பேசி முடித்ததுமே சரிந்த பாமக நிறுவனர் ராமதாஸ்.. கேள்விப்பட்டதும் உடனே போன் போட்ட முதல்வர் ஸ்டாலின்!
சென்னை: பாமக நிறுவனர் ராமதாஸை தொலைபேசியில் தொடர்பு கொண்டு நலம் விசாரித்துள்ளார் தமிழக முதலமைச்சர் மு.க.ஸ்டாலின். சேலத்தில் நேற்று பரப்புரை முடிந்து மேடையில் இருந்து இறங்கியபோது திடீரென மயங்கினார் ராமதாஸ். இந்நிலையில் சிகிச்சையில் இருந்து வரும் ராமதாஸை தொடர்பு கொண்டு நலம் விசாரித்துள்ளார் முதல்வர் ஸ்டாலின்.
சேலத்தில் நேற்று தேர்தல் பரப்புரை முடிந்து மேடையிலிருந்து இறங்கிய பாமக நிறுவனர் ராமதாஸ் திடீரென மயக்கமடைந்தார். உடனடியாக அவர் ஆம்புலன்ஸ் மூலம் ஐந்து ரோடு பகுதியில் உள்ள தனியார் மருத்துவமனைக்கு அழைத்துச் செல்லப்பட்டார். ரத்த அழுத்தக் குறைவால் மயக்கமடைந்த அவருக்கு அங்கு உரிய சிகிச்சை அளிக்கப்பட்டது.
சேலம் மேற்கு தொகுதி வேட்பாளரும் தற்போதைய சட்டமன்ற உறுப்பினருமான அருளை ஆதரித்து சட்டசபை தேர்தலுக்கான முதல் பரப்புரையை ராமதாஸ் மேற்கொண்டார். சேலம் பள்ளப்பட்டியில் பரப்புரையை முடித்து மேடையில் இருந்து இறங்கியபோது திடீரென அவர் மயக்கமடைந்தார். உடனடியாக, ராமதாஸின் மகள் ஸ்ரீகாந்தி உள்ளிட்டோர் தனியார் மருத்துவமனைக்கு அவரை காரில் அனுப்பி வைத்தனர். அதனைத் தொடர்ந்து ராமதாஸ் மற்றொரு மருத்துவமனைக்கு சிகிச்சைக்கு அழைத்து செல்லப்பட்டார்.
தீவிர மருத்துவ கண்காணிப்பில் இருந்த ராமதாஸை மருத்துவர் குழுவினர் சிகிச்சை அளித்து வந்தனர். முதற்கட்ட சிகிச்சை முடிந்து மருத்துவமனை மேலாண்மை இயக்குனர் அர்த்தனாரி மற்றும் மருத்துவர் ராஜேஷ் ஆகியோர் செய்தியாளர்களைச் சந்தித்தனர். அப்போது பேசிய மருத்துவர், "மருத்துவர் ராமதாஸ் அவர்களுக்கு வயது அதிகமாக உள்ளது. தொடர்ந்து தேர்தல் பிரச்சாரத்தில் ஈடுபட்டதால் உடல் சோர்வு ஏற்பட்டு மயக்க நிலைக்கு சென்றுள்ளார். தற்போது அவர் நலமாக இருக்கிறார். 24 மணி நேர மருத்துவ கண்காணிப்பில் இருக்க மருத்துவர்கள் சார்பில் அறிவுறுத்தப்பட்டுள்ளது. அதனைத் தொடர்ந்து தனது தேர்தல் பிரச்சாரத்தை தொடரலாம்" எனத் தெரிவித்தனர்.
குறைந்த ரத்த அழுத்தம் காரணமாக அவருக்கு உடல்நலக்குறைவு ஏற்பட்டதாக கூறப்பட்ட நிலையில், ராமதாஸ் சிகிச்சை பெற்று வந்த மருத்துவமனையில் இருந்து சேலம் சீலநாயக்கன்பட்டி பகுதியில் உள்ள தரன் மருத்துவமனைக்கு ஆம்புலன்ஸ் மூலம் அழைத்துச் செல்லப்பட்டார். இதற்கிடையே, இன்று ராமதாஸ் சேலம் சீலநாயக்கன்பட்டி பகுதியில் உள்ள தரன் மருத்துவமனையில் இருந்து சென்னை அழைத்து வரப்பட இருப்பதாக கூறப்படுகிறது. சென்னை அப்பல்லோ மருத்துவமனையில் அவர் மருத்துவர்களிடம் அவர் சிகிச்சை பெற திட்டமிட்டுள்ளதாகவும் தகவல் வெளியாகியுள்ளது.
இந்நிலையில் பாமக நிறுவனர் ராமதாஸை தொலைபேசியில் தொடர்புகொண்டு நலம் விசாரித்துள்ளார் முதலமைச்சர் மு.க.ஸ்டாலின். சட்டசபை தேர்தலையொட்டி தீவிர பிரச்சாரம் மேற்கொண்டு வரும் முதல்வர் ஸ்டாலின், ராமதாஸ் நேற்று உடல்நலக்குறைவால் மேடையிலேயே சரிந்து விழுந்தது பற்றிக் கேள்விப்பட்டு தொலைபேசி வாயிலாக தொடர்பு கொண்டு நலம் விசாரித்துள்ளார்.
Click it and Unblock the Notifications
Sign in with Google