயரத் தொடங்கியது.

இரண்டாம் காலாண்டு

இதனைத்தொடர்ந்து தற்போது அந்நிறுவனம் இரண்டாம் காலாண்டின் நிதி தொடர்பான அறிக்கையை வெளியிட்டது. அதில் மேற்குறிப்பிட்டவாறு பிட்காயின் மீதான பங்குகளில் சுமார் 75 சதவிகிதத்தை விற்றுவிட்டதாக டெஸ்லா அறிவித்துள்ளது. அதேபோல கடந்த காலாண்டில் இதன் டிஜிட்டல் சொத்து மதிப்பு 1.2 பில்லியன் அமெரிக்க டாலர்களாக இருந்த நிலையில் நடப்பு காலாண்டில் அது 218 மில்லியன் அமெரிக்கா டாலராக குறைந்துள்ளது என்பதை டெஸ்லா அறிக்கையில் தெளிவுப்படுத்தியுள்ளது.

விற்பனை

கொரோனா பெருந்தொற்றால் ஏற்பட்ட தொழில் முடக்கம், விற்பனை சந்தையில் மந்தம் உள்ளிட்டவை காரணமாக ஏற்பட்டுள்ள இழப்புகளை எதிர்கொள்ளவே இவ்வாறு பங்குகளை விற்பனை செய்துள்ளதாக டெஸ்லா விளக்கமளித்துள்ளது. ஏற்கெனவே கடந்த ஆண்டு வாங்கப்பட்ட 1.5 பில்லியன் அமெரிக்க டாலர் அளவிலான பிட்காயினில் சுமார் 10 சதவிகிதத்தை அப்போதே விற்றுவிட்டதாக நிறுவனம் அறிவித்திருந்தது. ஆனால் இப்போது பிட்காயினின் மதிப்பு ஓரளவு குறையத் தொடங்கிய காலத்தில் இந்த 75 சதவிகித விற்பனை நடைபெற்றுள்ளது.

ஏன்?

முன்னதாக கடந்த நவம்பரில் பிட்காயின் விலையானது முன்னெப்போதும் இல்லாத அளவான 69,000 அமெரிக்க டாலர் என அதிகரித்தது. ஆனால் தற்போது இதன் மதிப்பு 19-22 ஆயிரம் அமெரிக்க டாலர் என்கிற அளவில்தான் உள்ளது. அதேபோல தாங்கள் எந்த டோஜ்காயின்களையும் விற்கவில்லை என்று டெஸ்லா தெளிவுபடுத்தியுள்ளது. டோஜ்காயின் என்பது ஒரு வகையான கிரிப்டோ கரன்சியாகும். பிட்காயின்களுக்கே எப்போதும் அதிக மதிப்பு இருப்பதால் இந்த டோஜ்காயின்கள் குறித்து பலருக்கு தெரிந்திருக்க வாய்ப்பில்லை.

English summary

World's richest man Elon Musk's Tesla has reportedly sold 75 percent of its stake in Bitcoin. Previously, Tesla had invested around USD 1.5 billion in Bitcoin. In this case, it has sold 936 million US dollars worth of shares.