திராவிட அரசியலை உடைத்த தவெக.. விஜய் வெற்றியால் டென்ஷனான பாஜக? சாணக்கிய அமித்ஷா அடுத்த பிளான் இதுதானா

Updated: Wednesday, June 10, 2026, 11:38 [IST]

Subscribe to Oneindia Tamil

சென்னை: தவெகவின் பிரம்மாண்ட தேர்தல் வெற்றியை டெல்லி தலைமை சற்றும் எதிர்பார்க்கவில்லை என்பதை மத்திய உள்துறை அமைச்சர் அமித்ஷாவின் சமீபத்திய செய்திக்குறிப்பு வெளிப்படையாக உறுதிப்படுத்தியுள்ளது.. ஆனால் காங்கிரஸுடனான இணக்கத்தால் பாஜக தரப்பிலிருந்து வரவிருக்கும் மறைமுக நிர்வாக நெருக்கடிகளையும், மத்திய-மாநில உறவுகளின் சவால்களையும் புதிய தவெக அரசு எவ்வாறு முதிர்ச்சியோடு கையாளப் போகிறது என்பதுதான் தற்போது அரசியல் விவாதமாக மாறியுள்ளது..!!

பிரதமர் மோடி தலைமையிலான 3-வது ஆட்சிக்காலத்தின் 2 ஆண்டுகள் நிறைவைக் கொண்டாடும் வகையில், மத்திய உள்துறை அமைச்சர் அமித்ஷா செய்தியாளர்களைச் சந்தித்துக் கலந்துரையாடினார்.. இந்த சந்திப்பில் மேற்கு வங்கத் தேர்தல் வெற்றி உள்ளிட்ட பல்வேறு மாநிலங்களின் அரசியல் நிலவரங்கள் குறித்துப் பேசப்பட்டபோது, தமிழக அரசியல் சூழலும் முக்கிய விவாதப் பொருளானது.

Amit Shah TVK Vijay BJP Dravidian Politics Tamil Nadu Politics Election News Political Strategy

அமித்ஷா ஆச்சரியம்

அப்போது, "தமிழகத்தில் தமிழக வெற்றிக் கழகம், இந்த அளவுக்கு ஒரு பிரம்மாண்ட வெற்றியைப் பெறும் என்று யாரும் எதிர்பார்க்கவில்லை" என அமித்ஷா தனது வியப்பை வெளிப்படுத்தினாராம். இந்த தகவல்தான் இணையத்தை வட்டமடித்து கொண்டிருக்கிறது.

காரணம் எப்போதும் தேர்தல் கணிப்புகளில் துல்லியமாக இருக்கும் டெல்லி சாணக்கியரின் இந்த வாக்குமூலம், தவெகவின் அசுர வளர்ச்சியை பாஜக உன்னிப்பாகக் கவனித்து வருகிறது என்பதையே காட்டுகிறது. இந்தச் சூழலில், புதிய ஆளும் கட்சியான தவெகவை பா.ஜ.க எவ்வாறு கையாளப் போகிறது, மத்திய-மாநில உறவுகள் இனி எப்படி இருக்கும் என்ற கேள்விகளும் பரவலாக எழுந்துள்ளன.

தவெக பிரம்மாண்டமான வெற்றி

பாஜகவை பொறுத்தவரை, ஒரு புதிய பிராந்திய சக்தியின் எழுச்சி என்பது எப்போதும் சவாலான ஒன்றே. தவெகவின் வெற்றி பாஜகவுக்கு ஒருவித அரசியல் எச்சரிக்கையைத் தந்திருந்தாலும், அதை அவர்கள் வெறும் பயமாக மட்டும் பார்க்க மாட்டார்கள். மாறாக, தமிழகத்தில் பல தசாப்தங்களாக நிலைபெற்றிருந்த திராவிட இருதுருவ அரசியலை, ஒரு புதிய சக்தி உடைத்தெறிந்திருப்பதை பாஜக தங்களுக்குச் சாதகமான ஒரு நீண்டகால வாய்ப்பாகவே கருதும் என்றே தெரிகிறது.

