அதிமுக - தவெக கூட்டணி.. கடைசி நேரத்தில் வெளியேற்றப்படும் பாஜக? எடப்பாடி பழனிசாமி எடுக்கும் முடிவு!

Updated: Thursday, October 9, 2025, 10:44 [IST]

Subscribe to Oneindia Tamil

சென்னை: அதிமுக - தவெக கூட்டணி அமைய வாய்ப்புள்ளதாக சில பேச்சுகள் எழுந்துள்ள நிலையில், பாஜக கூட்டணிக்குள் இணைய விஜய் சம்மதிப்பாரா என்ற கேள்வி எழுந்துள்ளது. அதேபோல் அதிமுகவுடன் கூட்டணி அமைக்க தவெக முன் வரும் பட்சத்தில், கடைசி நேரத்தில் பாஜக உடனான கூட்டணியை எடப்பாடி பழனிசாமி உதறித் தள்ளவும் வாய்ப்புள்ளதாக விவரம் அறிந்தவர்கள் கூறுகின்றனர்.

நாமக்கல் மாவட்டம் குமாரப்பாளையம் தொகுதியில் அதிமுக பொதுச்செயலாளர் எடப்பாடி பழனிசாமி பிரச்சாரம் மேற்கொண்டார். அந்த பிரச்சாரத்தில் எடப்பாடி பழனிசாமியை வரவேற்பதற்காக அதிமுக மற்றும் பாஜக கொடிகளுடன் தொண்டர்கள் பங்கேற்று இருந்தன. அப்போது தொண்டர் ஒருவரின் கைகளில் தவெக கொடியும் இருந்தது.

அதனை எடப்பாடி பழனிசாமி, திமுக கூட்டணி வலுவாக இருப்பதாக ஸ்டாலின் பேசி வருகிறார். அது வெற்று கூட்டணி.. நமது கூட்டணி வெற்றி கூட்டணி.. இதோ பாருங்க.. கொடி பறக்குது.. பிள்ளையார் சுழி போட்டாங்க.. எழுச்சி.. ஆரவாரம் என்று உற்சாகமாக பேசினார். இதனால் அதிமுக - தவெக கூட்டணி அமையும் என்ற பேச்சுகள் தொடங்கி இருக்கின்றன.

ஏற்கனவே இந்த ஆண்டு தொடக்கத்தின் போதே அதிமுக - தவெக கூட்டணிக்கான பேச்சுவார்த்தைகள் தொடங்கின. ஆனால் திடீரென டெல்லி சென்ற எடப்பாடி பழனிசாமி, மத்திய அமைச்சர் அமித்ஷாவை சந்தித்து கூட்டணியை உறுதி செய்தார். இதன்பின் சென்னை வந்த அமித்ஷா, எடப்பாடி பழனிசாமியை சந்தித்து இரு கட்சிகளின் தொண்டர்களுக்கும் கூட்டணியை அறிவித்தார்.

சட்டசபைத் தேர்தலுக்கு ஓராண்டுக்கு முன்பாகவே அதிமுக - பாஜக கூட்டணி அறிவிக்கப்பட்டது பல்வேறு கேள்விகளை எழுப்பியது. அதேபோல் களத்திலும் அதிமுக - பாஜக கூட்டணி இணைப்பு ஏற்படவில்லை. இதனிடையே முதல்வர் வேட்பாளர், தொகுதி பங்கீடு உள்ளிட்ட விவாதங்களால் சர்ச்சைகள் உருவாகியது. இந்த நிலையில் கரூர் சம்பவத்திற்கு பின் தமிழக அரசியலில் மாற்றம் ஏற்பட்டுள்ளதாக பார்க்கப்படுகிறது.

குறிப்பாக தவெக மற்றும் விஜய்க்கு ஆதரவான நிலைப்பாட்டை அதிமுக எடுத்தது. அதற்கேற்ப அதிமுகவின் பிரச்சாரங்களில் தவெக கொடியும் இடம்பெறத் தொடங்கின. இதற்கிடையே விஜய் தரப்பும் எடப்பாடி பழனிசாமி மற்றும் அமித்ஷா ஆகியோருடன் பேச்சுவார்த்தை நடத்தியதாக கூறப்பட்டது. இந்த நிலையில் எடப்பாடி பழனிசாமி, பிள்ளையார் சுழி போட்டாங்கா என்று தவெக கொடியை பார்த்து பேசி இருக்கிறார்.

இதனால் அதிமுக - தவெக கூட்டணி அமைகிறதா என்ற கேள்விகள் எழுந்துள்ளன. அதேபோல் தங்களின் கொள்கை எதிரியாக பாஜகவை விஜய் அறிவித்து பல்வேறு கூட்டங்களிலும் விமர்சித்து வருகிறார். இதனால் பாஜக கூட்டணிக்குள் விஜய் செல்வாரா என்ற குழப்பம் ஏற்பட்டுள்ளது. அதேபோல் பாஜகவை கடைசி நேரத்தில் கழற்றிவிடும் திட்டத்தில் அதிமுக இருக்கிறதா என்ற விவாதங்களும் தொடங்கியுள்ளது.

அதிமுக - பாஜக கூட்டணி அமைந்த நேரம் முதலே, இந்த கூட்டணி பிரிந்துவிடும் என்று சொல்லப்பட்டு வருகிறது. அதனால் அதிமுக உடன் கூட்டணி அமைக்க தவெக உடன்பட்டால், கடைசி நேரத்தில் பாஜகவை கழற்றிவிட்டுவிட்டு எடப்பாடி பழனிசாமி விஜய் பக்கமாக வருவார் என்றும் விவரம் அறிந்தவர்கள் கூறுகின்றனர்.