லண்டன் மார்க்கெட்டில் பயங்கர தீ விபத்து

லண்டன்: லண்டனில் உள்ள பிரபல கேம்டன் மார்க்கெட்டில் ஏற்பட்ட தீவிபத்தில் கோடிக்கணக்கான மதிப்புள்ள பொருட்கள் தீயில் எரிந்து நாசமாகின.

லண்டனில் உள்ள பிரபல கேம்டன் மார்க்கெட் பகுதியில் நேற்று இரவு 7-10 மணியளவில் திடீரென்று தீவிபத்து ஏற்பட்டது. இந்த தீவிபத்து குறித்து தகவல் அறிந்ததும், தீயணைப்புப் படையினர் விரைந்து வந்து தீயை அணைக்கும் பணியில் ஈடுபட்டனர்.

ஆனால் அவர்கள் வருவதற்குள் தீ மளமளவென்று பரவி 40 அடி உயரம் வரை கொளுந்து விட்டு எரிந்தது.

20க்கும் மேற்பட்ட தீயணைப்பு வாகனங்களுடன் 100க்கு மேற்பட்ட தீயணைப்புப் படை வீரர்கள் அதிகாலை 3-30 மணிவரை போராடி தீயை அணைத்தனர்.

தீ விபத்திற்கான காரணம் மின்கசிவாக இருக்கலாம் எனத் தெரிகிறது. தீ விபத்து குறித்த சேதம் இதுவரை கணக்கிடப்படவில்லை.