டிச.29ஆம் தேதி திருச்சி வரும் முதல்வர் ஸ்டாலின்! முன்னேற்பாடுகள் முழு வீச்சில்! தீயாய் நடக்கும் வேலை
திருச்சி: வரும் 29ஆம் தேதி முதலமைச்சர் ஸ்டாலின் திருச்சி வருவதையொட்டி முன்னேற்பாடுகள் முழுவீச்சில் நடைபெற்று வருகின்றன.
அண்ணா விளையாட்டரங்கத்தில் நடைபெறும் அரசு நலத்திட்ட உதவிகள் வழங்கும் விழாவை அமைச்சர்கள் நேருவும், அன்பில் மகேஷும் மிக பிரம்மாண்டமாக நடத்த திட்டமிட்டுள்ளனர்.
இதனால் மாவட்ட நிர்வாகத்தினர் முதல்வர் பங்கேற்கும் விழாவுக்கான ஏற்பாடுகளை தீயாய் வேலை செய்து வருகின்றனர்.
முதல்வர் சுற்றுப்பயணம்
முதலமைச்சர் ஸ்டாலினை பொறுத்தவரை சுற்றுப்பயணம் செல்வதற்கு சலிக்கவேமாட்டார். தமிழகம் முழுவதும் சுற்றி சுற்றி வர வேண்டும் என நினைக்கும் அவர், கடந்த ஓரிரு மாதங்களாக முதுகுவலியால் மருத்துவர்கள் வழங்கிய அறிவுரையை ஏற்று வெளியூர் நிகழ்ச்சிகளை தவிர்த்து வருகிறார். அண்மையில் பெரம்பலூர், அரியலூர், மாவட்ட நிகழ்ச்சிகளிலும் அதைத் தொடர்ந்து தென்காசி நிகழ்ச்சியிலும் மட்டும் கலந்துகொண்டார்.
நேரில் ஆய்வு
இப்போது அடுத்தபடியாக வரும் 29ஆம் தேதி திருச்சி மாவட்டத்தில் அரசு நலத்திட்ட உதவிகள் வழங்கும் நிகழ்ச்சிக்காக வருகை தரவுள்ளார். அந்த விழாவை மிக பிரம்மாண்டமாக நடத்த திட்டமிட்ட அமைச்சர்கள் கே.என்.நேருவும், அன்பில் மகேஸ் பொய்யாமொழியும் முன்னேற்பாடுகளை முழு வீச்சில் கவனித்து வருகின்றனர். அமைச்சர்கள் கே.என்.நேருவும், அன்பில் மகேஸும் அடிக்கடி அண்ணா விளையாட்டரங்க மைதானத்துக்கு சென்று பணிகளை ஆய்வு செய்து வருகின்றனர்.
மாவட்ட நிர்வாகம்
அவர்களுடன் செல்லும் மாவட்ட ஆட்சியர் பிரதீப் மற்றும் திட்ட இயக்குநர் உள்ளிட்ட அதிகாரிகள் முன்னேற்பாடுகளின் நிலை குறித்து விரிவாக எடுத்துரைத்து வருகின்றனர். மழை பெய்தாலும் பயனாளிகள் நனையாத வண்ணம் பந்தல் அமைக்கப்பட்டு வருகின்றன. அமைச்சர் செந்தில்பாலாஜி கரூரிலும், கோவையிலும் காட்டிய பிரம்மாண்டத்தை விட திருச்சியில் ஒரு படி மேலாக பிரம்மாண்டம் காட்டப்படும் எனத் தெரிகிறது. ஏனெனில் அப்படித்தான் அங்கு முதல்வர் விழாவுக்கான ஏற்பாடுகள் இருக்கின்றன.
உதயநிதி பங்கேற்பு
திருச்சியில் நடைபெறும் அரசு விழாவில் முதலமைச்சர் ஸ்டாலினுடன் சிறப்பு திட்டங்கள் செயலாக்கத்துறை அமைச்சர் என்ற முறையில் உதயநிதி ஸ்டாலின் பங்கேற்கவுள்ளார். அமைச்சராக பொறுப்பேற்ற பிறகு உதயநிதி ஸ்டாலின் பங்கேற்கும் முதல் வெளியூர் நிகழ்ச்சி திருச்சி என்பது குறிப்பிடத்தக்கது.
Click it and Unblock the Notifications
Sign in with Google