மாட்ரிடில் வினோதம்-பணத்துக்குப் பதில் தங்கம் தரும் ஏடிஎம் இயந்திரம்

மாட்ரிட்: ஸ்பெயின் தலைநகர் மாட்ரிடில் ஒரு ஹோட்டலில் வைக்கப்பட்டுள்ள ஏடிஎம் இயந்திரத்தில், பணத்துக்குப் பதில் தங்கம் தரும் ஏடிஎம் இயந்திரத்தை அறிமுகப்படுத்தியுள்ளனர்.

நமது தேவைக்கேற்ற தங்கம் பெற இந்த இயந்திரத்தில் பணம் கொடுத்தால் போதும், தரமான, சுத்தமான தங்கத்தை இயந்திரம் கக்கும். 40 யூரோ அல்லது 53 அமெரிக்க டாலர் கொடுத்தால் அழகான தங்க பாரை அந்த இயந்திரம் கக்குகிறது.

எப்படி பெறலாம் தங்கத்தை?

வாடிக்கையாளர்கள் ஏடிஎம் இயந்திரத்திற்குப் பணம் செலுத்த வேண்டும். அதற்கேற்ற வகையில், ஒன்று, ஐந்து அல்லது 10 கிராம் மதிப்பிலான தங்க பார்கள் வெளியே வரும். மேலும் இந்த இயந்திரத்தில் ஒவ்வொரு பத்து நிமிடத்திற்கும் ஒருமுறை தங்கத்தின் விலை அப்டேட் செய்தபடி இருப்பார்கள். இதன் மூலம் லேட்டஸ்ட் விலைக்கு தங்கம் கிடைக்கும்.

இதுகுறித்து இந்தத் திட்டத்தை அறிமுகப்படுத்தியுள்ள கோல்ட் டு கோ நிறுவனத்தின் தலைவர் தாமஸ் கெய்ஸ்லர் கூறுகையில்,

இங்கு அதிக விலைக்கு தங்கம் விற்கப்படுவதில்லை. முறையான, சரியான விலையில் இங்கு தருகிறோம். நேரடியாக நாம் இந்த இயந்திரத்திற்குப் பணம் செலுத்தி தேவையான தங்கத்தைப் பெற்றுச் செல்லலாம். இது வங்கிகளிலோ அல்லது வேறு எங்குமோ சாத்தியமில்லாதது.

யாருக்காவது மதிப்புடன் கூடிய பரிசை அளிக்க விரும்புவோருக்கு இது பெரிய வரப்பிரசாதமாகும் என்றார்.

பொன் வைக்கும் இடத்தில் பூ வைப்பது என்பது பழமொழி. இப்போது, பூ வைக்கும் இடத்தில் பொன் வைக்கலாம என்பது மாட்ரிட் மொழியாகியுள்ளது.