வேர்ல்டு ஸ்பேஸ் ரேடியோ திவால்!!

நியூயார்க்: உலகின் பிரபல சாட்டிலைட் ரேடியோ சேவை நிறுவனமான வேர்ல்டு ஸ்பேஸ் ரேடியோ திவாலாகி விட்டதாக அறிவிக்கப்பட்டுள்ளது.

மேரிலாண்டை தலைமையிடமாகக் கொண்டு இயங்கும் வேர்ல்ட் ஸ்பேஸ் ரேடியோ சேவையை, கட்டணம் செலுத்தித்தான் பெறவேண்டும். உலகில் 10 க்கும் மேற்பட்ட நாடுகளில் பிரபலமாக உள்ள இந்த ரேடியோவுக்கு மொத்தம் 1,70,000 சந்தாதாரர்கள் உள்ளனர்.

307 மில்லியன் டாலர் சொத்துக்களைக் கொண்டுள்ள இந் நிறுவனத்துக்கு கடன்கள் அதைவிட பலமடங்கு அதிகம். அதாவது 2.12 பில்லியன் டாலர்கள். இந்தக் கடனில் பெரும் பகுதி ராயல்டியாகவே செலுத்த வேண்டிய தொகை என்பது குறிப்பிடத்தக்கது.

கடன்களைச் செலுத்த முடியவில்லை, பணியாளர்களுக்கு சம்பளம் வழங்கக் கூட நிதியில்லை... உடனடியாக அமெரிக்க நிறுவனங்களுக்கு நன்கு பரிச்சயமான திவால் நோட்டீஸ் ஆயுதத்தைக் கையிலெடுத்து விட்டது இந்நிறுவனம்.

அமெரிக்காவின் வில்மிங்டன் கோர்ட்டில், நிறுவன திவால் குறித்த ஆவணங்களை சமர்ப்பித்துவிட்டது வேர்ல்டு ஸ்பேஸ்.