ஒபாமாவுக்காக பிரசாரம் செய்ய பில் கிளின்டன் விருப்பம்

வாஷிங்டன்: அமெரிக்க அதிபர் தேர்தலில் ஜனநாயக கட்சி சார்பில் போட்டியிடும் பாரக் ஒபாமாவுக்கு ஆதரவாக பிரசாரம் செய்ய விருப்பம் தெரிவித்துள்ளார் முன்னாள் அதிபர் பில் கிளின்டன்.

வரும் நவம்பர் மாதம் அமெரிக்க அதிபர் தேர்தல் நடக்கிறது. ஆளும் குடியரசு கட்சி சார்பில் ஜான் மெக்கைனும், ஜனநாயக கட்சி சார்பில் பராக் ஒபாமாவும் போட்டியிடுகின்றனர்.

ஜனநாயக கட்சி வேட்பாளர் போட்டியில் முன்னாள் அதிபர் பில் கிளின்டன் மனைவி ஹிலாரியும் ஒபாமாவும் மோதினர். இதில் ஒபாமா அக்கட்சியின் வேட்பாளராக தேர்ந்தெடுக்கப்பட்டார்.

இருப்பினும் ஒபாமாவுக்கு ஆதரவாக ஹிலாரி தேர்தல் பிரசாரம் செய்து வருகிறார். இந்நிலையில் ஒபாமாவுக்கு ஆதரவாக பிரசாரம் செய்ய விருப்பம் தெரிவித்துள்ளார் முன்னாள் அதிபர் பில் கிளின்டன்.

இதுகுறித்து பில் கிளின்டன் கூறியதாவது: ஜனநாயக கட்சி வேட்பாளர் ஒபாமாவை ஆதரித்து பிரசாரம் செய்ய விரும்புகிறேன். அவர் என்னைவிட பிசியானவர். அவர் எப்போது கேட்டுக் கொள்கிறாரோ அப்போது பிரசாரம் செய்வேன். சில தினங்களுக்கு முன் அவரிடம் போன் மூலம் பேசினேன். அப்போது இதை தெரிவித்தேன் என்று கூறினார் கிளின்டன்.

ஜனநாயக கட்சியினர் மிகவும் மதிக்கும் தலைவராக கிளின்டன் உள்ளார். வேட்பாளர் போட்டியின்போது ஹிலாரி எந்த மாகாணங்களில் வெற்றி பெற்றாரோ அந்த பகுதிகளில் கிளின்டன் பிரசாரம் செய்தால் அக்கட்சிக்கு அதிக வாக்குகள் கிடைக்கும் என்று கூறுகின்றனர் அரசியல் அறிஞர்கள். அடுத்த சில வாரங்களில் கிளின்டனும் ஒபாமாவும் ஒரே மேடையில் தோன்றி பிரசாரம் செய்வார்கள் என்று தெரிகிறது.