அவர் வரலாறு தெரியுமா.. சந்தர்ப்பவாத அரசியல்வாதி.. ஆதவ் அர்ஜுனாவை வெளுத்த கேபி முனுசாமி
சென்னை: அமைச்சர் ஆதவ் அர்ஜுனா ஒரு சந்தர்ப்பவாத அரசியல்வாதி என்று அதிமுக முன்னாள் அமைச்சர் கேபி முனுசாமி விமர்சித்துள்ளார். அதிமுகவால் பலன் அடைந்தவர்கள் பலன் தேடி புதிய கட்சிக்கு செல்கிறார்கள் என்று விமர்சித்த கேபி முனுசாமி, கொள்கைவாதிகள் அதிமுகவில் இருக்கிறார்கள் என்றும் தெரிவித்துள்ளார்.
அதிமுகவில் இருந்து முன்னாள் அமைச்சர்கள், முன்னாள் எம்பிக்கள், முன்னாள் எம்எல்ஏ-க்கள் விலகுவது தொடர்கதையாகி வருகிறது. அதிமுகவில் பொறுப்பில் இருப்பவர்கள் ஏராளமானோர் தவெக நோக்கி படையெடுத்து வருகின்றனர். ஒவ்வொரு வாரம் சனிக்கிழமையும் தவெகவின் பனையூர் அலுவலகத்தில் இணைப்பு விழா காட்சிகள் அரங்கேறி வருகிறது.
இன்றும் கூட அதிமுக முன்னாள் அமைச்சர் பால கங்கா, பச்சைமால், முன்னாள் எம்பி இளவரசன், வனரோஜா, முன்னாள் மேயர் விஜயலட்சுமி, தமாக யுவராஜ், பாஜகவின் விஜயதரணி உள்ளிட்டோர் தவெகவில் ஐக்கியமாகினர். இந்த நிலையில் அதிமுக தலைமை நிலையத்தில் காஞ்சிபுரம் மாவட்ட நிர்வாகிகள் எடப்பாடி பழனிசாமி ஆலோசனை நடத்தினார்.
இதில் அதிமுக வேட்பாளர்கள், முன்னாள் எம்பிக்கள், செயற்குழு உறுப்பினர்கள், பல்வேறு அணிகளின் நிர்வாகிகள் பங்கேற்றனர். இதன்பின் தேர்தல் தோல்வி தொடர்பாக பல்வேறு விஷயங்கள் ஆலோசிக்கப்பட்டது. நிர்வாகிகளின் கருத்துக்களை எடப்பாடி பழனிசாமி கேட்டறிந்தார். அதிமுகவினருக்கு உற்சாகமூட்டும் வகையில் எடப்பாடி பழனிசாமி சில அறிவுறுத்தல்களை வழங்கியதாக தெரிகிறது.
இதன்பின் செய்தியாளர்களை சந்தித்து கேபி முனுசாமி பேசுகையில், அதிமுக மூலமாக அனைத்து பலன்களையும் அனுபவித்துவிட்டு, இப்போது சுயலாபத்திற்காக புதிய பலன்களை தேடி சிலர் வேறு கட்சிகளுக்கு ஓடுகிறார்கள். யார் கட்சியை விட்டு சென்றாலும், கொள்கைவாதிகள் அதிமுகவில் தான் இருப்பார்கள். கட்சியினரின் கருத்துக்களை கேட்டறிந்து எடப்பாடி பழனிசாமி ஆலோசனை வழங்கி இருக்கிறார்.
ஆதவ் அர்ஜுனாவின் அரசியல் வரலாறு தெரியுமா.. எந்தெந்த கட்சிகளுக்கு அவர் சென்று வந்துள்ளார் தெரியுமா.. அவர் ஒரு சந்தர்ப்பவாத அரசியல்வாதி.. அவருக்கெல்லாம் பதில் சொல்ல வேண்டிய அவசியம் இல்லை. அதிமுகவில் இருந்து சாரை சாரையாக யாரும் செல்லவில்லை. லட்சக்கணக்கானோர் எடப்பாடி பழனிசாமியின் தலைமையை ஏற்று அதிமுகவில் இருக்கின்றனர் என்று தெரிவித்துள்ளார்.
Click it and Unblock the Notifications
Sign in with Google