தலைவிகளின் அதிகாரத்தில் கணவர்கள் மூக்கை நுழைத்தால்.. அவ்வளவுதான்.. அமைச்சர் பெரியகருப்பன் வார்னிங்!

Published: Sunday, September 4, 2022, 11:44 [IST]

Subscribe to Oneindia Tamil

சிவகங்கை: ஊராட்சி மற்றும் ஒன்றிய நிர்வாகத்தில் தலைவிகளின் கணவன்கள் மூக்கை நுழைக்கக் கூடாது என ஊரக வளர்ச்சித்துறை அமைச்சர் பெரியகருப்பன் எச்சரிக்கை விடுத்துள்ளார்.

ஊராட்சி மன்ற தலைவியின் கணவரோ அல்லது அவரது உறவினரோ பஞ்சாயத்து நிர்வாகத்தில் தலையிட்டால் நடவடிக்கை கடுமையாக இருக்கும் என அறிவுறுத்தியுள்ளார்.

கவுன்சிலர்கள் தவறு செய்தால் பதவி பறிக்கப்படும் என 2 நாட்களுக்கு முன்னர் நகர்ப்புற வளர்ச்சி மற்றும் நகராட்சி நிர்வாகத்துறை அமைச்சர் கே.என்.நேரு எச்சரிக்கை விடுத்திருந்த நிலையில் அமைச்சர் பெரியகருப்பன் இந்த எச்சரிக்கையை விடுத்திருக்கிறார்.

கணவன்கள் தலையீடு

கவுன்சிலர், ஊராட்சி மன்றத் தலைவர், ஒன்றியக் குழுத் தலைவர், என பெண்கள் உள்ளாட்சி அமைப்புகளில் பல்வேறு முக்கிய பொறுப்புகளை வகித்து வரும் நிலையில் அமைச்சர் பெரியகருப்பன் முக்கிய எச்சரிக்கை ஒன்றை விடுத்திருக்கிறார். பெண் தலைவர்கள் மற்றும் கவுன்சிலர்களின் அதிகாரத்தில் அவர்களின் கணவர்கள் எக்காரணத்தை கொண்டும் தலையிடக் கூடாது என மிக கறாராக தெரிவித்திருக்கிறார்.

அமைச்சர் எச்சரிக்கை

உள்ளாட்சி மன்றங்களில் உள்ள பெண்கள் அதிகாரத்தில் அவர்களது கணவர்களோ, உறவினர்களோ தலையிட சட்டத்தில் விதி இல்லை என்பதை திட்டவட்டமாக தெரிவித்துள்ளார் அமைச்சர் பெரியகருப்பன். பெண் பிரதிநிதிகளுக்கு பதிலாக அவர்களது உறவினர்கள் அதிகாரத்தில் மூக்கை நுழைப்பதாக புகார் வந்தால் நடவடிக்கை கடுமையாக இருக்கும் என எச்சரித்துள்ளார்.

பெண் அதிகாரம்

பெண்களுக்கும் அதிகாரம் வழங்கப்பட வேண்டும் என்ற காரணத்துக்காக தான் மகளிர் இட ஒதுக்கீடே கொண்டுவரப்பட்டது என்பதை அமைச்சர் பெரியகருப்பன் விளக்கியுள்ளார். இதனிடையே பெண் எம்.எல்.ஏ.க்களின் அதிகாரமும் தமிழகத்தில் கேள்விக்குறியாக இருப்பது கவனிக்கத்தக்கது. பல தொகுதிகளிலும் பெண் எம்.எல்.ஏ.வாக இருப்பவர்களின் மகன், கணவர், ஆகியோர் தான் நிழல் எம்.எல்.ஏ.வாக வலம் வருகின்றனர்.

2 அமைச்சர்கள்

நகர்ப்புறம் மற்றும் ஊரகம் ஆகிய இரண்டு அமைப்புகளிலும் உள்ளாட்சி மன்ற பிரதிநிதிகளின் செயல்பாடுகளை அமைச்சர்கள் நேருவும், பெரியகருப்பனும் தீவிரமாக கண்காணித்து வருகின்றனர். இதனால் கடந்த காலங்களை போல் நினைத்ததை எல்லாம் செய்ய முடியாத சூழல் உள்ளாட்சி மன்ற பிரதிநிதிகளுக்கு ஏற்பட்டுள்ளது.

Published On September 4, 2022