எதுவுமே செய்யாத மத்திய அரசு.. கோல்போஸ்டை மட்டுமே மாத்துகிறது!ஆனந்த் ஸ்ரீனிவாசன் ஆக்ரோஷம்! பின்னணி

சென்னை: ‛‛எதுவுமே செய்யலேன்னா கூட ஒருநாள் 5 டிரில்லியன் அமெரிக்க டாலர் பொருளாதாரமாக மாறுவோம்.. இப்படி goal post ஐ மாற்றி கொண்டே இருந்தால் 5 டிரில்லியன் அமெரிக்க டாலர் இலக்கை எட்டவே முடியாது'' என மத்திய பாஜக அரசை காங்கிரஸ் கட்சியை சேர்ந்த பொருளாதார நிபுணரான ஆனந்த் ஸ்ரீனிவாசன் விமர்சனம் செய்துள்ளார்.

இந்தியாவில் உள்நாட்டு உற்பத்தியை அதிகப்படுத்தவும், சுயசார்பு இந்தியாவை உருவாக்கும் வகையிலும் மத்திய அரசு திட்டங்களை தீட்டி வருகிறது.

மேலும் இந்தியா 5 டிரில்லியன் அமெரிக்க டாலர் பொருளாதாரத்தை விரைவில் எட்டும் எனக்கூறி பிரதமர் நரேந்திர மோடி, மத்திய நிதி அமைச்சர் நிர்மலா சீதாராமன் உள்பட பிற அமைச்சர்கள் கூறி வருகின்றனர்.

5 டிரில்லியன் அமெரிக்க டாலர் பொருளாதாரம்

சமீபத்தில் கூட இந்திய தலைமை பொருளாதார ஆலோசகர் ஆனந்த நாகேஸ்வரன் மத்திய நிதியமைச்சகத்தின் 'ஆசாதி கா அம்ரித் மஹோத்சவ்' நிகழ்ச்சியில் பங்கேற்று பேசினார். அப்போது அவர் ‛‛2026-27ம் ஆண்டுக்குள் இந்திய பொருளாதாரம் 5 டிரில்லியன் டாலர்களை தாண்டும் என்று சர்வதேச நாணய நிதியம் கணித்துள்ளது. மேலும், ஒவ்வொரு 7 ஆண்டுக்கும் நாட்டின் மொத்த உள்நாட்டு உற்பத்தி இரட்டிப்பாகும் பட்சத்தில் 2040ம் ஆண்டில் தனிநபர் வருமானம் 15 ஆயிரம் டாலர் அளவிலும், மொத்த உள்நாட்டு உற்பத்தி 20 டிரில்லியன் டாலராகவும் இருக்கும். எனவும் அவர் கூறினார். தற்போதைய சவால்களை எதிர்கொள்வதில் பிற நாடுகளை விட இந்தியா சிறந்த நிலையில் உள்ளது''என்றார்.

எதிர்க்கட்சிகள் விமர்சனம்

இதற்கு காங்கிரஸ் உள்ளிட்ட எதிர்க்கட்சியினர் கடுமையாக விமர்சனம் செய்தனர். இந்தியாவின் 5 டிரில்லியன் பொருளாதாரம் என்பது 2023-2024 காலக்கட்டத்தில் எட்டிவிடும் என முதலில் கூறிய பாஜகவினர் தற்போது 2026-27 என கூறுவதாக முன்னாள் மத்திய நிதி அமைச்சர் ப சிதம்பரம் உள்ளிட்டவர்கள் குற்றம்சாட்டினர். மேலும் பாஜக தங்களுக்கு ஏற்ப கோல்போஸ்டை மாற்றுவதாகவும் விமர்சனம் செய்தனர். அதோடு மட்டுமின்றி இந்தியாவின் பொருளாதாரம் மிகவும் மோசமான நிலையில் உள்ளது என கூறி வருகின்றனர்.

இந்திய ரூபாய் மதிப்பு வீழ்ச்சி

இதற்கு வலு சேர்க்கும் வகையில் தான் அமெரிக்கா டாலருக்கு நிகரான இந்தியா ரூபாயின் மதிப்பு வரலாற்றில் இல்லாத வகையில் வீழ்ச்சியடைந்துள்ளது. தற்போதைய சூழலில் அமெரிக்க டாலருக்கு நிகரான இந்தியா ரூபாயின் மதிப்பு ரூ.82யை தாண்டியுள்ளது. இதனை தடுக்கும் வகையில் மத்திய அரசு எந்த செயலையும் செய்யாமல் 5 டிரில்லியன் அமெரிக்க டாலரை இந்தியா எட்டும் என கூறி வருவதாக எதிர்க்கட்சியினர் கடுமையாக தாக்கி பேசி வருகின்றனர்.

ஆனந்த் ஸ்ரீனிவாசன் விமர்சனம்

இந்நிலையில் தான் மத்திய அரசின் 5 டிரில்லியன் பொருளாதார இலக்கை காங்கிரஸ் கட்சியை சேர்ந்த பொருளாதார நிபுணரான ஆனந்த் ஸ்ரீனிவாசன் விமர்சனம் செய்துள்ளார். இதுபற்றி அவர் தனது ட்விட்டர் பக்கத்தில், ‛‛எதுவுமே செய்யலேன்னா கூட ஒருநாள் 5 டிரில்லியன் அமெரிக்க டாலர் பொருளாதாரமாக மாறுவோம்.. இப்படி goal post ஐ மாற்றி கொண்டே இருந்தால் 5 டிரில்லியன் அமெரிக்க டாலர் இலக்கை எட்டவே முடியாது'' என விமர்சனம் செய்துள்ளார்.

English summary

Anand Srinivasan, an economist, Congress Party, criticized the central BJP government saying, "Even if do nothing, we will one day become a 5 trillion US dollar economy. If keep changing the goal post like this, we will never reach the 5 trillion US dollar goal".