'கேப்டன்' மச்சானுக்கு கிடைக்குமா கள்ளக்குறிச்சி?
மலை ஏறப் போனாலும் மச்சான் துணையோடு போக வேண்டும் என்று கிராமத்துப் பக்கம் கூறுவார்கள்.
அரசியலில் விஜயகாந்து நுழைவதற்கு முன்பே அவருக்கு மிகப் பெரிய துணையாக இருந்தவர் சுதீஷ். கேப்டன் சினி கிரியேஷன்ஸ் என்ற பட நிறுவனத்தை ஆரம்பித்து விஜயகாந்த்தை வைத்து படங்கள் தயாரித்தார்.
விஜயகாந்த்துக்கு கால்ஷீட் மேனேஜராக செயல்பட்டு வந்த சுதீஷ், தேமுதிகவை விஜயகாந்த் தொடங்கியது முதல் அவருடன் இணைந்து செயல்பட்டு வருகிறார்.
தேமுதிக இளைஞர் அணிச் செயலாளராக இருக்கும் சுதீஷ் முதல் முறையாக தேர்தல் களத்தில் குதித்துள்ளார்.
விஜயகாந்த்தின் மனைவி பிரேமலதா தேர்தலில் போட்டியிடுவார் என எதிர்பார்க்கப்பட்ட நிலையில் அவரது மச்சான் சுதீஷ் கள்ளக்குறிச்சியில் வேட்பாளராகியுள்ளார்.
வேலூர் மாவட்டம் குடியாத்தம் அருகே உள்ள செம்பேடு கிராமம்தான் சுதீஷின் சொந்த ஊர்.
கேப்டன் விஜயகாந்துக்கு விருத்தாச்சலம் கை கொடுத்தது போல சுதீஷுக்கு கள்ளக்குறிச்சி நல்ல தீர்ப்பு தருமா என்ற எதிர்பார்ப்பு எழுந்துள்ளது.