பெங்களூரில் கல்லா கட்டும் மோமோஸ் வியாபாரி.. மாதம் ரூ.31 லட்சம் வருமானம்! ரெய்டு வராமல் இருந்தால் சரி
பெங்களூர்: கடின உழைப்பு வெற்றியை தரும் என்பதற்கு சமீபத்திய உதாரணம்தான் பெங்களூரில் மோமோஸ் விற்கும் இளைஞர். இவர் ஒரு நாளைக்கு ரூ.1 லட்சம் என மாதம் ரூ.31 லட்சம் வரை வருமானம் ஈட்டுவதாக தகவல்கள் வெளியாகியுள்ளன.
பெங்களூரில் கே.கே மோமோஸ் மற்றும் சூப்ஸ் என்கிற கடையை இவர் நடத்தி வருகிறார். கேசி பரேரா என்ற இன்ஸ்டாகிராம் பதிவர் இந்த கடையில் ஒரு நாள் முழுவதும் உதவியாளராக பணியாற்றியிருக்கிறார். இதை வீடியோவாக எடுத்து இன்ஸ்டாவில் பதிவேற்றியிருக்கிறார். இந்த வீடியோ தற்போது விவாதங்களை கிளப்பியிருக்கிறது.
இந்த வீடியோவில், மோமோஸ் விற்பனையாளரின் வருவாய் மற்றும் அவரது கடின உழைப்பு குறித்துப் பேசியுள்ளார். இந்த வீடியோ இணையத்தில் வைரலாகி பலரின் கவனத்தையும் ஈர்த்துள்ளது. பரேரா வெளியிட்ட வீடியோவில், "மோமோஸ் கடைக்கு நான் சென்றபோது, ஒரு மணி நேரத்தில் 118 பிளேட்கள் விற்பனை செய்யப்பட்டன. கடை மூடும் நேரத்தில், சுமார் 950 பிளேட்கள் விற்பனையாகிவிட்டன. ஒரு பிளேட்டின் விலை ரூ. 110. இதன் மூலம், ஒரு நாளின் வருவாய் ரூ. 1,00,000-ஐ எட்டியது. கடின உழைப்பு மற்றும் விடாமுயற்சி மூலம், இவர் லட்சங்களில் சம்பாதிக்கிறார்" என்று குறிப்பிட்டுள்ளார்.
இந்த வீடியோ வெளியான பிறகு, பலரும் மோமோஸ் விற்பனையாளரின் கடின உழைப்பைப் பாராட்டினர். இந்த வீடியோ எட்டு லட்சத்திற்கும் அதிகமான லைக்ஸ்களைப் பெற்றுள்ளது. எனினும், மோமோஸ் விற்பனையாளரின் நிகர லாபம் குறித்த விவரங்கள் வெளியிடப்படவில்லை. இதனால் சிலர் வியந்தாலும், வேறு சில பயனர்கள் இந்த கணக்கு குறித்து சந்தேகம் எழுப்பினர்.
"தெருவோரக் கடையில் ஒரு பிளேட் மோமோஸ் ரூ. 110 என்பது சாத்தியமில்லை. ஒருவரால் 900 பிளேட்கள் விற்பனை செய்யவும் முடியாது" என்று ஒரு பயனர் கருத்து தெரிவித்தார். மற்றொருவர், "ஒவ்வொரு வாடிக்கையாளருக்கும் ஒரு நிமிடம் ஒதுக்கினால், 900 பிளேட்களை விற்க 900 நிமிடங்கள் அதாவது 15 மணி நேரம் ஆகும். இடைவேளை இல்லாமல் இவ்வளவு நேரம் வேலை செய்வது எப்படி?" என்று கேள்வி எழுப்பியுள்ளார்.
வருவாய் மற்றும் லாபத்திற்கு இடையே உள்ள வித்தியாசத்தையும் சிலர் சுட்டிக் காட்டினர். இருப்பினும், இந்த வீடியோ சிறு வணிகர்களின் விடா முயற்சி, சமூக ஊடகங்கள் மூலம் அவர்களின் வளர்ச்சியையும் குறித்த விவாதங்களை எழுப்பியுள்ளது. முன்னதாக, யூடியூபர் சார்த்தக் சச்தேவா கடந்த ஆண்டு வெளியிட்ட ஒரு வீடியோவில், மோமோஸ் கடை நடத்துவது பலரும் எதிர்பார்த்ததை விட லாபகரமானது என்று குறிப்பிட்டிருந்தார். பரேராவைப் போலவே, சச்தேவாவும் ஒரு பிரபலமான தெரு உணவுக் கடையில் ஒரு நாள் முழுவதும் வேலை செய்து, அதன் அன்றாடச் செயல்பாடுகள் மற்றும் வருமானத்தைப் பற்றி விளக்கினார். இந்த வீடியோ பார்வையாளர்களை ஆச்சரியத்தில் ஆழ்த்தியது.
அந்த மோமோஸ் கடை ஒரு நாளைக்கு சுமார் ரூ. 8,000 நிகர லாபம் ஈட்டியதாகவும், அதன் உரிமையாளர் ஆண்டுக்கு சுமார் ரூ. 30 லட்சம் சம்பாதித்ததாகவும் சச்தேவா தெரிவித்தார் என்பது குறிப்பிடத்தக்கது.
Click it and Unblock the Notifications
Sign in with Google