மைசூர் சாண்டல் சோப் விளம்பரம்.. தமன்னாவுக்கு ரூ. 6 கோடி.. மொத்தம் ரூ. 56 கோடி செலவு.. கர்நாடகா அரசு
பெங்களூர்: கர்நாடகா அரசு தயாரிக்கும் மைசூர் சாண்டல் சோப் சர்ச்சை இன்னும் ஓயவில்லை. மைசூர் சாண்டல் சோப் விளம்பர தூதராக நடிகை தமன்னா நியமிக்கப்பட்டதற்கு அந்த மாநிலத்தில் கடும் எதிர்ப்புகள் எழுந்தன. இந்நிலையில் நடிகை தமன்னாவுக்கு ரூ.6.27 கோடி சம்பளம் வழங்கியதுடன், மொத்தம் ரூ.56 கோடி விளம்பரத்திற்காக செலவிடப்பட்டுள்ளது என்று கர்நாடகா அரசு சட்டமன்றத்தில் எழுத்துப்பூர்வமாக பதில் அளித்திருப்பது மீண்டும் சர்ச்சையாகியுள்ளது.
கர்நாடகா மாநிலத்தில் சட்டசபை கூட்டத் தொடர் நடைபெற்று வருகிறது. அதில் ஆளும் காங்கிரஸ் அடுத்தடுத்து சர்ச்சைகளில் சிக்கி வருகிறது. துணை முதலமைச்சர் டிகே சிவக்குமார் ஆர்எஸ்எஸ் பாடலை பாடியது சர்ச்சையானது. டிகே சிவக்குமார் ஏற்கனவே பாஜக, ஆர்எஸ்எஸ் ஆகியோருடன் நெருக்கமாக இருப்பதாக விமர்சனம் உள்ளது.
மைசூர் சாண்டல் சோப் சர்ச்சை
அவர் ஆர்எஸ்எஸ் பாடல் பாடிய சர்ச்சை ஓய்வதற்குள் அடுத்த சர்ச்சை வெடித்துள்ளது. பிரபலமான மைசூர் சாண்டல் சோப்பை கர்நாடக அரசு நிறுவனமான கர்நாடகா சோப் அண்ட் டிடெர்ஜென்ட் தயாரிக்கிறது. நூற்றாண்டு பெருமைமிக்க இந்த சோப் நிறுவனம் அரசுக்கு நல்ல வருவாய் கொடுக்கிறது. தினசரி 12 லட்சம் மைசூர் சாண்டல் சோப்புகளை கர்நாடகா அரசு தயாரிக்கிறது.
இதன் வர்த்தகத்தை பெரிதாக்குவதற்காக அகில இந்தியளவில் பிரபலமானவர்களை, மைசூர் சாண்டல் சோப்பின் விளம்பர தூதர்களாக நியமித்து வருகிறார்கள். இதற்கு முன்பு இந்திய அணியின் முன்னாள் கேப்டன் எம்.எஸ் தோனி மைசூர் சாண்டல் சோப் விளம்பர தூதராக இருந்தார். அந்த வரிசையில் தீபிகா படுகோனே, ராஷ்மிகா ஆகியோருடன் ஆலோசனை நடத்தி வந்த நிலையில், கடந்த வருடம் நடிகை தமன்னா விளம்பர தூதராக நியமிக்கப்பட்டார்.
தமன்னா விளம்பர தூதர்
இது கர்நாடகா அரசியலில் அப்போதே சர்ச்சையை கிளப்பியது. "கர்நாடகா அரசுக்கு சொந்தமான ஒரு சோப்புக்கு கர்நாடகாவில் இருந்த எந்த நடிகையும் கிடைக்கவில்லையா. எதற்காக வட மாநில நடிகையை விளம்பர தூதராக நியமித்து கோடிக்கணக்கில் செலவு செய்ய வேண்டும்." என்று எதிர்க்கட்சிகள் விமர்சனம் செய்தன.
அதற்கு கர்நாடகா அரசு, பாலிவுட்டுக்கு போட்டி கொடுக்க வேண்டும். மைசூர் சாண்டல் பிராண்டை அடுத்தக்கட்டத்திற்கு எடுத்து செல்ல வேண்டும் என்ற நோக்கத்தில்தான் தமன்னா விளம்பர தூதராக நியமிக்கப்பட்டுள்ளார். அடுத்த 3 வருடங்களில் ரூ.5,000 கோடி வர்த்தகம் ஈட்டுவதற்காகவே மார்க்கெட்டிங் நிபுணர்களிடம் ஆலோசனை செய்து இந்த முடிவை எடுத்ததாக கூறியது.
ரூ. 56 கோடி செலவு
இந்நிலையில் நடப்பு சட்டமன்ற கூட்டத் தொடரில் பாஜக எம்எல்ஏ சுனில் குமார், "மைசூர் சாண்டல் சோப் விளம்பரத்திற்கான செலவு" குறித்து கேள்வி எழுப்பினார். இதற்கு பதில் அளித்த கர்நாடகா அரசு, "நடிகை தமன்னாவுக்கு ரூ.6.27 கோடி ஊதியம் வழங்கப்பட்டுள்ளது. கடந்த 2 வருடங்களில் மைசூர் சாண்டல் சோப் விளம்பரத்திற்காக ரூ48.88 செலவிடப்பட்டுள்ளது.
மேலும் நடிகை ஐஷானி ஷெட்டிக்கு ரூ.15 லட்சம், சமூகவலைளதங்களில் ரீல்ஸ் விளம்பரத்திற்காக ரூ.62.87 லட்சம் என்று மொத்தம் ரூ.56 கோடிக்கு விளம்பரம் செய்யப்பட்டுள்ளது." என்று அந்த மாநில அரசு எழுத்துப்பூர்வமாக பதில் அளித்துள்ளது.
Click it and Unblock the Notifications
Sign in with Google