முதல் வெற்றியை எதிர்நோக்கும்... கேரள முதல்வர் பினராயி விஜயனின் மருமகன்.. 15000 வாக்குகள் முன்னிலை

Updated: Sunday, May 2, 2021, 16:22 [IST]

Subscribe to Oneindia Tamil

திருவனந்தபுரம்: கேரளாவில் சட்டசபை தேர்தலில் முதல்வர் பினராயி விஜயனின் மருமகன் சுமார் 15 ஆயிரம் வாக்குகள் வித்தியாசத்தில் முன்னணியில் உள்ளார்,

கேரளாவில் கடந்த ஏப்ரல் 6ஆம் தேதி ஒரே கட்டமாகச் சட்டசபை தேர்தல் நடைபெற்றது. இன்று கேரளா உள்ளிட்ட ஐந்து மாநிலங்களில் வாக்கு எண்ணிக்கை தொடர்ந்து நடைபெற்று வருகிறது.

தற்போதுவரை தமிழகத்தில் திமுக கூட்டணி, புதுவையில் என்ஆர் காங்கிரஸ் கூட்டணி, மேற்கு வங்கத்தில் திரிணாமுல், அசாமில் பாஜக ஆகிய கட்சிகள் அதிக இடங்களில் முன்னிலையில் உள்ளன.

பினராயி விஜயன் மருமகன்

கேரளா சட்டசபை தேர்தலில் முதல்வர் பினராயி விஜயனின் மருமகனும் மார்க்சிஸ்ட் கம்யூனிஸ்ட் கட்சியின் இளைஞரணி தலைவருமான முஹம்மது ரியாஸ் பேபூர் தொகுதியில் களமிறங்கியிருந்தார். பேபூர் தொகுதி காலம் காலமாக மார்க்சிஸ்ட் கம்யூனிஸ்ட் கட்சி கட்சி வலுவாக இருக்கும் இடங்களில் ஒன்றாகும். இதனால் பேபூர் தொகுதியில் முஹம்மது ரியாஸ் எளிதில் வெற்றி பெற்றுவிடுவார் என்றே எதிர்பார்க்கப்பட்டது.

15 ஆயிரம் வாக்குகள்

அதேபோல இன்று காலை முதலே முஹம்மது ரியாஸ் பேபூர் தொகுதியில் முன்னிலையில் இருந்தார். தன்னை எதிர்த்துப் போட்டியிட்ட காங்கிரஸ் கட்சியின் வேட்பாளர் பி.எம். நியாஸைவிட சுமார் 15 ஆயிரம் வாக்குகள் வித்தியாசத்தில் முன்னணியில் உள்ளார். முன்னதாக கடந்த 2009இல் கோழிக்கோடு மக்களவை தொகுதியில் போட்டியிட்ட முஹம்மது ரியாஸ், 1000க்கும் குறைவான வாக்குகள் வித்தியாசத்தில் தோல்வியடைந்திருந்தார்.

இடதுசாரிகளுக்குப் பெரும்பான்மை?

கேரளாவில் மொத்தம் உள்ள 140 தொகுதிகளில் இடதுசாரிகள் கூட்டணி 94க்கும் மேற்பட்ட இடங்களில் முன்னிலையில் உள்ளது. அதேபோல காங்கிரஸ் கூட்டணி 43 இடங்களில் முன்னணியில் உள்ளது. அதேநேரம் பாஜக வெறும் மூன்று தொகுதிகளில் மட்டுமே முன்னணியில் உள்ளது. நேமம், பாலக்காடு, மஞ்சேஸ்வரம் ஆகிய மூன்று தொகுதிகளில் பாஜக முன்னிலையில் உள்ளது.

40 ஆண்டுகளில் முதல்முறை

இன்று வாக்கு எண்ணிக்கை முழுவதும் இதே நிலை தொடர்ந்தால் இடதுசாரிகள் மீண்டும் ஆட்சி அமைக்கும். கேரளாவில் இடதுசாரிகள் மற்றும் காங்கிரஸ் கட்சிகள் மாறி மாறியே ஆட்சி அமைத்துள்ளன. தொடர்ந்து இரண்டு தேர்தல்களில் ஒரே கட்சி வென்றதில்லை. கடந்த 40 ஆண்டுகளில் முதல்முறையாகக் கேரளாவில் தொடர்ந்து இரண்டாவது முறையாக இடதுசாரிகள் ஆட்சி அமைக்க வாய்ப்பு அதிகமாக உள்ளது.