சிவாஜி பிறந்த நாளில் சந்திரமுகி வெள்ளி விழா!
சென்னை:
நடிகர் திலகம் சிவாஜி கணேசனின் பிறந்த நாளான அக்டோபர் 1ம் தேதி சென்னையில் சந்திரமுகி படத்தின் வெள்ளி விழாநடைபெறுகிறது.
சிவாஜி பிலிம்ஸ் தயாரிப்பில் உருவான சந்திரமுகி மிகப் பெரும் வெற்றியைப் பெற்று வசூலில் பெரும் சாதனை படைத்துள்ளது.165 நாட்களைத் தாண்டி தொடர்ந்து ஓடிக் கொண்டுள்ளது. அக்டோபர் 1ம் தேதி இப்படம் 175 நாட்களைத் தாண்டுகிறது.
சிவாஜி கணேசனின் பிறந்த நாளும் அன்றுதான் வருகிறது. எனவே அன்றைய தினமே படத்தின் வெள்ளி விழாவை வைத்துக்கொள்ள சிவாஜி பிலிம்ஸ் நிறுவனமும், ரஜினியும் முடிவு செய்துள்ளனர்.
சென்னை பல்கலைக்கழக நூற்றாண்டு விழா மண்டபத்தில் சந்திரமுகி வெள்ளி விழா நடைபெறவுள்ளது. இதற்கான ஏற்பாடுகளைசிவாஜி பிலிம்ஸ் நிறுவனத்தார் மேற்கொண்டுள்ளனர்.
இந்த நிகழ்ச்சியில் சந்திரமுகி படத்தில் நடித்த அனைத்துக் கலைஞர்களுக்கும் மத்திய அமைச்சர் தாசரி நாராயண ராவ் நினைவுப்பரிசுகளை வழங்குகிறார். அதேபோல இணையதளம் ஒன்றின் மூலம், ரஜினி, ஜோதிகாவின் உடைகளை ஏலம் எடுத்தவர்களுக்குரஜினி தனது கையால் பரிசுகளை வழங்குகிறார்.
விழாவில் ரஜினிகாந்த், ஜோதிகா, நயன்தாரா, வடிவேலு, நாசர் உள்ளிட்ட படத்தில் நடித்த அத்தனை கலைஞர்கள்,விநியோகஸ்தர்கள், திரையரங்க உரிமையாளர்கள் என அனைவரும் கலந்து கொள்ளவுள்ளனர்.
சந்திரமுகி பட வெற்றி விழாவின்போது நான் மனம் திறந்து பேசவுள்ளேன் என்று ஏற்கனவே ரஜினிகாந்த் கூறியுள்ளார். எனவேஇந்த விழாவின்போது அவர் என்ன பேசப் போகிறார் என்ற எதிர்பார்ப்பு அதிகரித்துள்ளது.