தேர்தலில் யாருக்கு ஆதரவு? நிருபர்களின் கேள்விக்கு ஏர்போர்ட்டில் ரஜினி சொன்ன ''பதில்''

சென்னை: சட்டசபை தேர்தலில் யாருக்கு ஆதரவு என்று நடிகர் ரஜினிகாந்த்திடம் எழுப்பப்பட்ட கேள்விக்கு பதிலளிக்க மறுத்த அவர், தேசிய விருது பெற்ற தமிழ் திரைப்பட குழுவினருக்கு தனது வாழ்த்துக்களை தெரிவித்தார்.

கபாலி சூட்டிங்கில் பிசியாக உள்ள ரஜினிகாந்த், இன்று மதியம் சென்னை விமான நிலையத்திற்கு வந்து இறங்கினார். அப்போது அவரிடம், சட்டசபை தேர்தலில் எந்த கட்சிக்கு உங்கள் ஆதரவு என நிருபர்கள் கேட்டபோது, பதிலளிக்க நடிகர் ரஜினிகாந்த் மறுப்பு தெரிவித்துவிட்டு காரில் ஏறி சென்றுவிட்டார்.

அதேநேரம், தேசிய விருதுகள் குறித்து முன்னதாக நிருபர்கள் கேட்ட கேள்விக்கு பதிலளித்த ரஜினி, சிறந்த பின்னணி இசையமைப்பாளர் விருது பெறும் இளையராஜாவுக்கு பாராட்டுகளை தெரிவித்ததோடு, சிறந்த தமிழ் திரைப்படத்திற்கான விருதை 'விசாரணை' பெற்றுள்ளது மகிழ்ச்சி அளிக்கிறது என்று கூறினார்.

விசாரணை திரைப்படம் ரிலீசான உடனேயே, தமிழில் பார்த்த சிறந்த திரைப்படம் இது என்று ரஜினிகாந்த் டிவிட் செய்திருந்தார் என்பது குறிப்பிடத்தக்கது.

English summary

Actor Rajinikanth refused to comment about his political stand for up coming Tamilnadu assembly election.