இங்கிலாந்து பயணம்-கங்குலி, சச்சினுக்கு வாய்ப்பு

மும்பை:இந்திய கிரிக்கெட் அணி இம்மாதம் இறுதியில் இங்கிலாந்து சுற்றுப் பயணம் மேற்கொள்ளவுள்ளது. இதற்கான அணி தேர்வு ஜூன் 12ம் தேதி நடைபெறுகிறது. இதில் டெண்டுல்கர், கங்குலிக்கு வாய்ப்பு வழங்கப்படும் என தெரிகிறது.

இந்திய அணி இம்மாதம் 23ம் தேதி முதல் செப்டம்பர் 8ம் தேதி வரை இங்கிலாந்து, அயர்லாந்து, ஸ்காட்லாந்து ஆகிய நாடுகளுக்கு சுற்றுப் பயணம் மேற்கொள்ளவுள்ளது.

இந்த சுற்றுப் பயணத்தின் போது இந்திய அணி, தென் ஆப்பிரிக்கா, அயர்லாந்து, பாகிஸ்தான், இங்கிலாந்து, ஸ்காட்லாந்து ஆகிய நாடுகளுடன் மொத்தம் 13 ஒரு நாள் போட்டிகள், 3 டெஸ்ட் போட்டி மற்றும் இரண்டு 3 நாள் பயிற்சி போட்டியில் விளையாடுகிறது.

இதற்கான வீரர்கள் தேர்வு வரும் 12ம் தேதி பெங்களூரில் வெங்சர்க்கார் தலைமையில் நடைபெறுகிறது.

இதில் கடந்த மாதம் வங்கதேச சுற்றுப்பயணத்தின் போது ஒரு நாள் போட்டிகளில் இடம் பெறாத சச்சின் டெண்டுல்கர், சவுரவ் கங்குலிக்கு மீண்டும் வாய்ப்பு அளிக்கப்படும் என எதிர்பார்க்கப்படுகிறது.

வங்கதேச சுற்றுப்பயணத்தில் டெஸ்ட் போட்டியில் இருவரும் சதம் அடித்தது குறிப்பிடத்தக்கது.