அப்பா தேவா மறைவால் கதறி அழுத ஸ்ரீகாந்த் தேவா.. தேசிய விருதை விட அப்பாவுக்கு பெருமை சேர்த்த மகன்!
சென்னை: தமிழ் சினிமாவில் எத்தனையோ இசையமைப்பாளர்கள் வந்திருக்கிறார்கள். ஆனால், ஒரு பாடல் ஒலித்தாலே இது தேவா இசையமைத்த பாடல்தான் என்று ரசிகர்களை கண்டுபிடிக்க வைத்த தனி பாணி அவருக்கு இருந்தது. எத்தனையோ படங்களில் மறக்க முடியாத பாடல்களைக் கொடுத்தவர் தேனிசை தென்றல் தேவா. இன்று அவர் நம்முடன் இல்லை என்ற செய்தி தமிழ் சினிமா ரசிகர்களை அதிர்ச்சியில் ஆழ்த்தியிருக்கிறது. அப்பாவின் மறைவு செய்தியை கேட்டதும் தேவா மகன் ஸ்ரீகாந்த் தேவா கதறி அழுத வீடியோக்கள் இணையத்தில் வைரல் ஆகி வருகிறது. பலரும் அவருக்கு ஆறுதல் சொல்லி வருகிறார்கள்.
தேவாவின் மறைவு அவருடைய ரசிகர்களுக்கு மட்டுமல்ல, அவருடைய குடும்பத்துக்கும் ஈடுசெய்ய முடியாத இழப்பு. அதிலும் அவருடைய மகனும் இசையமைப்பாளருமான ஸ்ரீகாந்த் தேவாவுக்கு இது எவ்வளவு பெரிய வலியாக இருக்கும் என்பதை நினைத்துப் பார்க்கவே மனது கனக்கிறது. ஒரு இசையமைப்பாளர் என்பதை கடந்து, தன்னுடைய வாழ்க்கையில் மிகப்பெரிய முன்னுதாரணமாக இருந்தவர் தேவா. தேவாவின் மறைவால் பலரும் வருத்தம் தெரிவித்து வரும் நிலையில் ஸ்ரீகாந்த் தேவா போனில் யாரிடமோ கதறி அழுதபடி பேசிக் கொண்டிருக்கும் காட்சி பலரையும் உருக்குகிறது.
ஸ்ரீகாந்த் தேவாவைப் பற்றிப் பேசும்போது இந்தச் சம்பவத்தை நிச்சயம் சொல்ல வேண்டும். 2023-ம் ஆண்டு 'கருவறை' என்ற குறும்படத்துக்கு இசையமைத்ததற்காக ஸ்ரீகாந்த் தேவாவுக்கு தேசிய விருதுக்கான சிறப்பு அங்கீகாரம் கிடைத்தது. அந்த செய்தி தேவாவுக்கும் பெரிய மகிழ்ச்சியைக் கொடுத்தது. அப்போது ஸ்ரீகாந்த் தேவா பேசிய விஷயம் மிகவும் நெகிழ்ச்சியானது.
தன்னுடைய அப்பா ஏற்கெனவே பல விருதுகளைப் பெற்றிருந்தாலும், தான் தேசிய விருது பெற்றது அவருக்கு மிகவும் சந்தோஷமாக இருந்ததாக அவர் தெரிவித்திருந்தார். அந்த விருதை தன்னுடைய அப்பாவுக்கு அர்ப்பணிப்பதாகவும் கூறியிருந்தார். யோசித்துப் பாருங்கள். இசை உலகில் தனக்கென்று ஒரு பெரிய பெயரை உருவாக்கியவர் தேவா. பல முன்னணி நடிகர்களின் படங்களுக்கு இசையமைத்தவர். அவருடைய பாடல்கள் பல தலைமுறைகளை கடந்து இன்றைக்கும் ஒலித்துக்கொண்டிருக்கின்றன. அப்படிப்பட்ட ஒருவருக்கு, தன்னுடைய மகன் விருது வாங்குவது எவ்வளவு பெருமையாக இருந்திருக்கும்.