தமிழகத்தில் தவெகவின் ஆட்சி பா.ஜ.க-வுக்கு நேரடியாகப் பாதிப்பை ஏற்படுத்தாவிட்டாலும், பாஜக-வின் நீண்டகாலத் திட்டமான "தமிழகத்தில் தாமரை" என்ற இலக்கிற்கு தவெக ஒரு புதிய மற்றும் பலமான போட்டியாளராக உருவெடுத்துள்ளது என்பதை டெல்லி தலைமை உணர்ந்துள்ளது போலும்.

பாஜக - தவெக இணக்கம்?

மத்திய அரசு மற்றும் புதிய மாநில அரசிற்கு இடையேயான இணக்கம் என்பது இனி முற்றிலும் ஒரு முதிர்ச்சியான நிர்வாக அணுகுமுறையாகவே இருக்கும். தேர்தலுக்குப் பிந்தைய சூழலில், தமிழகத்தின் புதிய முதலமைச்சராகப் பொறுப்பேற்றுள்ள விஜய், மத்திய அரசுடன் தேவையில்லாத மோதல் போக்கைத் தவிர்த்து, மாநிலத்தின் வளர்ச்சித் திட்டங்களுக்கான நிதியைப் பெறுவதிலேயே கவனம் செலுத்துவார்.

அதேபோல் அமித்ஷா போன்ற மூத்த தலைவர்கள் தவெகவின் மக்கள் செல்வாக்கை மதித்து, ஆரம்பக் கட்டத்தில் சுமுகமான கூட்டாட்சித் தத்துவத்தின் அடிப்படையிலான இணக்கமான போக்கையே கடைப்பிடிப்பார்கள் என தெரிகிறது.. மத்திய அரசின் திட்டங்களைச் செயல்படுத்துவதில் தவெக காட்டும் ஒத்துழைப்பைப் பொறுத்தே இந்த இணக்கம் நீடிக்கும்.

ஆட்சியில் காங்கிரஸ்?

இருந்தாலும், காங்கிரஸ் கட்சியுடன் தவெக கொண்டுள்ள மறைமுக அல்லது நேரடித் தொடர்பு மற்றும் ராஜ்யசபா சீட் பகிர்வு போன்ற நகர்வுகள் டெல்லிக்கு நிச்சயம் அதிருப்தியைத் தந்துள்ளன.

மத்தியில் காங்கிரஸை பிரதான எதிரியாகக் கருதும் பாஜக , தமிழகத்தில் தவெக-காங்கிரஸ் கூட்டணி வலுவடைவதை விரும்பாது. இதனால், காங்கிரஸ் கூட்டணியைக் காரணம் காட்டி தவெக அரசுக்கு மறைமுக நெருக்கடிகள் வர வாய்ப்புகள் அதிகம் உள்ளன.

ஆளுநர் மாளிகை மூலமான நிர்வாகக் கெடுபிடிகள், மத்திய உளவுத்துறை மற்றும் விசாரணை அமைப்புகளின் கண்காணிப்புகள் போன்றவை தவெகவின் முக்கியப் புள்ளிகள் மீது திருப்பப்படலாம். இது தவெகவை அரசியல் ரீதியாகத் தற்காப்பு நிலைக்குத் தள்ள பா.ஜ.க பயன்படுத்தும் ஒரு வியூகமாக இருக்கும்.

அமித்ஷா - புதிய அத்தியாயம்

சுருக்கமாக சொன்னால், அமித்ஷாவின் இந்த ஆச்சரியம் என்பது தமிழக அரசியலில் ஒரு புதிய அத்தியாயத்தின் தொடக்கம் என்றே சொல்லலாம்.

பாஜக தவெகவை ஆரம்பத்தில் நட்போடு அணுகுவது போல் தெரிந்தாலும், காங்கிரஸ் இணக்கத்தைக் காரணம் காட்டி பின்னணியில் அழுத்தங்களைத் தரத் தவறாது. தவெக இந்த முக்கோண அரசியல் நெருக்கடிகளை எப்படிக் கையாள்கிறது, மத்திய அரசின் அழுத்தங்களை எப்படி முதிர்ச்சியோடு எதிர்கொள்கிறது என்பதைப் பொறுத்தே தமிழகத்தின் எதிர்கால அரசியல் நகர்வுகள் அமையும். அந்தவகையில் டெல்லியின் வியூகங்களைச் சமாளிப்பதே புதிய முதலமைச்சரின் முதல் பெரிய அரசியல் அக்னிப்பரீட்சையாக இருக்கும்... பொறுத்திருந்து பார்ப்போம்..!!