புதுவையில் 3 கட்டமாக உள்ளாட்சி தேர்தல்.. புதிய அட்டவணையை வெளியிட்ட தேர்தல் ஆணையம்!

புதுச்சேரி: புதுச்சேரியில் உள்ளாட்சி தேர்தல் நடத்துவதற்கான புதிய கால அட்டவணையை தேர்தல் ஆணையம் வெளியிட்டுள்ளது. நவம்பர் 02, 07, 13 ஆகிய தேதிகளில் மூன்று கட்டங்களாக தேர்தல் நடைபெறும் என தெரிவிக்கப்பட்டுள்ளது.

புதுச்சேரியில் உள்ளாட்சித் தேர்தல் நடத்த கடந்த 22--ம் தேதி தேர்தல் ஆணையம் அட்டவணையை வெளியிட்டது. தொகுதி மறுசீரமைப்பில் குளறுபடிகள் உள்ளதாக இதனை எதிர்த்து நீதிமன்றத்தில் வழக்கு தொடுக்கப்பட்டது.

புதிய அட்டவணை

இந்த வழக்கு விசாரணையால் தேர்தல் தள்ளி வைக்கப்பட்டது. மேலும் ஐந்து தினங்களுக்குள் புதிய கால அட்டவணையை வெளியிடுமாறு சென்னை உயர்நீதிமன்றம் உத்தரவிட்டிருந்தது. அதன்படி புதிய தேர்தல் நடத்துவதற்கான கால அட்டவணையை புதுச்சேரி தேர்தல் ஆணையம் இன்று வெளியிட்டுள்ளது.

மூன்று கட்டங்களாக தேர்தல்

அதன்படி வருகின்ற நவம்பர் மாதம் 02, 07, 13 ஆகிய தேதிகளில் மூன்று கட்டங்களாக உள்ளாட்சித் தேர்தல் நடைபெறும் என அறிவிக்கப்பட்டுள்ளது. முதற்கட்ட தேர்தல் 02-11-2021 அன்று நடைபெற உள்ளது. 11-10-2021 அன்று வேட்பு மனுத்தாக்கல் தொடங்குகிறது. 18-10-2021 அன்று வேட்புமனு தாக்கல் கடைசி நாளாகும். 20-10-2021 அன்று வேட்புமனு பரிசீலனை செய்யப்படும். 22-10-2021-க்குள் வேட்புமனுக்களை திரும்ப பெற வேண்டும்.

வேட்பு மனுத்தாக்கல்

இரண்டாம் கட்ட தேர்தல் 07-11-2021 அன்று நடைபெற உள்ளது. 15-10-2021 அன்று வேட்பு மனுத்தாக்கல் தொடங்குகிறது. வேட்புமனு தாக்கல் செய்ய கடைசி நாள் 22-10-2021 ஆகும். வேட்புமனு பரிசீலனை 25-10-2021 அன்று நடைபெறும். 27-10-2021-க்குள் வேட்புமனுக்களை திரும்ப பெறுதல் வேண்டும். மூன்றாம் கட்ட தேர்தல் 13-11-2021 அன்று நடைபெற இருக்கிறது.

வாக்கு எண்ணிக்கை நாள்

வேட்பு மனுத்தாக்கல் தொடக்க நாள் 22-10-2021 ஆகும். கடைசி நாள் 29-10-2021 ஆகும். 02-11-2021-க்குள் வேட்புமனுக்களை திரும்ப பெறுதல் வேண்டும். மூன்று கட்ட தேர்தலில் பதிவான வாக்குகள் 17-11-2021 அன்று நடைபெறும் என அறிவிப்பு வெளியிடப்பட்டுள்ளது.

நன்னடத்தை விதிமுறைகள்

காலை 7 மணி முதல் மாலை 6 மணி வரை வாக்குப்பதிவு நடைபெறும் எனவும், மாலை 5 மணி முதல் 6 மணி வரை கொரோனா நோயால் பாதிக்கப்பட்டவர்கள் வாக்களிக்கலாம் என தேர்தல் ஆணையம் அறிவித்துள்ளது. தேர்தல் தேதி அறிவிக்கப்பட்ட இன்று முதல் தேர்தல் நன்னடத்தை விதிமுறைகள் அமலுக்கு வந்துள்ளதாக அறிவிக்கப்பட்டுள்ளது.

English summary

Puducherry local body elections are tobe held in 3 phases. The Election Commission has released a new timetable. Electoral code of conduct has come into force there