அப்பா ஏற்கெனவே பல விருதுகளை வாங்கியிருந்தாலும், மகன் வாங்கிய விருது அவருக்கு இன்னொரு விதமான மகிழ்ச்சியைக் கொடுத்திருக்கிறது. ஏனென்றால் அது மகனுடைய உழைப்புக்குக் கிடைத்த அங்கீகாரம். அந்த மகிழ்ச்சியைப் பற்றித்தான் ஸ்ரீகாந்த் தேவா நெகிழ்ச்சியுடன் பேசியிருந்தார். தேவாவின் வீட்டில் இசை என்பது ஒரு தொழில் மட்டுமல்ல, அது குடும்பத்தோடு கலந்திருந்த விஷயம்.
தேவாவின் மகனான ஸ்ரீகாந்த் தேவா 2001-ம் ஆண்டு வெளியான டபுள்ஸ் படத்தின் மூலம் இசையமைப்பாளராக அறிமுகமானார். அதன்பிறகு எம்.குமரன் சன் ஆஃப் மகாலட்சுமி, சிவகாசி, ஈ, பம்பர கண்ணாலே உள்ளிட்ட பல படங்களுக்கு இசையமைத்திருக்கிறார். அப்பா தேவா கானா பாடல்களிலும் மெலடிகளிலும் தனக்கென ஒரு பாணியை உருவாக்கியவர். மகன் ஸ்ரீகாந்த் தேவாவும் குத்து பாடல்கள், மெலடிகள், பின்னணி இசை எனத் தனக்கான இடத்தை உருவாக்கிக்கொண்டார். இருவரும் ஒரே குடும்பத்தைச் சேர்ந்தவர்கள் என்றாலும், ஸ்ரீகாந்த் தேவா தன்னுடைய இசை பயணத்தைத் தனியாகவே பயணித்தார் .
ஸ்ரீகாந்த் தேவா விருது வாங்கியபோது அப்பா பெருமைப்பட்டார். இன்று அந்த அப்பா இல்லை என்ற செய்தியை ஏற்றுக்கொள்வது அவருக்கு எவ்வளவு கடினமாக இருக்கும்? மகனின் வெற்றியை நேரில் பார்த்து மகிழ்ந்தவர், இனி வரும் வெற்றிகளைப் பார்க்க அவருடன் இருக்க மாட்டார் என்பதுதான் இந்த இழப்பின் மிகப்பெரிய வலி.
கானா பாடல்களில் தனி ராஜ்ஜியம்
சென்னையின் கானா இசையைத் திரைப்படங்களில் பிரபலப்படுத்தியதில் தேவாவுக்கு முக்கியமான பங்கு உண்டு.
ஆனால் தேவா கானா பாடல்களோடு மட்டும் நின்றுவிடவில்லை. காதல் கோட்டை, ஆசை போன்ற படங்களில் மென்மையான காதல் பாடல்களையும் கொடுத்திருக்கிறார். அதனால்தான் அவருடைய இசையை இன்றைக்கும் பல தலைமுறையினர் ரசிக்கிறார்கள்.
சமீபத்தில் கூட ஹிப் ஹாப் தமிழா ஆதியின் 'மீசைய முறுக்கு 2' படத்தைப் பார்த்துவிட்டு, தேவா அவரை நேரில் சந்தித்துப் பாராட்டியிருந்தார். புதிய தலைமுறை இசையையும் கவனித்து, இளம் கலைஞர்களை வாழ்த்தும் மனநிலை அவரிடம் இருந்தது. இப்படி பல ஆண்டுகள் இசையுலகில் இருந்தும் புதியவர்களை பாராட்டிய தேவாவின் பயணம் இப்போது முடிந்துவிட்டது. தேனிசை தென்றல் தேவா மறைந்தாலும், அவர் இசையமைத்த பாடல்கள் ஒலிக்கும் ஒவ்வொரு முறையும் அவருடைய நினைவுகள் ரசிகர்களிடம் உயிரோடு இருக்கும்.
Click it and Unblock the Notifications
Sign in with Google
