அதிமுகவில் மீண்டும் அதிர்ச்சி.. தவெகவுக்கு தாவுகிறாரா இசக்கி சுப்பையா?

சென்னை: அதிமுக இரண்டு பிரிவுகளாகப் பிரிந்த நிலையில் எஸ்.பி வேலுமணி மற்றும் சிவி சண்முகம் அணியிலிருந்து வேலுமணி ஆதரவு அதிமுக எம்எல்ஏக்கள் 3 பேர் நேற்று திடீரென தங்களுடைய பதவியை ராஜினாமா செய்தனர். பதவியை ராஜினாமா செய்த கையோடு தவெகவில் இணைந்து தலைமைச் செயலகத்தில் வைத்தே உறுப்பினர் அட்டையையும் பெற்றனர். இதனால், எஸ்.பி.வேலுமணி தரப்பு கடும் அதிர்ச்சியடைந்துள்ள நிலையில், அம்பாசமுத்திரம் எம்எல்ஏ இசக்கி சுப்பையா அதிமுகவில் இருந்து விலகி, தவெகவில் இணையவுள்ளதாக தகவல் வெளியாகியுள்ளது அதிர்ச்சியை ஏற்படுத்தியுள்ளது.

2026 சட்டமன்றத் தேர்தலுக்கு பிறகு தமிழக அரசியலில் ஏற்பட்டுள்ள மாற்றங்கள் தொடர்ந்து பரபரப்பை கிளப்பி வருகின்றன. விஜய் தலைமையிலான தமிழக வெற்றிக் கழகம் 108 இடங்களில் வெற்றி பெற்று மிகப்பெரிய கட்சியாக உருவெடுத்தது. திமுக கூட்டணி 73 இடங்களிலும், அதிமுக கூட்டணி 53 இடங்களிலும் வெற்றி பெற்ற நிலையில், பெரும்பான்மைக்கு தேவையான ஆதரவை பெற தவெக பல்வேறு கட்சிகளுடன் பேச்சுவார்த்தை நடத்தியது.

இந்த சூழலில், திமுக கூட்டணியில் போட்டியிட்டு வெற்றி பெற்ற காங்கிரஸ் கட்சியின் 5 எம்எல்ஏக்கள் தவெகவுக்கு ஆதரவு தெரிவித்தனர். தொடர்ந்து விசிக, இந்திய கம்யூனிஸ்ட், மார்க்சிஸ்ட் மற்றும் இந்திய யூனியன் முஸ்லிம் லீக் கட்சிகளின் தலா 2 எம்எல்ஏக்களும் ஆதரவு அளித்தனர். இதன் மூலம் தவெகவின் ஆதரவு பலம் 120 ஆக உயர்ந்தது. இதையடுத்து தவெக ஆட்சியமைத்து விஜய் முதல்வராக பதவியேற்றார்.

நம்பிக்கை வாக்கெடுப்பின் போது, எஸ்.பி.வேலுமணி சிவி சண்முகம் அணியைச் சேர்ந்த 25 அதிமுக எம்எல்ஏக்கள் தவெகவுக்கு ஆதரவாக செயல்பட்டதாக தகவல்கள் வெளியானது. இதற்கு எதிர்ப்பு தெரிவித்த எடப்பாடி பழனிசாமி தரப்பும், சி.வி.சண்முகம் தரப்பும் ஒருவரை ஒருவர் குற்றம்சாட்டி சபாநாயகரிடம் தகுதி நீக்க மனுக்களை அளித்தனர்.

இந்த நிலையில், மதுராந்தகம் தொகுதி மரகதம் குமாரவேல், பெருந்துறை தொகுதி ஜெயக்குமார் மற்றும் தாராபுரம் தொகுதி சத்யபாமா ஆகிய 3 அதிமுக எம்எல்ஏக்கள் தங்களது பதவியை ராஜினாமா செய்து தவெகவில் இணைந்தனர். அவர்கள் அமைச்சர் ஆதவ் அர்ஜூனா முன்னிலையில் தவெகவில் இணைக்கப்பட்டு உறுப்பினர் அட்டைகள் வழங்கப்பட்டன. அதிமுகவில் இருந்து ராஜினாமா செய்த சில மணி நேரத்திலேயே தலைமைச் செயலகத்தில் வைத்தே அவர்கள் தவெகவில் இணைந்தனர்.

இதைத்தொடர்ந்து, அம்பாசமுத்திரம் தொகுதி எம்எல்ஏ இசக்கி சுப்பையாவும் கூட அதிமுகவில் இருந்து விலகி தவெகவில் இணையவுள்ளதாக தகவல் வெளியாகியுள்ளது. இதனால் அதிமுகவில் மேலும் எம்எல்ஏக்கள் அணிமாற வாய்ப்புள்ளதாக அரசியல் வட்டாரங்களில் பரபரப்பாக பேசப்படுகிறது.

English summary

Political tension has intensified in Tamil Nadu as more AIADMK MLAs are reportedly shifting support to TVK. Three MLAs have already resigned and joined Vijay’s party, while Isakki Subbiah is also expected to switch sides. The developments have triggered fresh debate over AIADMK’s internal crisis ahead of future political battles.