பாமக நிர்வாக குழுவில் இருந்து அன்புமணி நீக்கம் இல்லை.. ஜி.கே.மணி கொடுத்த விளக்கம்
சென்னை: பாமக நிர்வாகக் குழுவில் இருந்து அன்புமணி நீக்கப்படவில்லை என பாமக கௌரவத் தலைவர் ஜி.கே.மணி தெரிவித்துள்ளார். ஜூலை 8 ஆம் தேதி நடைபெறவுள்ள பாமக செயற்குழு கூட்டத்தில் அன்புமணிக்கு அழைப்பு உள்ளது. செயற்குழு கூட்டத்தில் அன்புமணி பங்கேற்பார் என எதிர்பார்க்கிறோம் என ஜி.கே.மணி கூறியுள்ளார்.
பாமக நிறுவனர் ராமதாஸ் மற்றும் அக்கட்சியின் தலைவர் அன்புமணி இடையே கடந்த சில மாதங்களாக அதிகார மோதல் இருந்து வருகிறது. இருவரும் கட்சி நிர்வாகிகளை மாற்றி மாற்றி நீக்கி வருகின்றனர். குறிப்பாக கட்சியின் பொருளாளர் திலகபாமாவை பாமக நிறுவனர் ராமதாஸ் நீக்கி அறிவிப்பு வெளியிட்டார். சேலம் மேற்கு தொகுதி எம்எல்ஏ அருளை கட்சியில் இருந்து நீக்கி அன்புமணி ராமதாஸ் அறிவித்தார்.
இந்நிலையில், பாமகவில் புதிய நிர்வாக குழுவை ராமதாஸ் அறிவித்துள்ளார். பாமக கௌரவத் தலைவர் ஜிகே மணி, பொதுச் செயலாளர் முரளி சங்கர், கரூர் பாஸ்கர், சேலம் மேற்கு சட்டமன்ற உறுப்பினர் அருள், பரந்தாமன், சிவபிரகாசம், அருள் மொழி உள்ளிட்டோர் அடங்கிய புதிய நிர்வாகக்குழுவை ராமதாஸ் அறிவித்துள்ளார்.
ஏற்கனவே தலைவர் பொறுப்பில் இருந்து அன்புமணியை நீக்கி, தானே தலைவர் பொறுப்பை ஏற்பதாக ராமதாஸ் அறிவித்த நிலையில், அன்புமணியின் நிர்வாகக்குழு உறுப்பினர் பதவியையும் ராமதாஸ் பறித்துள்ளதாக தகவல் வெளியாகி பாமகவில் பரபரப்பை ஏற்படுத்தி உள்ளது.
இந்நிலையில், பாமக நிர்வாக குழுவில் இருந்து அன்புமணி நீக்கப்பட்டதாக பரவும் தகவலுக்கு மறுப்பு தெரிவித்துள்ளார் பாமக கௌரவத் தலைவர் ஜி.கே.மணி. பாமக நிர்வாக குழுவில் இருந்து அன்புமணி நீக்கப்படவில்லை என பாமக கௌரவத் தலைவர் ஜி.கே.மணி தெரிவித்துள்ளார்.
"பாமக நிர்வாகக் குழு கூட்டம் நேற்று நடைபெற்றது. அதில் நானும் கலந்து கொண்டேன். நிர்வாகக் குழு கூட்டத்தில் பங்கேற்றவர்கள் குறித்து செய்தி வெளியானது. அன்புமணியை நிர்வாகக் குழுவில் இருந்து நீக்கவில்லை. நிர்வாகக் குழுவின் முழுமையான பட்டியலை பாமக நிறுவனர் ராமதாஸ் வெளியிடவில்லை." என்றார்.
இன்று வெளியான பாமக நிறுவனரின் அறிக்கையில் செயல் தலைவர் அன்புமணி என்ற பெயர் இடம்பெறவில்லை என்ற கேள்விக்கு, ஜூலை 8 ஆம் தேதி நடைபெறவுள்ள பாமக செயற்குழு கூட்டத்தில் அன்புமணிக்கு அழைப்பு உள்ளது. செயற்குழு கூட்டத்தில் அன்புமணி பங்கேற்பார் என எதிர்பார்க்கிறோம் என ஜி.கே.மணி கூறியுள்ளார்.
Click it and Unblock the Notifications
Sign in with Google