தமிழக மாநிலங்களவைத் தேர்தல்! அதிமுக வேட்பாளர்கள் அறிவிப்பு! தேமுதிகவுக்கு கல்தா

Updated: Sunday, June 1, 2025, 13:29 [IST]

Subscribe to Oneindia Tamil

சென்னை: தமிழக மாநிலங்களவை தேர்தலில் அதிமுக சார்பில் இன்பதுரையும், மற்றொரு தனபாலும் (சபாநாயகராக இருந்தவர் அல்ல) வேட்பாளர்களாக அறிவிக்கப்பட்டனர். தேமுதிகவுக்கு இந்த முறை மாநிலங்களவை சீட் இல்லை. இந்த அறிவிப்பை அதிமுக இணை பொதுச் செயலாளர் கே.பி.முனுசாமி அறிவித்தார்.

தமிழக மாநிலங்களவைத் தேர்தல் வரும் ஜூன் 19 ஆம் தேதி நடைபெறுகிறது. தமிழகத்திலிருந்து தேர்வு செய்யப்பட்ட 6 மாநிலங்களவை உறுப்பினர்களின் பதவிக்காலம் முடிவடைந்தது.

தற்போது அதிமுகவுக்கு கிடைத்த இரு மாநிலங்களவை இடங்களில் வழக்கறிஞர்களான இன்பதுரை, செங்கல்பட்டு கிழக்கு மாவட்ட அவைத் தலைவர் தனபால் ஆகியோர் போட்டியிடுவார்கள் என அறிவிக்கப்பட்டுள்ளது.

தமிழகத்தில் இருந்து கடந்த 2023 ஆம் ஆண்டு ஜூலை 27 ஆம் தேதி திமுக சார்பில் வில்சன், வைகோ, எம்.சண்முகம், எம்.முகமது அப்துல்லா ஆகிய 4 பேரும் அதிமுக சார்பில் அன்புமணி ராமதாஸ், என்.சந்திரசேகரன் ஆகியோரும் மாநிலங்களவை உறுப்பினர்களாக தேர்வு செய்யப்பட்டனர்.

பதவிக்காலம்

அவர்களது பதவிக்காலம் வரும் ஜூலை 27-ஆம் தேதியுடன் முடிவடைகிறது. இந்த நிலையில்தான் 6 மாநிலங்களவை பதவிகளுக்கான தேர்தலை, தேர்தல் ஆணையம் அறிவித்தது. மொத்தம் 4 இடங்களில் திமுகவும் 2 இடங்களில் அதிமுகவும் போட்டியிட வாய்ப்புள்ளது.

மாநிலங்களவை தேர்தல்

திமுக சார்பில் மாநிலங்களவை தேர்தலில் போட்டியிட உள்ளவர்கள் குறித்த அறிவிப்பை முதல்வர் மு.க.ஸ்டாலின் நேற்று வெளியிட்டார். அதில், ''ஜூன் 19-ம் தேதி நடைபெற உள்ள மாநிலங்களவை உறுப்பினர் தேர்தலில் திமுக சார்பில் போட்டியிடும் 4 இடங்களில், 3 இடங்களுக்கு திமுக வேட்பாளர்கள், மீதமுள்ள ஒரு இடம் ஏற்கெனவே செய்யப்பட்ட ஒப்பந்தப்படி மக்கள் நீதி மய்யத்துக்கு ஒதுக்கப்படுகிறது. திமுக வேட்பாளர்களாக, பி.வில்சன், எஸ்.ஆர்.சிவலிங்கம், ரொக்கையா மாலிக் என்ற கவிஞர் சல்மா ஆகியோர் போட்டியிடுவார்கள்'' என அறிவித்துள்ளார்.

மதிமுக பொதுச் செயலாளர்

இதில், மதிமுக பொதுச்செயலாளர் வைகோ, திமுகவின் பெ.சண்முகம், முகமது அப்துல்லாவுக்கு வாய்ப்பு மறுக்கப்பட்டுள்ளது. உச்சநீதிமன்றத்தில் பல்வேறு வழக்குகளில் திமுகவுக்கு பெரும் வெற்றியை வாங்கித் தந்ததால் வில்சனுக்கு மீண்டும் பதவி வழங்கப்பட்டுள்ளது. அது போல் பெண் என்ற முறையிலும் சிறுபான்மையினர் என்ற முறையிலும் இஸ்லாமியரான சல்மாவுக்கு சீட் வழங்கப்பட்டுள்ளது.

லோக்சபா தேர்தல்

மேலும் 2024 ஆம் ஆண்டு லோக்சபா தேர்தல் ஒப்பந்தத்தின்படி கமல்ஹாசனுக்கு சீட் வழங்கப்பட்டுள்ளது. இந்த நிலையில் அதிமுகவில் இரு இடங்களில் யாருக்கு வழங்கப்படும் என எதிர்பார்க்கப்பட்டது.

அதில் விந்தியாவுக்கும் இன்பதுரைக்கும் வழங்கப்படும் என யூகங்கள் வந்த நிலையில் இன்றைய தினம் மாநிலங்களவை வேட்பாளர்களை கே.பி. முனுசாமி அறிவித்தார். அப்போது வழக்கறிஞர் பிரிவு செயலாளர் இன்பதுரை, செங்கல்பட்டு கிழக்கு மாவட்ட அவைத் தலைவர் தனபால் ஆகியோர் போட்டியிடுவார்கள் என தெரிவிக்கப்பட்டது.

தேமுதிகவுக்கு ஒரு சீட்

அதிமுகவில் இருக்கும் மாநிலங்களவை சீட்களில் ஒன்று தேமுதிகவுக்கு ஒதுக்கப்படும் என கடந்த 2024 லோக்சபா தேர்தலில் ஒப்பந்தம் போடப்பட்டதாக பிரேமலதா தெரிவித்த நிலையில் அதை எடப்பாடி பழனிசாமி மறுத்தார். இந்த நிலையில் எடப்பாடி பழனிசாமியை சுதீஷ் சந்தித்தார். இதனால் தேமுதிகவுக்கு எப்படியும் ஒரு சீட் ஒதுக்கப்படும் என கருதப்பட்டது. ஆனால் இன்றைய தினம் கே.பி.முனுசாமி கூறுகையில் அதிமுக கூட்டணியில்தான் தேமுதிக இருக்கிறது. அக்கட்சிக்கு வரும் 2026 ஆம்ஆண்டு மாநிலங்களவை தேர்தலில் ஒரு சீட் வழங்கப்படும் என தெரிவித்தார்.