கச்சா எண்ணெய் 24 டாலர்கள் சரிவு.. ஆனால்!!
வாஷிங்டன்: கச்சா எண்ணெயின் விலை பேரலுக்கு மேலும் 4 டாலர்கள் குறைந்துள்ளது. ஒரு பேரலின் இன்றைய விலை 124.44 அமெரிக்க டாலர்கள்.
காசோலின் மற்றும் எரிபொருளுக்கான தேவை கடந்த வாரம் 2.4 சதவிகிதம் குறைந்ததையடுத்து சர்வதேச மார்க்கெட்டில் கச்சா எண்ணெயின் விலையும் குறையத் தொடங்கியுள்ளது.
இருவாரங்களுக்கு (ஜூலை 11) முன்புவரை அதிகபட்சமாக பேரல் 147 டாலருக்கு விற்கப்பட்ட கச்சா எண்ணெய், இப்போது 124.20 டாலராகக் குறைந்துள்ளது. கிட்டத்தட்ட 24 டாலர்கள் குறைந்திருக்கிறது, இருவாரங்களில்.
அமெரிக்கர்களிடையே தற்போது பெட்ரோலியப் பொருட்களுக்கான தேவை ஓரளவு குறைந்து வருவதுதான் இதற்கு முக்கியக் காரணம். மேலும் அமெரிக்கப் பொருளாதாரத்தில் தற்போது நிலவும் ஒருவித தேக்க நிலை, அனைத்துப் பொருட்களின் விலைகளையும் கட்டுக்குள் கொண்டுவரும் நடவடிக்கைகளில் நிறுவனங்களை இறங்க வைத்துள்ளது.
(அமெரிக்காவில் அரசின் தலையீடு மிகக் குறைவு. முதலாளிகளைச் சார்ந்த பொருளாதாரம் என்பதால் பெரிய நிறுவனங்களும் மார்க்கெட் சக்திகளான தேவை-அளிப்பும் மட்டுமே அங்கு பொருளாதாரத்தைத் தீர்மானிக்கின்றன. ராணுவத்தைத் தவிர்த்துப் பார்த்தால் மற்ற எல்லா விஷயங்களிலும் அரசின் வேலை, ஜஸ்ட் மேற்பார்வை செய்வதுதான்!)
இரண்டே வாரங்களில் பேரலுக்கு 20 டாலர்கள் எண்ணெய் விலை குறைந்திருக்கிறது. அப்படியெனில் இன்னும் கணிசமாக்க் குறை வாய்ப்பிருக்கிறதா? என ஒருவித நப்பாசையோடு நீங்கள் பார்ப்பது புரிகிறது. மேலே படியுங்கள்...
'இந்த நிலை அப்படியே நீடிக்கும் அல்லது எண்ணெய் விலைகளில் ஒரு கரெக்ஷன் வரும் என்றெல்லாம் எதிர்பார்ப்பது சரியல்ல. காரணம், கடந்த நான்கு ஆண்டுகளில் எண்ணெய்ச் சந்தையில் காளையின் ஆதிக்கமே தொடர்ந்து இருந்திருக்கிறது. அதாவது லேசாகக் குறைவது போல போக்குக் காட்டிவிட்டு, ஒரே பாய்ச்சலாகப் பாய்வதுதான் காளை ஸ்டைல். இந்த முறையும் அதுதான் நடக்கப் போகிறது', என்கின்றனர் பொருளாதார அறிஞர்கள்.
இதனை உறுதிப்படுத்துவதுபோல, அமெரிக்காவின் முக்கிய எண்ணெய் உற்பத்தி மையங்களில் உற்பத்தி அளவு கணிசமாகக் குறைந்து வருகிறது.
மெக்ஸிகோ வளைகுடாப் பகுதியில் ஏற்பட்டுள்ள புயல் மற்றும் நைஜீரியாவின் பைப்லைன்களை தகர்க்கப் போவதாக அந்நாட்டின் முக்கிய தீவிரவாதி குழு நேற்று முன்தினம் விடுத்துள்ள மிரட்டல் போன்றவற்றால் உற்பத்தி பாதிக்கப்பட்டு மீண்டும் பெட்ரோலியப் பொருட்கள் விலை ஜெட் வேகம் பிடித்தாலும் ஆச்சரியப்படுவதற்கில்லை.