Robo Shankar: ஐசியுவில் ரோபோ சங்கர்.. "நேரம் நல்லா இல்லன்னா..” மகள் இந்திரஜாவின் உருக்கமான பதிவு
சென்னை: பிரபல காமெடி நடிகர் ரோபோ சங்கர், உடல்நலக் குறைவு காரணமாக மருத்துவமனையில் அனுமதிக்கப்பட்டு, தீவிர சிகிச்சைப் பிரிவில் அனுமதிக்கப்பட்டுள்ளார். இந்தச் சூழலில், தனது தந்தையின் உடல்நிலை குறித்து வரும் பல்வேறு விமர்சனங்களுக்குப் பதிலளிக்கும் வகையில், அவரது மகள் இந்திரஜா சங்கர் சமூக வலைத்தளத்தில் ஒரு உருக்கமான பதிவை வெளியிட்டுள்ளார்.
யார் இந்த ரோபோ சங்கர்
ரோபோ சங்கர், தனது தனித்துவமான உடல்மொழி மற்றும் நகைச்சுவை உணர்வுக்காகப் பிரபலமானவர். இவர் ஆரம்பத்தில் கலக்கப் போவது யாரு?, அது இது எது போன்ற விஜய் டிவியின் காமெடி நிகழ்ச்சிகள் மூலம் பிரபலமானார். இவரது "ரோபோடிக்" உடல்மொழி, ரசிகர்களால் பெரிதும் ரசிக்கப்பட்டது. பின்னர், மாரி, வேலையில்லா பட்டதாரி, காஷ்மோரா உட்படப் பல படங்களில் நடித்து, தமிழ் சினிமாவில் ஒரு குணச்சித்திர மற்றும் நகைச்சுவை நடிகராக தனக்கென ஒரு இடத்தைப் பிடித்தார்.
இவரது மகள் இந்திரஜா சங்கர், நடிகர் விஜய் நடித்த பிகில் திரைப்படத்தில், ஒரு கால்பந்தாட்ட வீராங்கனையாக நடித்ததன் மூலம் ரசிகர்களுக்கு அறிமுகமானார். தனது தந்தையைப் போலவே, சமூக வலைத்தளங்களில் நகைச்சுவையான மற்றும் சுவாரசியமான பதிவுகளை வெளியிட்டு வருகிறார்.
அதிர்ச்சிக்குள்ளான ரோபோ சங்கர் குடும்பம்
கடந்த சில நாட்களாக ரோபோ சங்கர் உடல்நலக் குறைவால் பாதிக்கப்பட்டு, மருத்துவமனையில் அனுமதிக்கப்பட்டிருக்கிறார். அவரது உடல்நிலை மோசமடைந்ததால், இன்று அவர் தீவிர சிகிச்சைப் பிரிவுக்கு மாற்றப்பட்டிருக்கிறார். இந்தச் செய்தி, சினிமா வட்டாரத்திலும், ரசிகர்கள் மத்தியிலும் பெரும் சோகத்தையும், அதிர்ச்சியையும் ஏற்படுத்தியுள்ளது.
ரோபோ சங்கரின் உடல்நலக் குறைவு குறித்துப் பலவிதமான விமர்சனங்கள் இணையத்தில் பரவி வருகின்றன. சிலர் அவர் தனது உடல்நலத்தில் அக்கறை காட்டவில்லை என்றும், சிலர் அவரது வாழ்க்கை முறையை விமர்சித்தும் பதிவிட்டு வருகின்றனர்.
இந்திரஜாவின் உருக்கமான பதிவு
இந்த விமர்சனங்கள், தந்தையின் உடல்நலத்தால் ஏற்கனவே மன உளைச்சலில் இருக்கும் இந்திரஜாவை வெகுவாகப் பாதித்துள்ளன. அதற்குப் பதிலளிக்கும் வகையில், அவர் தனது சமூக வலைத்தளப் பக்கத்தில் ஒரு பதிவை வெளியிட்டுள்ளார். அதில், "நேரம் நல்லா இல்லனா தேவையில்லாதவன் கூட தேவையில்லாம பேசிட்டு போவான்" என்று குறிப்பிட்டுள்ளார். இந்த வரிகள், தனது தந்தையின் உடல்நிலை குறித்த விமர்சனங்களுக்கு அவர் கொடுத்த தக்க பதிலடியாகவே பார்க்கப்படுகிறது.
விமர்சனங்களுக்கு உள்ளாகும் இந்திரஜா
இதேபோல், இந்திரஜா சங்கர் சில நாட்களுக்கு முன்பு, ஒரு கடவுளுக்கு புரமோஷன் வீடியோ வெளியிட்டிருந்தார். அந்த வீடியோவை வைத்தே பல விமர்சனங்கள் எழுந்தன. தற்போது தந்தையின் உடல்நிலை குறித்த செய்தியை வைத்தும் சிலர் இந்திரஜாவை விமர்சித்தது, இந்திரஜாவை மனதளவில் மேலும் பாதித்திருக்கலாம். ரோபோ சங்கர், தனது மகளின் திருமணத்தை மிகச் சிறப்பாக நடத்தி வைத்தது சமூக வலைத்தளங்களில் பாராட்டுகளைப் பெற்றது. இப்போது இந்திரஜா, தந்தையின் இக்கட்டான நேரத்தில் உறுதுணையாக இருக்கிறார்.
இந்தச் சோதனை காலகட்டத்தில், ரோபோ சங்கர் விரைவில் குணமாகி வீடு திரும்ப வேண்டும் என ஒட்டுமொத்த திரையுலகமும், ரசிகர்களும் பிரார்த்தனை செய்து வருகின்றனர்.
Click it and Unblock the Notifications
Sign in with Google