பைசன் படம் பார்த்த முதல்வர் ஸ்டாலின்.. மாரி செல்வராஜுக்கு பாராட்டு மழை..! நெகிழ்ந்துபோன மாரி!

Updated: Sunday, October 26, 2025, 8:38 [IST]

Subscribe to Oneindia Tamil

சென்னை: 'பைசன்' திரைப்படம் இயக்குநர் மாரி செல்வராஜின் திரைமகுடத்தில் மற்றுமொரு வைரக்கல் என தமிழக முதல்வர் மு.க. ஸ்டாலின் பாராட்டியுள்ளார். விளையாட்டுத் துறையை மையமாக வைத்து, இளைஞர்கள் கைக்கொள்ள வேண்டிய பாதையை, அரசியலை மிக முதிர்ச்சியுடன் காட்டியிருக்கிறார் மாரி செல்வராஜ் என முதல்வர் ஸ்டாலின் பாராட்டியுள்ளார்.

தமிழக முதல்வர் ஸ்டாலின், மாரி செல்வராஜ் இயக்கத்தில் துருவ் விக்ரம் உள்ளிட்ட பலர் நடித்துள்ள 'பைசன் என்கிற காளமாடன்' திரைப்படத்தை நேற்று இரவு பார்த்து ரசித்தார். இதைத்தொடர்ந்து, தனது எக்ஸ் தள பக்கத்தில் வெளியிட்டுள்ள பதிவில், "தன் திறமையை மட்டுமே நம்பி, கிராமத்தில் இருந்து சாதிக்கக் கிளம்பிய ஓர் இளைஞன், கபடிக் கோட்டுக்கு உள்ளேயும் வெளியேயும் சந்திக்கும் போராட்டங்களை எதிர்கொண்டு வெற்றி பெற்ற கதையை மிகச் சிறப்பான திரை அனுபவமாக மாற்றியுள்ளார் இயக்குநர் மாரி செல்வராஜ்.

அவரது ஒவ்வொரு படத்தையும் நான் உன்னிப்பாகக் கவனித்து வருகிறேன். ஒவ்வொன்றும் ஒரு 'sharp message'-ஐயும் தாக்கத்தையும் நம் மனங்களில் பதிக்கத் தவறியதே இல்லை. அவ்வகையில் விளையாட்டுத் துறையை மையமாக வைத்து, இளைஞர்கள் கைக்கொள்ள வேண்டிய பாதையை, அரசியலை மிக முதிர்ச்சியுடன் காட்டியிருக்கிறார் மாரி செல்வராஜ்.

சகோதரர் மாரியின் திரைமொழியும், கலைநேர்த்தியும், மேலும் மேலும் மேம்பட்டு வருவதற்கு எடுத்துக்காட்டாக 'பைசன்' மிளிர்கிறது. இத்திரைப்படத்தில் சிறப்பான நடிப்பை வெளிப்படுத்தி, மாரியின் திரைக்கதைக்கு உயிரூட்டியுள்ள துருவ் விக்ரம், பசுபதி, அனுபமா, ரஜிஷா உள்ளிட்ட நடிகர்கள், பின்னணியில் உழைத்த தொழில்நுட்பக் கலைஞர்கள் என அனைவருக்கும் எனது நெஞ்சார்ந்த பாராட்டுகள்! இதுபோல மேலும் பல படைப்புகளைத் தமிழ்த் திரையுலகுக்கு வழங்க மாரி செல்வராஜ் அவர்களுக்கு எனது வாழ்த்துகள்!" எனத் தெரிவித்துள்ளார்.

முதல்வர் ஸ்டாலினின் பதிவுக்கு பதில் அளித்துள்ள இயக்குநர் மாரி செல்வராஜ், "என் முதல் படமான பரியேறும் பெருமாளில் ஆரம்பித்து கர்ணன், மாமன்னன், வாழை இப்போது பைசன் வரை என் மீதும் என் படைப்பின் மீதும் பெரும் நம்பிக்கை வைத்து ஆர்வமாய் பார்த்து நேரில் அழைத்து என்னை உச்சிமுகர்ந்து கொண்டாடும் உங்களின் அத்தனை பேரன்பிற்கும் பெரும் பிரியத்திற்கும் என் இதயத்திலிருந்து கசிந்துருகும் நன்றிகளை தெரிவித்துக்கொள்கிறேன் ஐயா" எனத் தெரிவித்துள்ளார்.