சிதம்பரத்துக்கு சிவகங்கை?

டெல்லி:

காங்கிரஸ் கட்சியின் இரண்டாவது வேட்பாளர் பட்டியல் வரும் 16ம் தேதி வெளியிடப்படுகிறது. இதில் தமிழகத்தில்போட்டியிடும் வேட்பாளர்கள் பலரது பெயர்கள் வெளியாகும் என்று தெரிகிறது.

75 வேட்பாளர்கள் கொண்ட அக் கட்சியின் முதல் பட்டியல் கடந்த 10ம் தேதி வெளியானது. அதில் தமிழகத்தைப் பொறுத்தவரை2 வேட்பாளர்கள் மட்டுமே இடம் பெற்றிருந்தனர். இளங்கோவன், தங்கபாலு போன்றவர்களின் பெயர் இல்லை. இதனால்அவர்களது ஆதரவாளர்கள் நறநறக்கிறார்கள்.

நீலகிரி தொகுதியின் வேட்பாளராக பிரபுவும், மயிலாடுதுறை தொகுதியின் வேட்பாளராக மணிசங்கர அய்யரும் மட்டுமே அன்றுஅறிவிக்கப்பட்டனர்.

இந் நிலையில் அடுத்த பட்டியலை வெளியிடும் பணியில் காங்கிரஸ் தலைமை தீவிரமாக ஈடுபட்டுள்ளது.

சிவகங்கை தொகுதியை கேட்டு ப.சிதம்பரம் தொடர்ந்து நெருக்குதல் தந்து கொண்டே இருக்கிறார். தனது காங்கிரஸ் ஜனநாயகப்பேரவையையும் கலைத்துவிட்டு காங்கிரசில் ஐக்கியமாகவும் அவர் முன் வந்துவிட்டதாகத் தெரிகிறது.

இதனால் அவருக்கு சீட் கொடுத்துவிடலாம் என்று சோனியா கருதுவதாக காங்கிரஸ் வட்டாரங்கள் தெரிவிக்கின்றன.