அதிமுகவில் சேர்ந்த திமுக வேட்பாளரின் உறவினர்கள்!

சென்னை: திருமங்கலம் தொகுதி திமுக வேட்பாளர் லதா அதியமானின் மாமியார், கொழுந்தனார்கள், நாத்தனார் ஆகியோர் ஜெயலலிதா முன்னிலையில் அதிமுகவில் இணைந்தனர்.

திமுக வேட்பாளராக திருமங்கலத்தில் போட்டியிடுகிறார் லதா அதியமானின். இவருடைய கணவர் அதியமானின் தாயார், சகோதரி மற்றும் சகோதரர்கள் நேற்று திடீரென அதிமுகவில் இணைந்தனர்.

அதிமுக பொதுச் செயலாளர் ஜெயலலிதாவை போயஸ் தோட்ட இல்லத்தில் சந்தித்த லதாவின் மாமியார் தெய்வானையம்மாள், நாத்தனார் நளினா, கொழுந்தனார்கள் ரவி, கண்ணன், கண்ணன் மனைவி வானதி ஆகியோர் அதிமுகவில் தங்களை இணைத்துக் கொண்டனர்.

அப்போது லதா அதியமான் குடும்பத்தைச் சேர்ந்த கீர்த்தனா, பூர்ண சந்திரன் ஆகியோரும் உடன் இருந்தனர். ஜெயலலிதா அவர்களை வரவேற்று உறுப்பினர் அடையாள அட்டைகளை வழங்கினார்.

திமுக வேட்பாளரின் கணவர் குடும்பத்தார் ஒட்டுமொத்தமாக அதிமுகவில் சேர்ந்திருப்பது திருமங்கலம் தொகுதியில் சலசலப்பை ஏற்படுத்தியுள்ளது.