லதா அதியமானுடன் சென்னை விரைகிறார் அழகிரி - பிரமாண்ட வரவேற்புக்கு ஏற்பாடு

மதுரை: திருமங்கலத்தில் மாபெரும் வெற்றியைப் பெற்ற கையோடு வேட்பாளர் லதா அதியமானுடன், திருமங்கலம் தொகுதி திமுக தேர்தல் பணிக்குழுத் தலைவர் மு.க.அழகிரி சென்னை வருகிறார். அவருக்கு அண்ணா அறிவாலயத்தில் பிரமாண்ட வரவேற்பு கொடுக்க திமுகவினர் ஏற்பாடுகள் செய்துள்ளனர்.

திருமங்கலம் தொகுதி தேர்தல் பணிக்குழுத் தலைவராக செயல்பட்டவர் அழகிரி. கடந்த இடைத் தேர்தல்களிலும் அவரது தலைமையில்தான் திமுக கூட்டணி வெற்றிகளை ஈட்டியது.

ஆரம்பத்தில் தேர்தல் பணிகளில் ஈடுபடுவதில் சுணக்கம் காட்டினாலும் கூட பின்னர் முழு வீச்சில் தனது ஸ்டைல் தேர்தல் பிரசாரத்தை முடுக்கி விட்டார் அழகிரி.

அவரது அயராத முயற்சிகள் மற்றும் உழைப்பால் தற்போது திமுகவுக்கு பெரும் வெற்றி கிடைத்துள்ளது. மேலும், அதிமுக கூட்டணியிடமிருந்து தொகுதியும் திமுக தரப்புக்கு மாறி வந்துள்ளது.

மதுரையில் தடபுடல் கொண்டாட்டம் ...

மதுரையில் திமுக தொண்டர்கள் நேற்றே கொண்டாட்டத்தை ஆரம்பித்து விட்டனர்.

ஹாட்ரிக் வெற்றி என்ற டிஜிட்டல் பலகைகளும், அழகிரியின் புன்னகை முகத்துடன் கூடிய போஸ்டர்களும் மதுரை நகரை அலங்கரித்தன.

இன்று வெற்றி செய்தி வந்ததும் மதுரையின் பல்வேறு பகுதிகளிலும் அழகிரியின் ஆதரவாளர்களும், திமுகவினரும் பட்டாசுகளை வெடித்தும், இனிப்புகளை வழங்கியும் கொண்டாடி வருகின்றனர்.

வெற்றி பெற்ற வேட்பாளர் லதா அதியமானுடன் மு.க.அழகிரி இன்று மாலை சென்னை வருகிறார். முதல்வர் கருணாநிதியை சந்திக்கிறார்.

வெற்றி முகத்துடன் வரும் அழகிரியை வரவேற்க சென்னை திமுகவினர் பிரமாண்ட ஏற்பாடுகளை செய்து வருகின்றனராம். அறிவாலயத்தில் பட்டாசுகள் முழங்க அவரை வரவேற்க திட்டமிட்டுள்ளனராம்.

மாநிலம் முழுக்க கொண்டாட்டம் ..

இதற்கிடையே, திமுகவின் திருமங்கலம் வெற்றியை தமிழகம் முழுவதும் திமுக தொண்டர்கள் உற்சாகமாக கொண்டாடினர்.

சென்னையில் மேயர் மா.சுப்ரமணியம் தலைமையில் தொண்டர்கள் இனிப்புகளைக் கொடுத்தும், பட்டாசுகளை வெடித்தும் கொண்டாடினர்.

அண்ணா அறிவாலய வளாகத்தில் பட்டாசுகள் வெடித்து கொண்டாடினர்.

அதேபோல சிவகங்கை, மதுரை, விழுப்புரம் உள்ளிட்ட பல்வேறு ஊர்களிலும் திமுகவினர் கொண்டாட்டத்தில் ஈடுபட்டனர்.