பெருந்தலைகளுடன் தஞ்சாவூர் களத்தை சந்திக்கும் அதிமுக- வேட்பாளர்கள் பயோடேட்டா
எம்.ஜி.எம். சுப்பிரமணியன்
திருவையாறு தொகுதி அதிமுக வேட்பாளராக எம்.ஜி.எம். சுப்பிரமணியன் (வயது 67) அறிவிக்கப்பட்டுள்ளார். இவர் 1980-1984-ல் திருவையாறு தொகுதி எம்.எல்.ஏ.வாக இருந்தவர். 2002-ல் தஞ்சாவூர் மாவட்ட செயலராக இருந்தார். தற்போது திருவையாறு தொகுதி கழகச் செயலராக இருக்கிறார்.
வைத்திலிங்கம்
ஒரத்தநாடு தொகுதி அதிமுக வேட்பாளராக அமைச்சர் வைத்திலிங்கம் (வயது 60) களமிறக்கப்பட்டுள்ளார். 2001, 2006, 2011 தேர்தலில் ஒரத்தநாடு தொகுதியில் போட்டியிட்டு எம்.எல்.ஏ.வானார். 2001-2006-ல் தொழில்துறை, ஊரகத்தொழில்துறை, வனத்துறை அமைச்சராகவும் 2011-16ல் வீட்டு வசதி, நகர்ப்புற வளர்ச்சி, வேளாண்துறை அமைச்சராகவும் பதவி வகித்தவர். 2003-ம் ஆண்டு முதல் தஞ்சை தெற்கு மாவட்ட செயலராக இருந்து வருகிறார்.
எம். ரெங்கசாமி
தஞ்சாவூர் தொகுதி அதிமுக வேட்பாளராக சிட்டிங் எம்.எல்.ஏ. ரெங்கசாமி (வயது 60) நிறுத்தப்பட்டுள்ளார். அத்துடன் சட்டசபை பொது நிறுவனங்கள் குழு உறுப்பினராகவும் உள்ளார்.
சேட்டு
திருவிடைமருதூர் தொகுதி அதிமுக வேட்பாளராக யு. சேட்டு (வயது 50) நிறுத்தப்பட்டுள்ளார். 1991-ல் அதிமுகவில் இணைந்தவர் இவர். முள்ளுக்குடி கிளை கழக பிரதிநிதி, தஞ்சாவூர் வடக்கு மாவட்ட எம்.ஜி.ஆர். மன்ற துணைச் செயலர் என பதவிகளை வகித்தவர்.
ரத்னா
தஞ்சாவூர் மாவட்டம் கும்பகோணம் அதிமுக வேட்பாளராக போட்டியிடும் எஸ்.ரத்னா ஏற்கெனவே அறிவிக்கப்பட்ட ராம.ராமநாதன் மாற்றப்பட்டு அவருக்குப் பதிலாக புதிய வேட்பாளராக அறிவிக்கப்பட்டவர். ரத்னா, கும்பகோணம் நகராட்சித் தலைவர். கும்பகோணம் மகாமகத்தை திறம்பட செய்து முடித்த ரத்னாவிற்கு பரிசாக கிடைத்ததுதான் இந்த எம்.எல்.ஏ சீட். ரத்னாவின் கணவர் பி.எஸ். சேகர், தொழிலதிபர். ரதிமீனா டிராவல்ஸ் உரிமையாளர்தான் இந்த பி.எஸ். சேகர். ரத்னாவின் மகன் பிரகாஷ்பிரபு, மகள் பிரியதர்ஷனி (மருத்துவர்). ரத்னா, தற்போது கும்பகோணம் நகர்மன்றத் தலைவராக உள்ளார். 2001 முதல் 2012 பிப்ரவரி வரை அதிமுகவின் நகரச் செயலராக இருந்துள்ளார்.
கோவிந்தராஜன்
பேராவூரணி தொகுதி வேட்பாளராக மா. கோவிந்தராஜன் (வயது 66) அறிவிக்கப்பட்டுள்ளார். இவர் சேர்வை சமூகத்தைச் சேர்ந்தவர். 17 ஆண்டுகாலம் பேராவூரணி நகர அதிமுக செயலர், 7 ஆண்டுகள் மாவட்ட எம்.ஜி.ஆர். மன்ற செயலர், தற்போது அதிமுக தொகுதி செயலர்.
சி.வி.சேகர்
பட்டுக்கோட்டை தொகுதி வேட்பாளராக சி.வி. சேகர் (வயது 54) நியமிக்கப்பட்டுள்ளார். மதுக்கூர், ஆலத்தூர் ஊராட்சி ஒன்றியத் தலைவராக பதவி வகித்திருக்கிறார்.
துரைக்கண்ணு
பாபநாசம் தொகுதி அதிமுக வேட்பாளராக சிட்டிங் எம்.எல்.ஏ. இரா. துரைக்கண்ணு (வயது 68) நிறுத்தப்பட்டுள்ளார். 2006, 2011-ம் ஆண்டுகளில் எம்.எல்.ஏ.வாக வென்றவர். பாபநாசம் ஒன்றிய கழக செயலராக இருக்கிறார்.