பினாமிகளுக்கு தான் சீட்.. சிவி சண்முகத்திற்கு எதிராக எழுந்த கலக குரல்.. விலகிய அதிமுக நிர்வாகி!

Updated: Tuesday, March 24, 2026, 12:38 [IST]

Subscribe to Oneindia Tamil

விழுப்புரம்: அதிமுக முன்னாள் அமைச்சர் சிவி சண்முகத்தின் மீதான அதிருப்தி காரணமாக விழுப்புரம் நகர தெற்கு செயலாளர் பசுபதி விலகுவதாக அறிவித்துள்ளார். விழுப்புரம் அதிமுக நிர்வாகிகளை சிவி சண்முகம் மதிப்பதில்லை என்று குற்றம்சாட்டிய பசுபதி, தனது ஆதரவாளரை விழுப்புரம் தொகுதியில் போட்டியிட வைக்க முயற்சிப்பதாகவும் தெரிவித்துள்ளார்.

சட்டசபைத் தேர்தல் நெருங்கிவிட்ட சூழலில், ஒவ்வொரு கட்சியிலும் வேட்பாளர் தேர்வு கிட்டத்தட்ட முடிவடைந்துவிட்டது. அந்த வகையில் 2021 சட்டசபைத் தேர்தலில் விழுப்புரம் தொகுதியில் போட்டியிட்ட சிவி சண்முகம், திமுக வேட்பாளர் லட்சுமணனிடம் தோல்வி அடைந்தார். அவரும் முன்னாள் அதிமுக நிர்வாகி என்பதால், திமுகவில் பொறுப்புக்கு வந்தபின் தொகுதியை தனது கட்டுப்பாட்டுக்குள் வைத்துள்ளார்.

Cv Shanmugham AIADMK Tamilnadu Assembly Elections 2026

இதனால் மீண்டும் விழுப்புரம் தொகுதியில் போட்டியிட வேண்டாம் என்று ஆலோசித்த சிவி சண்முகம், இம்முறை மயிலம் தொகுதியில் போட்டியிட ஆயத்தமாகி வருகிறார். மயிலம் தொகுதியில் தேர்தல் பணிகளை தனது அண்ணன் மூலமாக மேற்கொண்டு வருகிறார். இந்த நிலையில் விழுப்புரம் மாவட்டத்தில் சிவி சண்முகத்திற்கு எதிரானவே அதிமுகவினர் போர்க்கொடி தூக்கியுள்ளனர்.

சிவி சண்முகம் மீதான அதிருப்தி காரணமாக அதிமுகவில் இருந்து அக்கட்சியின் விழுப்புரம் நகர தெற்கு செயலாளர் பசுபதி விலகுவதாக அறிவித்துள்ளார். அதிமுகவில் இருந்து விலகிய பசுபதி, சிவி சண்முகம் மீது பல்வேறு குற்றச்சாட்டுகளையும் முன் வைத்துள்ளார். சிவி சண்முகம் தனது பினாமிகளுக்கும், தனது சமூகத்தினருக்கும் மட்டுமே முக்கியத்துவம் அளிப்பதாக குற்றம் சாட்டி இருக்கிறார்.

விழுப்புரம் தொகுதியில் சிவி சண்முகத்தின் பினாமிகளுக்கு வாய்ப்பு அளிக்க முயற்சித்து வருகிறார். அதேபோல் தாம் தோல்வி அடைந்த விழுப்புரம் தொகுதியில் வேறு யாரும் வெற்றி பெற்றுவிட கூடாது என்பதில் சிவி சண்முகம் குறிப்பாக இருப்பதாகவும், உழைக்கும் நிர்வாகிகளுக்கு சிவி சண்முகம் முக்கியத்துவம் அளிக்கவில்லை என்றும் குற்றம்சாட்டி இருக்கிறார்.

விழுப்புரம் தொகுதியில் பெண் வழக்கறிஞர் ஒருவருக்கு வாய்ப்பு அளிக்க வேண்டும் என்று சிவி சண்முகம் பரிந்துரைத்ததாக தெரிகிறது. இதனால் விழுப்புரம் மாவட்டத்தை பிரித்து புதிய மாவட்டச் செயலாளர்களை நியமிக்க வேண்டும் என்றும் பசுபதி கொந்தளித்துள்ளார். தேர்தல் நெருங்கும் நேரத்தில் அதிமுகவின் பவர் சென்டரான சிவி சண்முகத்திற்கு எதிராக நிர்வாகிகள் வெடித்திருப்பது பேசுபொருளாகி இருக்கிறது.